سىرتقى ىستەر ءمينيسترى ەرلان ىدىرىسوۆ قىرعىزستانعا رەسمي ساپارى شەڭبەرىندە سول ەلدىڭ سىرتقى ساياسات مەكەمەسىنىڭ باسشىسى ەرلان ابدىلداەۆپەن كەزدەستى, دەپ حابارلادى وسى ۆەدومستۆونىڭ ءباسپاسوز قىزمەتى.
كەلىسسوزدەر بارىسىندا قازاقستان-قىرعىزستان ەكىجاقتى ىنتىماقتاستىعىنىڭ قازىرگى جاعدايى مەن مۇمكىندىكتەرى, وڭىرلىك ىقپالداستىق پەن حالىقارالىق كۇن ءتارتىبىنىڭ وزەكتى ماسەلەلەرى قاراستىرىلدى.
ساۋدا-ەكونوميكالىق, ينۆەستيتسيالىق, اۋىلشارۋاشىلىق جانە سۋ-ەنەرگەتيكالىق سالالارداعى ەكىجاقتى ىنتىماقتاستىقتى كەڭەيتۋ ءمۇمكىندىكتەرىن تالقىلاۋ ەرەكشە نازارعا الىندى. «ەلدەرىمىزدىڭ ەكونوميكالىق ىنتىماقتاسۋىنا زور ءمۇمكىندىكتەر بار. بىزگە ساۋدا-ەكونوميكالىق قاتىناستاردى تەرەڭدەتىپ, ءوزارا ساۋدانى بارىنشا ىنتالاندىرۋ قاجەت», دەپ اتاپ ءوتتى قازاقستان سىرتقى ساياسات ۆەدومستۆوسىنىڭ باسشىسى.
سىرتقى ىستەر مينيسترلەرى وڭىرلىك جانە حالىقارالىق ۇيىمدار شەڭبەرىندەگى مەملەكەتتەردىڭ كوپجاقتى ىقپالداستىعىنىڭ دەڭگەيى مەن مازمۇنىنا قاناعات ءبىلدىردى. «قازاقستان مەن قىرعىزستاننىڭ حالىقارالىق ارەناداعى سەرىكتەستىك قاتىناستارىن جانە ەكى مەملەكەتتىڭ باستامالارىنا ءوزارا قولداۋ كورسەتەتىنىن اتاپ وتكىم كەلەدى», – دەدى ە.ىدىرىسوۆ.
كەلىسسوزدەردىڭ باستى قورىتىندىسى ەكى ەل اراسىنداعى ساياسي سۇحباتتى نىعايتۋعا مۇمكىندىك بەرەتىن قازاقستان رەسپۋبليكاسى سىرتقى ىستەر مينيسترلىگى مەن قىرعىز رەسپۋبليكاسى سىرتقى ىستەر مينيسترلىگى اراسىنداعى 2014-2015 جىلدارعا ارنالعان ىنتىماقتاستىق باعدارلاماسىنا قول قويىلۋى بولدى.
ساپارى شەڭبەرىندە ەرلان ىدىرىسوۆتىڭ قىرعىز رەسپۋبليكاسىنىڭ پرەزيدەنتى المازبەك اتامباەۆپەن كەزدەسۋى جانە ورتالىق ازيا ەلدەرى مەن جاپونيا سىرتقى ىستەر مينيسترلەرىنىڭ كەزدەسۋىنە قاتىسۋى جوسپارلانعان.