جولداۋدىڭ نەگىزگى ماقساتى ەلىمىزدەگى جاعىمدى ساياسي جاڭعىرۋلاردى ەندى ەكونوميكالىق وزگەرىستەرمەن ۇلاستىرۋ دەپ ويلايمىن. ال ەكونوميكانىڭ دامۋى حالىقتىڭ ءال-اۋقاتىن ودان ءارى جاقسارتاتىنى ءسوزسىز.
جولداۋدا ەل ەكونوميكاسىن دامىتۋعا ناقتى باعىتتار ايقىندالىپ, جۇزەگە اسىرۋ جولدارى ايتىلدى. اتاپ ايتساق, وڭدەۋ سالاسى, تۋريزم, ورتا كاسىپكەرلىكتى دامىتۋ, ىشكى نارىقتى قورعاۋ, گەولوگيالىق بارلاۋ شارالارىن جەتىلدىرۋ, قورعانىس-ونەركاسىپ كەشەنىن دامىتۋ, اگروونەركاسىپتەگى وڭدەلگەن ءونىم ۇلەسىن ۇلعايتۋ, شاعىن شارۋاشىلىقتاردى قولداۋ, اگروعىلىمدى دامىتۋ, ينفراقۇرىلىم, ەنەرگەتيكالىق قاۋىپسىزدىك, سۋ تاپشىلىعىن الدىن الۋ, كولىك-لوگيستيكا جانە IT, جاساندى ينتەللەكت, كرەاتيۆتى يندۋستريا سالالارىن دامىتۋ, حالىقتىق IPO جۇمىستارىن تەزدەتۋ جانە ماكروەكونوميكالىق ساياساتتى جاڭارتۋ.
ايماقتاردىڭ بيۋدجەت ماسەلەسىندەگى دەربەستىگىن ارتتىرۋ, قوسىمشا قۇن سالىعى مەن وزگە دە سالىقتاردان تۇسەتىن كىرىستىڭ ءبىر بولىگىن وڭىرلەرگە بەرۋ, اۋدان اكىمدەرىنە جەرگىلىكتى بيۋدجەتتى باسقارۋ قۇقىعىن بەرۋ, جەرگىلىكتى بيۋدجەتكە جينالاتىن سالىققا قاتىستى جەڭىلدىكتەردى انىقتاۋ قۇقىعىن ايماقتارعا بەرۋ وڭىرلەردىڭ دامۋىنا سەرپىلىس بەرەرى انىق.
ال اتوم ەلەكتر ستانساسىن سالۋ نەمەسە سالماۋ ماسەلەسىن جالپىۇلتتىق رەفەرەندۋم ارقىلى شەشۋ حالىقتىڭ ماڭىزدى ماسەلەردى شەشۋدەگى ءرولىنىڭ ارتقاندىعىن كورسەتەدى.
بەس جاستان اسقان بالالارعا ارنالعان «كەلەشەك» اتتى بىرىڭعاي ەرىكتى جيناقتاۋ جۇيەسىنىڭ ەنگىزىلۋى, «ۇلتتىق قور – بالالارعا» جوباسى, زياندى ەڭبەك جاعدايىندا ۇزاق جۇمىس ىستەگەن ادامدارعا زەينەت جاسىنا تولعانعا دەيىن 55 جاستان باستاپ ارناۋلى الەۋمەتتىك تولەمنىڭ تولەنۋى, ەڭ تومەنگى جالاقى مولشەرىنىڭ بىرتىندەپ ءوسۋى الەۋمەتتىك ماسەلەلەردى ودان ءارى جاقسارتۋ كەپىلىنە اينالماق.
امانگەلدى تولەمىسوۆ,
سەنات دەپۋتاتى