قورعانىس مينيسترلىگى ارميانىڭ بارلىق اسپەكتىسىن دامىتۋ جانە اسكەرلەردى تەحنيكالىق جاراقتاندىرۋ شارالارىن كەشەندى تۇردە جۇزەگە اسىرىپ كەلەدى. اۆياتسيالىق پارك تە جىل سايىن جاڭا تەحنيكامەن تولىعۋدا. استانا قالاسىنىڭ اۆيابازاسىنا يسپاندىق Airbus Defence and Space كومپانياسى شىعارعان جۇك كوتەرگىشى ورتاشا س-295مW اسكەري-كولىك ۇشاعى كەلىپ جەتتى, دەپ حابارلايدى Egemen.kz اتالعان مينيسترلىكتىڭ ءباسپاسوز قىزمەتىنە سىلتەمە جاساپ.
69 اسكەري قىزمەتشى جانە 8800 كەلىگە دەيىن جۇك تاسىمالداۋعا ارنالعان اۋە كەمەسى ءوز ساناتىنداعى ەڭ سەنىمدى ءارى ۇنەمدىلەردىڭ ءبىرى بولىپ كەلەتىن Pratt & Whitney PW127G شىعارعان ەكى ءتۋربوۆينتتى قوزعالتقىشپەن جابدىقتالعان. س-295مW ۇشاعى ەڭ قولايسىز اۋا-رايى جاعدايىندا دا تاپسىرمالاردى ورىنداۋعا مۇمكىندىك بەرەتىن زاماناۋي ۇشۋدى باسقارۋشى جۇيەسىمەن جانە پيلوتتىق-ناۆيگاتسيالىق جابدىقتارمەن جاساقتالعان.
قىسقا جانە ورتا ءىس-قيمىل راديۋسىنداعى ۇشاقتىڭ ارتقى جاعىندا پاندۋسى بار جۇك كابيناسىمەن جابدىقتالعان. اۋە كەمەسى جەكە قۇرامدى تاسىمالداۋعا, دەسانتتاۋعا جانە جۇكتەردى لاقتىرۋعا, اۋەدە باقىلاۋ جۇرگىزۋگە جانە مەديتسينالىق ەۆاكۋاتسيالاۋعا ارنالعان.
«اسكەري اۆياتسيانىڭ مۇمكىندىكتەرىن ارتتىرۋ شەڭبەرىندە 19132 اسكەري بولىمىنە س-295مW جاڭا اسكەري-كولىكتىك ۇشاق كەلىپ ءتۇستى. تەحنيكالىق سيپاتتامالارى بويىنشا بۇل ءوز ساناتىنداعى ۇشاقتاردان وتىن شىعىنى جاعىنان ەڭ ءتيىمدى, سەنىمدى جانە ۇنەمدى ۇشاقتاردىڭ ءبىرى», دەپ ءتۇسىندىردى اۋە قورعانىسى كۇشتەرى قارۋ-جاراق باس باسقارماسىنىڭ شتاب باستىعى پولكوۆنيك دميتري فەدورچەنكو.
اتالعان ۇلگىدەگى ۇشاقتى پايدالانۋ ماقساتىندا ۇشقىشتار مەن ينجەنەرلىك-تەحنيكالىق قۇرام يسپانيانىڭ سەۆيليا قالاسىنداعى Airbus Defence and Space وقۋ-جاتتىعۋ ورتالىعىندا وقىتىلدى.
مەملەكەتتىك-قورعانىس تاپسىرىسى شەڭبەرىندە جاسالعان شارتقا سايكەس ۇشاقتى قابىلداۋ ون كۇن ىشىندە جۇرگىزىلمەك. سودان كەيىن ول مەملەكەتتىك اۋە كەمەلەرىنىڭ تىزىلىمىنە ەنگىزىلىپ, پايدالانۋعا بەرىلەدى.