پرەزيدەنت قاسىم-جومارت توقاەۆ ءوز جولداۋىندا بيلىك پەن بيزنەسكە قاتىستى وتكىر ماسەلەلەرگە توقتالىپ, ەلىمىزدەگى قۇقىق قورعاۋ ورگاندارىنىڭ كاسىپكەرلەردى قۋدالاۋىن توقتاتۋ قاجەتتىگىن مالىمدەدى.
«تاعى ءبىر ماڭىزدى ماسەلە – كاسىپكەرلىكتىڭ بۇگىنگى احۋالى. بيلىك پەن بيزنەستىڭ اراسىندا سىندارلى ديالوگ بولۋى قاجەت. قازىرگى وتپەلى كەزەڭدە مەملەكەتتىك ورگانداردىڭ كەمشىلىككە جول بەرەتىنى, كەيدە اسىرا سىلتەيتىنى جاسىرىن ەمەس. سوندىقتان ەكونوميكالىق سيپاتتاعى كەيبىر زاڭ بۇزۋ ارەكەتتەرىن قىلمىس ساناتىنان الىپ تاستاۋ جۇمىسىن جالعاستىرۋ قاجەت», دەدى مەملەكەت باسشىسى.
پرەزيدەنت جولداۋدا اتاپ ايتقان جوعارىداعى جاعداي – نازاردان تىس قالدىرۋعا بولمايتىن ماسەلە. كاسىپكەرلىككە قولداۋ كورسەتۋ, سالانى رەتتەيمىز دەگەن جەلەۋمەن جاسالاتىن قىسىمدى ازايتۋ جانە باسەكەلەستىكتى دامىتۋ ماسەلەلەرىن مۇقيات تالقىلاۋ قاجەت.
وسى ورايدا, ەل پرەزيدەنتى جۋىق ارادا ەلىمىزدىڭ بيزنەس وكىلدەرىمەن ارنايى كەزدەسۋ وتكىزەتىنىن ايتتى. بۇل ءىس-شارانىڭ شاعىن جانە ورتا كاسىپكەرلىك سالاسىنداعى كەيبىر تۇيتكىلدى ماسەلەلەردىڭ تەز شەشىمىن تابۋىنا تيگىزەر پايداسى كوپ بولادى دەپ سانايمىن.
ءاليا مۇقاشەۆا,
«اتامەكەن» ۇلتتىق كاسىپكەرلەر پالاتاسى وڭىرلىك فيليالىنىڭ بيزنەس-ومبۋدسمەنى