ورتالىق سايلاۋ كوميسسياسىنىڭ توراعاسى نۇرلان ءابدىروۆ استاناداعى ەقىۇ باعدارلامالار كەڭسەسىنىڭ باسشىسى دوكتور فولكەر فروبارتپەن كەزدەستى. كەزدەسۋ بارىسىندا كوميسسيا باسشىسى ۇيىمدار اراسىنداعى تىعىز ىنتىماقتاستىقتى جانە ەقىۇ باسشىلىعىمەن تۇراقتى كەزدەسۋلەر جاقسى تاجىريبەگە اينالعانىن اتاپ ءوتتى.
نۇرلان ءابدىروۆ وتكەن جىلعى 20 قاراشاداعى قازاقستان رەسپۋبليكاسى پرەزيدەنتىنىڭ جانە 2023 جىلعى 19 ناۋرىزداعى پارلامەنت ءماجىلىسى دەپۋتاتتارىنىڭ كەزەكتەن تىس سايلاۋلارىن بايقاۋ جونىندەگى ەقىۇ/دياقب ميسسياسىنىڭ جاقىندا جاريالانعان قورىتىندى ەسەپتەرىنە كوڭىل ءبولىپ, سونداي-اق وسى ەسەپتەردەگى ۇسىنىمدار بيىل 28 قىركۇيەكتەگى ورتالىق سايلاۋ كوميسسياسىجانىنداعى ساراپتامالىق كەڭەستىڭ جاقىن ارادا وتەتىن وتىرىسىندا تالقىلانۋ جوسپارلانعانىن حابارلادى.
ەقىۇ-نىڭ استاناداعى باعدارلامالار كەڭسەسىنىڭ باسشىسى قاناتقاقتى رەجىمدە وتەتىن اۋداندار مەن وبلىستىق ماڭىزى بار قالالار اكىمدەرىنىڭ الداعى تىكەلەي سايلاۋى, شىعىپ قالعان ءماسليحاتتار دەپۋتاتتارىنىڭ ورنىنا سايلاۋ, سونداي-اق 2021 جىلعى 25 شىلدەدەن بەرى جالعاسىپ كەلەتىن رەسپۋبليكاداعى اۋىل اكىمدەرىن سايلاۋ تۋرالى حاباردار ەتىلدى.
سونىمەن قاتار, تاراپتار ورتالىق سايلاۋ كوميسسياسىنىڭ 30 جىلدىعىنا ارنالعان «كونستيتۋتسيالىق رەفورما جانە سايلاۋ جۇيەسى» تاقىرىبىنداعى حالىقارالىق عىلىمي-تاجىريبەلىك كونفەرەنتسياعا دايىندىق اياسىندا بىرقاتار ماسەلەنى تالقىلادى.
كەزدەسۋ اياسىندا ف.فروبارت ەلىمىزدىڭ ورتالىق سايلاۋ كوميسسياسىمەن ىنتىماقتاستىققا ەقىۇ تاراپىنان بەرىلگەن جوعارى باعانى اتاپ, ءوزارا ءىس-قيمىلدى جالعاستىرىپ, سايلاۋ سالاسىندا تاجىريبە الماسۋعا دايىن ەكەنىن راستادى.
كەزدەسۋ قورىتىندىسى بويىنشا سايلاۋ سالاسىنداعى وزىق حالىقارالىق تاجىريبەنى زەردەلەۋدە ءوزارا ءىس-قيمىلدى ودان ءارى دامىتۋ, ونىڭ ىشىندە سايلاۋ كامپانيالارى اراسىنداعى كەزەڭدە ديالوگتى كەڭەيتۋ تۋرالى ۋاعدالاستىققا قول جەتكىزىلدى.