«اۋىلدىڭ اجارى – ازاماتىنان» دەگەن ءسوز بار. بۇل – ەڭبەگىمەن ەلدى كوركەيتىپ, كوپكە سەپتىگىن تيگىزىپ جۇرگەن ازاماتتارعا قاراپ ايتىلاتىن ءسوز. سونداي سيپاتقا لايىق ازاماتتىڭ ءبىرى – بەيبىت اسانوۆ.
1999 جىلدىڭ 9 ناۋرىزىندا بايتەرەك اۋدانىندا «اسان-اۋىل» جاۋاپكەرشىلىگى شەكتەۋلى سەرىكتەستىگىن قۇرعان بەيبىت باتنياز ۇلىنىڭ باستاماسى بۇگىندە ۇلكەن شارۋاشىلىققا اينالىپ, اۋىل-ايماققا شاراپاتىن تيگىزىپ وتىر.
اتاكاسىپتى العا سۇيرەگەن ىسكەر ازامات وسىناۋ ۋاقىت ارالىعىندا ەگىنشىلىكتى قولعا الىپ, اجەپتاۋىر دەڭگەيگە كوتەردى. قازىرگى كەزدە بۇل شارۋاشىلىق 61 ادامدى جۇمىسپەن قامتىپ وتىر. تەحنيكالارى ايتارلىقتاي جاڭارىپ, تىرلىكتىڭ قارقىنىن كۇشەيتىپ كەلەدى.
7 ۆەكتور كومباينى, ك-700 الىپ تراكتورلارىمەن قوسا متز-80 ماركالى 16 تراكتور شارۋانى شىر اينالدىرىپ تۇر. بۇگىندە شارۋاشىلىق 2 345 گەكتار جەرگە كۇزدىك قارا بيداي ەگىپ, ءار گەكتاردان 23 تسەنتنەردەن ءونىم الدى. بۇعان قوسا 200 گەكتار جەرگە ارپا ەگىپ, ءار گەكتارىنان 14,5 تسەنتنەردەن ءونىم ءتۇستى. بۇل ىستە 43 جۇمىسشى ەگىنجايدا تىنباي ەڭبەكتەنىپ, التىن ءداندى قامباعا جەتكىزدى.
سونىمەن قاتار بەيبىت باتنياز ۇلىنىڭ شارۋاشىلىعىندا 1 120 گەكتار جەرگە جازعى اق بيداي تۇقىمى دا سەبىلىپ, گەكتارى 12 تسەنتنەر ءونىم بەردى. ال 1 417 گەكتارعا ەگىلگەن كۇنباعىستان 16 تسەنتنەر ءونىم الۋدى كۇتىپ وتىر. ەلدى مەكەنگە قايىرى ءتيىپ وتىرعان وسىنداي شارۋانى قولعا الاتىن باستاماشىل ازاماتتىڭ كوپ بولعانى – ەلگە پايدا.
رافحات حالەلوۆ
باتىس قازاقستان وبلىسى,
بايتەرەك اۋدانى