جۇمىس بەرۋشىلەر ونلاين-جارمەڭكەلەر ارقىلى وزدەرىنە قاجەتتى مامانداردى ونلاين فورماتتا تابا الادى, دەپ حابارلايدى Egemen.kz قر ەڭبەك جانە حالىقتى الەۋمەتتىك قورعاۋ مينيسترلىگىنىڭ ءباسپاسوز قىزمەتىنە سىلتەمە جاساپ.
«جارمەڭكەگە قاتىسۋ ءۇشىن جۇمىس بەرۋشىلەر دە, ىزدەنۋشىلەر دە Tanda.enbek.kz پورتالىندا تىركەۋدەن ءوتۋى قاجەت. ونلاين-جارمەڭكەلەر قازاقستاننىڭ بارلىق وڭىرىندە وتەدى. تولىق اقپارات پەن جارمەڭكەلەردى وتكىزۋ كەستەسى Tanda.enbek.kz پورتالىندا جاريالانعان», دەپ جازىلعان ءباسپاسوز حابارلاماسىندا.
جۇمىس ىزدەپ جۇرگەن ادام ءوزىنىڭ تۇيىندەمەسىن جۇمىس بەرۋشىگە جىبەرىپ قانا قويماي, سونىمەن قاتار ونلاين-چات ارقىلى HR ماماندارىمەن ماسەلەلەردى تالقىلاپ, بەينەجازبا تۇرىندە سۇحباتتاسا الادى.
ايتا كەتەيىك, وسى ۋاقىتقا دەيىن Tanda.enbek.kz پورتالىندا بىرقاتار ونلاين-جارمەڭكە وتكىزىلىپ, وعان 110 جۇمىس بەرۋشى مەن 3 مىڭنان استام جۇمىس ىزدەۋشى قاتىستى.