بۇگىن اباي قۇنانباي ۇلىنىڭ تۋعانىنا 178 جىل تولدى. ۇلى اقىننىڭ ەسىمى الەمدە سالتانات قۇرعاندىعىن بىرنەشە ەلدەردەگى ويشىلدىڭ قۇرمەتىنە ارنالعان كوشەلەر مەن ەسكەرتكىشتەر اڭعارتسا كەرەك, دەپ حابارلايدى Egemen.kz.
اباي ەسىمىمەن اتالىناتىن كوشەلەر: تاجىكستاننىڭ باستى شاھارى دۋشانبەدە, ازەربايجان استاناسى باكۋدە, ءۇندىستاننىڭ باستى شاھارى دەليدە, ۋكراينانىڭ كيەۆ, كراماتورسك, دنەپروپەتروۆسك قالالارىندا, ەگيپەت استاناسى كايردە, گەرمانيا استاناسى بەرليندە, وزبەكستاننىڭ باس شاھارى تاشكەنتتە, قىرعىزستان استاناسى بىشكەكتە, رەسەيدىڭ التاي رەسپۋبليكاسىنداعى كوش-اعاش اۋىلىندا, تۇرىكمەنستاننىڭ اكداش اۋىلىندا بار.
ەستەرىڭىزدە بولسا, 2022 جىلعى 26 مامىردا بىشكەكتە اباي ەسكەرتكىشى اشىلدى. ونىڭ اشىلۋ سالتاناتىنا قازاقستان پرەزيدەنتى قاسىم-جومارت توقاەۆ پەن قىرعىزستان پرەزيدەنتى سادىر جاپاروۆ قاتىسقان.
مەملەكەت باسشىسى بۇل كۇندى قازاق پەن قىرعىزدىڭ رۋحاني ومىرىندەگى ەرەكشە كۇن رەتىندە باعالاپ, بىشكەك تورىندە اباي ەسكەرتكىشىنىڭ بوي كوتەرۋىن قىرعىز ەلىنىڭ قازاق حالقىنا دەگەن ايرىقشا قۇرمەتىنىڭ بەلگىسى دەپ اتاپ ءوتتى.
«اعايىن ەلدەردىڭ تامىرلاستىعىن كەزىندە اباي دا ايتقان. ۇلى اقىن قازاقتىڭ تاريحىنا توقتالعان كەزدە قىرعىز باۋىرلاردى ەرەكشە اتاپ وتكەن. ول «ەش قازاق قىرعىز بەن قازاقتىڭ ءبىر تۇقىمداس ەكەنىنە تالاسپايدى» دەگەن. شىن مانىندە, ەكى ۇلتتىڭ تەگى مەن ءتىلى ءبىر, جۇرەگى مەن تىلەگى ءبىر. ايىر قالپاقتى اعايىنعا ءبىزدىڭ ىقىلاسىمىز قاشاندا ەرەكشە. كوپ ۇزاماي ەلىمىزدە ماناس ەسكەرتكىشى بوي كوتەرەدى. بۇل ەسىم قازاق اراسىندا وتە تانىمال. ايگىلى ماناسقا قۇرمەتىمىز ەرەكشە. ماناستانۋ عىلىمىنىڭ نەگىزىن قالاعان شوقان ءۋاليحانوۆ ەكەنىن ەسكە سالعىم كەلەدى. «ماناس» جىرىنىڭ تاعدىرى تارتىسقا تۇسكەن كەزدە وعان مۇحتار اۋەزوۆ اراشا تۇسكەنىن بىلەمىز», دەپ ەدى قازاقستان پرەزيدەنتى.
سونداي-اق اباي ەسكەرتكىشتەرى ۆەنگريادا استاناسى بۋداپەشتتە, قىتاي استاناسى بەيجىڭدە, فرانتسيانىڭ رەنن قالاسىندا, بەلارۋستىڭ ۆيتەبسك قالاسىندا, وزبەكستان استاناسى تاشكەنتتە, رەسەي استاناسى ماسكەۋدە بار. اقىننىڭ ەسكەرتكىشى ماسكەۋدەگى قازاقستاننىڭ رەسەيدەگى ەلشىلىگى ماڭىندا ورناتىلعان. سونىمەن بىرگە اباي ەسكەرتكىشى يران استاناسى تەگەراندا بار, وعان قوسا, يران ۇلتتىق كىتاپحاناسىندا دا ابايدىڭ ءمۇسىنى قويىلعان.
1995 جىلى 15 اقپاندا الەمنىڭ ورتالىعى سانالاتىن لوندون قالاسىندا بەلگىلى پروزاشى روللان سەيسەمباەۆتىڭ باستاماسىمەن اباي ءۇيى اشىلدى.