ءبىلىم جانە عىلىم سالاسىنىڭ وكىلى رەتىندە جاستار تاربيەسى, بىلىكتى كادرلار دايارلاۋ مەن عىلىمدى دامىتۋ بويىنشا مەملەكەتتىك ماڭىزى زور ماسەلەلەردى ءسوز ەتكەندى ءجون كوردىم. ادىلەتتى قازاقستاندى قۇرامىز دەسەك, ساياسي-ەكونوميكالىق رەفورما جاساۋ جەتكىلىكسىز. ەڭ باستىسى, قوعامدىق سانا, ازاماتتاردىڭ نيەتى وزگەرۋى كەرەك. ونسىز باسقا جۇمىستىڭ ءبارى بەكەر.
ينتەللەكتۋالدى ۇلت قالىپتاستىرۋ ەلدىڭ دامۋىنا ۇلكەن وزگەرىس اكەلەتىنى بەلگىلى. سوندىقتان جاستار تاربيەسىنە قاتتى كوڭىل ءبولۋىمىز كەرەك. ءاربىر ازاماتىمىز, اسىرەسە جاستار ەڭ جاقسى قاسيەتتەردى بويىنا ءسىڭىرۋى قاجەت.
جاڭا قازاقستاننىڭ جاڭا تۇرپاتتى جاستارىن وتانشىل, ءبىلىمپاز, ەڭبەكقور, ءتارتىپتى, ادال, ءادىل ەتىپ تاربيەلەسەك, ەلىمىز ءوزىنىڭ ماقسات-مۇراتتارىنا قول جەتكىزەتىنى ءسوزسىز. عۇلاما عالىم ءال-فارابي بابامىز ايتقان «تاربيەسىز بەرىلگەن ءبىلىم – ادامزاتتىڭ قاس جاۋى» دەگەن عيبراتتىق ءسوزىن ۇنەمى نازاردا ۇستاعانىمىز ابزال.
ابايدىڭ «تولىق ادام» ءىلىمىن نەگىزگە الا وتىرىپ, جاستاردى ادالدىق جوق جەردە ەشقاشان ادىلدىك بولمايتىنىنا تاربيەلەۋ, ادىلەتتى قازاقستان قاعيداتىن قاپەردە ۇستاۋ كەرەگى تۋرالى مىندەتتەر ءبىلىم سالاسىنىڭ وكىلدەرىنە زور جاۋاپكەرشىلىك جۇكتەيتىنى ءسوزسىز. ادال ازامات تاربيەلەۋ – بارشامىزدىڭ ورتاق پارىزىمىز. سوندىقتان ۇزدىكسىز ءبىلىم بەرۋ جۇيەسىندە, ياعني, بالاباقشادان باستاپ, جوعارى وقۋ ورىندارىنا دەيىن بەرىلەتىن ساپالى ءبىلىم مەن تاعىلىمدى تاربيەدە ادال ازامات قالىپتاستىرۋ – باستى ماقسات بولۋ كەرەك. ول ءۇشىن ساپالى ءبىلىم بەرۋدى قامتاماسىز ەتۋ بويىنشا كرەاتيۆتى شەشىمدەر قابىلداۋعا قابىلەتتى, ۇشقىر ويلى وقىتۋشىلاردى وسى جۇمىستارعا جۇمىلدىرىپ, ولاردىڭ بىلىكتىلىگىن ارتتىرۋدى قولعا الۋ قاجەتتىگى سەزىلىپ وتىر.
قازىرگى تاڭدا ءبىلىمى مەن بىلىگى جوعارى ماماندار دايارلاۋ ماسەلەسى دە وزەكتى. ءبىلىم بەرۋ جۇيەسى ەڭبەك نارىعىنىڭ سۇرانىسىنا قاراي وزگەرىپ وتىرۋى كەرەك. بۇل ماسەلەگە مەملەكەت تە نازار اۋدارىپ وتىر. قازىر ەلىمىزدە تەحنيكالىق جانە جۇمىسشى ماماندار جەتىسپەيدى, سوندىقتان وسى سالالارعا قاتىستى ءبىلىم بەرۋدى جولعا قويۋ كەرەك. اسىرەسە وتە ماڭىزدى ماسەلە – وقۋ ورىندارى تۇلەكتەرگە جۇمىس بەرە الاتىن مەكەمەلەرمەن ۇزاق مەرزىمگە ارنالعان ارىپتەستىك ورناتۋ. بۇل باعىتتا حالىقارالىق تاجىريبەلەردى ۇتىمدى پايدالانساق, ءتيىمدى ناتيجەگە قول جەتكىزە الامىز.
سونداي-اق عىلىمعا نەگىزدەلگەن ەكونوميكالىق دامۋ ماسەلەسى دە كۇن تارتىبىندە تۇر. اتاپ ايتقاندا, اگروعىلىمدى دامىتۋ ماسەلەسىنە ەرەكشە كوڭىل بولگەن ءجون. مەملەكەت باسشىسى «ادىلەتتى قازاقستاننىڭ ەكونوميكالىق باعدارى» اتتى جولداۋىندا ۇلتتىق اگرارلىق عىلىمي-ءبىلىم بەرۋ ورتالىعىن زەرتتەۋ ءىسىنىڭ بارلىق ساتىسىن قامتيتىن اگروتەحنولوگيا حابىنا اينالدىرۋ, شەتەلدىڭ تانىمال اگرو-عىلىمي ورتالىقتارىمەن تولىققاندى عىلىمي-تاجىريبەلىك ىنتىماقتاستىق ورناتۋ كەرەگىن ايتتى. سونداي-اق ءبىلىم بەرۋ باعدارلامالارىن اۋىل شارۋاشىلىعى تالاپتارىنا بەيىمدەۋ كەرەكتىگىنە نازار اۋداردى. ءبىزدىڭ ويىمىزشا, ءبىلىم باعدارلامالارىندا تەوريالىق بىلىممەن قاتار, تاجىريبەلىك جاعىنا دا كوپ ءمان بەرىلۋى كەرەك.
ء«بىلىم مەن عىلىمدى ەكىنشى ورىنعا قويعان ەل ەشقاشان ەشبىر سالادا ءبىرىنشى ورىنعا كوتەرىلە المايدى» دەگەن قاعيدا ءون بويىندا قامتىلعان جولداۋدا ءبىلىم جانە عىلىمنىڭ ورنى ەرەكشە باعامدالعانىن استىن سىزىپ ايتقىمىز كەلەدى.
جولداۋدا ايتىلعان جاڭا باستامالار نەگىزىنەن قۋاتتى جانە ەكونوميكاسى دامىعان مەملەكەت قۇرۋدى كوزدەيدى. ەكونوميكالىق دامۋ باعىتتارىنىڭ نەگىزى – ادامداردىڭ سۇرانىسىنا ساي بولۋ كەرەكتىگىن ايقىنداپ بەردى. ال ەل ازاماتتارىنىڭ ءال-اۋقاتىنىڭ ارتۋى ساپالى ءبىلىم الۋعا بايلانىستى. ول ءۇشىن پەداگوگتەردىڭ قۇزىرەتتىلىگىن ارتتىرۋ جونىندە شارالار قابىلداۋ, ينتەرنەت جىلدامدىعىن ارتتىرۋ جانە تسيفرلىق ءبىلىم بەرۋ رەسۋرستارىنا تەگىن قول جەتكىزۋدى قامتاماسىز ەتۋ جونىندەگى جۇمىستى جانداندىرۋ كەرەك. جولداۋدا كورسەتىلگەن مىندەتتەر تولىق ورىندالۋى ءۇشىن اركىم ءوز سالاسى بويىنشا ايانباي اتسالىسۋعا ءتيىس. ەندەشە, ءبىلىم جانە عىلىم سالاسىنىڭ وكىلدەرى دە پرەزيدەنت العا قويعان بيىك ماقساتقا جەتۋ ءۇشىن بار كۇش-جىگەرىن جۇمسايتىنى كۇمان تۋدىرمايدى.
كارىمبەك قۇرماناليەۆ,
پرەزيدەنت جانىنداعى ۇلتتىق قۇرىلتاي مۇشەسى, ۇعا اكادەميگى