پرەزيدەنت قاسىم-جومارت توقاەۆتىڭ پارلامەنت پالاتالارىنىڭ بىرلەسكەن وتىرىسىندا جولداعان بيىلعى جولداۋىندا ناقتى تاپسىرمالار مەن مىندەتتەر كورسەتىلىپ, ورىندالۋىنا قىسقامەرزىم بەلگىلەندى.
ماڭىزدى قۇجاتتا ەكونوميكا سالاسىنا كوپ كوڭىل ءبولىندى. ەكونوميكانىڭ دامۋى الەۋمەتتىك سالانىڭ جاقسارۋىنا تىكەلەي بايلانىستى. سوندىقتان وسى باعىتقا بارىنشا ءمان بەرىلدى. سونىڭ ىشىندە كولىك تاسىمالى, لوگيستيكاعا ەرەكشە توقتالدى. قانداي پورتتار مەن تەمىر جولداردىڭ سالىناتىنىن انىقتاپ ايتتى.
اتوم ەلەكتر ستانساسىنىڭ قۇرىلىسىن رەفەرەندۋم ارقىلى شەشۋ دە دۇرىس قادام. بىراق ءوز باسىم ونىڭ سالىنۋىنا قارسى ەمەسپىن. ويتكەنى بىزگە ەلەكتر ەنەرگياسى كەرەك. شەتەلدىك ينۆەستورلار كەلسە دە ءبىرىنشى قۋات كوزىنە قارايدى. اەس قاراپايىم تۇرعىندارعا دا پايدالى. ارزان ەلەكتر ەنەرگياسى بولادى. ارينە, قاۋىپسىزدىك الدىڭعى ورىندا تۇراتىنى بەلگىلى.
سۋ ماسەلەسىنىڭ وزەكتى ەكەنى باياندالدى. وسىعان بايلانىستى جاڭا مينيسترلىكتىڭ قۇرىلاتىنى قۇبا-قۇپ بولعان. راسىندا دا سۋ ماسەلەسىندە كورشى ەلدەرمەن جاقسى قارىم-قاتىناستى ۇزبەي پروبلەمانى بىرىگىپ شەشكەن ءجون. سونىمەن بىرگە كۇندەلىكتى تۇرمىستا, اۋىل شارۋاشىلىعىندا سۋدى ۇنەمدەپ پايدالانعان دۇرىس. پرەزيدەنت ايتقانداي, تاريفتىك ساياساتتى دا ادىلەتتى جۇرگىزگەن ابزال. البەتتە تاريفتەن تۇسكەن قاراجات ينفراقۇرىلىمدى جاڭارتۋعا جۇمسالادى. الايدا حالىق ءتاريفتىڭ نە ءۇشىن قىمباتتاعانىن تۇسىنبەي جاتادى. سوندىقتان مونوپولياعا قارسى اگەنتتىكپەن تاريف كەلىسىلگەن سوڭ ونى حالىق اراسىندا ءتۇسىندىرۋ جۇمىستارى جۇرۋگە ءتيىس. مەملەكەت باسشىسى ادىلەتتى تاريف ساياساتى تۋرالى وسىنى مەڭزەپ وتىر.
سونداي-اق ەلىمىزدە شەتەلدىك 3 كوممەرتسيالىق بانك پايدا بولاتىنى كوڭىلگە قوندى. نەسى بار, سول ارقىلى وتاندىق بانك سالاسىندا باسەكەلەستىك كۇشەيىپ, پايىزداردىڭ تومەندەۋىنە الىپ كەلسە, جامان با؟!
شىمكەنتكە قاتىستى اۋەجايدىڭ لوگيستيكالىق الەۋەتىن ارتتىرۋ جونىندە ءسوز قوزعالدى. بۇگىنگى تاڭدا اۋەجايدا جەكە ينۆەستور ەسەبىنەن جاڭا تەرمينال سالىنىپ جاتىر. ونىڭ ۇستىنە اەروپورت ماڭىندا ءىرى لوگيستيكالىق ورتالىق بار. بۇكىل كەلگەن جۇك سوندا ساقتالادى. سول تاۋاردى دىتتەگەن جەرىنە جەتكىزۋ ماسەلەسى العا شىعىپ وتىر. پرەزيدەنت تاپسىرماسىنا وراي بۇل ماقساتتى جۇزەگە اسىرۋعا ءتيىسپىز. سونىمەن بىرگە كرەاتيۆتى ەكونوميكا استانا مەن الماتى قالالارىنان بولەك ءۇشىنشى مەگاپوليستە دە جاقسى دامىعانى ءسوز بولدى. ءيا, مۇنىمەن تولىق كەلىسەمىن. وسى كۇندە جاستاردىڭ, جەكە ازاماتتاردىڭ بيزنەس يدەياسىن ىسكە اسىرۋ بويىنشا شاھاردا قولداۋ تەتىكتەرى بارشىلىق. بيزنەسكە ارنالعان ۇكىمەت سەكىلدى ۇيىمدى اتاۋعا بولادى. بۇدان بولەك جوعارى وقۋ ورىندارىندا ستۋدەنتتەردىڭ بيزنەس جوبالارىن پاتەنتتەۋ, سەرتيفيكاتتاۋ بويىنشا دا كوپ جۇمىس قولعا الىنعان.
پرەزيدەنت بۇعان قوسا ءوز جولداۋىندا كاسىپكەرلىكتىڭ بۇگىنگى احۋالىنا دا ارنايى توقتالدى. بيلىك پەن بيزنەس اراسىندا سىندارلى ديولوگ ورناۋى قاجەتتىگىن اتاپ كورسەتتى. «قازىرگى وتپەلى كەزەڭدە مەملەكەتتىك ورگانداردىڭ كەمشىلىككە جول بەرەتىنى, كەيدە اسىرا سىلتەيتىنى جاسىرىن ەمەس. سوندىقتان ەكونوميكالىق سيپاتتاعى كەيبىر زاڭ بۇزۋ ارەكەتتەرىن قىلمىس ساناتىنان الىپ تاستاۋ جۇمىسىن جالعاستىرۋ قاجەت» دەدى مەملەكەت باسشىسى اتالعان پروبلەمانى نازارعا الۋ اسا قاجەت.
باحادىر نارىمبەتوۆ,
شىمكەنت قالالىق
ءماسليحاتىنىڭ توراعاسى