بەكىرە بالىعىن ءوسىرۋمەن اينالىساتىن فەرما – ەلىمىزدىڭ ۇدەمەلى يندۋستريالىق-يننوۆاتسيالىق باعدارلاماسىنىڭ جەمىسى. مەملەكەتتىڭ قولداۋىنا سەنىپ-سۇيەنگەن جەكە كاسىپكەر تۇرسىنگۇل جاقىپوۆا جەڭىلدەتىلگەن نەسيە الىپ, تۇبەكتە تۇڭعىش بەكىرە وسىرەتىن كاسىپورىن اشۋعا بەل بۋىپتى. جوبا ءبىراز پىسىقتالىپ, قۇرىلىس جۇمىستارى 4 جىل بويى جۇرگەن, الدىن الا ماماندارى وقىپ, تاجىريبەدەن وتكەن كاسىپورىندا رەسەيدەگى جانە اتىراۋداعى بەكىرە زاۋىتتارىنان اكەلىنگەن 3,5 مىڭداي شاباقتار ارنايى جاسالعان اكۆاريۋمدارعا جىبەرىلدى.
شاباقتاردىڭ ەڭ كىشىسىنىڭ سالماعى 5 گرامدى قۇرايدى. كۇنىنە تاڭعى ساعات 6-دان باستاپ تۇنگى 12-گە دەيىن بالىقتاردىڭ كولەمىنە قاراي لايىقتى شامادا 10 رەت تاماقتاندىرىلاتىن كاسىپورىنداعى كۇتىم مەن باپ كەلىسسە شاباقتار ەندى ەكى جىلدان كەيىن سالماعى 3 كيلو بولاتىن ءىرى بالىققا اينالادى. باپتىڭ كەلىسىپ, بۇگىنگى شاباقتاردىڭ ەرتەڭ-اق ءىرى بالىققا اينالاتىندىعىنا كاسىپورىننىڭ وزىق ۇلگىدەگى قۇرالدارمەن جابدىقتالۋى سەندىرسە, لايىقتى كۇتىمنىڭ بولۋىنا بالىقتاردى جەمدەپ, باپتاپ-ءوسىرۋ جاي-جاپسارىن ىرگەلى كاسىپورىندارعا بارىپ ارنايى وقىپ كەلگەن ماماندار جاۋاپكەرشىلىگى ۇمىتتەندىرەدى.
جاڭا فەرمادا 25 اۋىل تۇرعىنى جۇمىسقا تارتىلعان. وڭىردەگى بالىق شارۋاشىلىعىن دامىتۋعا جاسالعان العاشقى قادامعا ارنايى كەلىسىم-شارت نەگىزىندە رەسەيلىك جانە وتاندىق عالىمدار كومەك پەن كەڭەس بەرۋدە. «جول كارتاسى» باعدارلاماسى اياسىندا ينجەنەرلىك ينفراقۇرىلىمىن جۇرگىزىپ, گاز بەن توك تارتۋعا, سونداي-اق جول ماسەلەسىن شەشۋگە مەملەكەت تاراپىنان كومەكتەر بەرىلگەن. قۇنى 582 ميلليون تەڭگە تۇراتىن جوبا قۋاتىنا ەنگەن سوڭ, جىلىنا 60 تونناداي بالىق ەتى مەن 8 توننا قارا ۋىلدىرىق بەرەدى دەپ كوزدەلۋدە.
مامانداردىڭ ايتۋىنشا, ءبىر كيلولىق بالىقتار ءبىر جىلدان سوڭ, ال ۋاق شاباقتار ەكى جىلدان كەيىن ءونىم بەرە باستايدى. ال, قارا ۋىلدىرىق 4 جىلدان كەيىن الىنادى. سۋ جانۋارىن قولدا ءوسىرۋ وڭاي ەمەس, الايدا ءىس اياقتان تۇرىپ جاتسا, بەكىرە تۇقىمداس بالىقتىڭ بىرنەشە ءتۇرىن ءوسىرۋ, سول ارقىلى ءونىم كولەمىن ارتتىرىپ, وتاندىق ءونىمدى ىشكى نارىققا شىعارىپ قانا قويماي, ەۋرازيالىق ەكونوميكالىق وداق اياسىندا وزگە ەلدەرگە ساتۋ جوسپارلانعان.
– ەلباسىنىڭ باستاماسىمەن قولعا الىنعان ۇدەمەلى يندۋستريالىق-يننوۆاتسيالىق دامۋ باعدارلاماسى ۇلكەن شارۋالارعا قوزعاۋ سالىپ, تىڭ جوبالاردىڭ تۇساۋىن كەستى. ەلىمىزدە قانشاما جاڭا كاسىپورىندار ىسكە قوسىلىپ, وتاندىق ءونىم وندىرۋگە ءوز ۇلەستەرىن قوسۋدا. قازىر ەڭبەك ەتەمىن, ءوز كاسىبىمدى جۇرگىزەمىن دەگەن تالاپ يەلەرىنە جول اشىق. مەملەكەت تاراپىنان جۇيەلى جۇمىس باعدارلامالارى ءجيى ۇسىنىلىپ, كومەكتەر بەرىلۋدە. مەن وسى مۇمكىندىكتى پايدالانۋشىلاردىڭ ءبىرىمىن, – دەيدى كاسىپورىن باسشىسى ت.جاقىپوۆا.
تولىق قۋاتىندا جۇمىس ىستەۋگە ساقاداي ساي تۇرعان كاسىپورىننىڭ ءونىمدەرىنە دۇكەندەر مەن مەيرامحانالاردان سۇرانىس قازىردەن باستاپ تۇسۋدە. دەمەك, شاباقتار الىپ بالىققا اينالىپ, جوبا الىپ قۋاتقا ەنەتىن كۇن الىس ەمەس.
گۇلايىم شىنتەمىرقىزى,
«ەگەمەن قازاقستان».
ماڭعىستاۋ وبلىسى.