قازاقتا «اۋىلىنا قاراپ ازاماتىن تانى» دەگەن بار, ازاماتتار تۋعان ءۇيىن قامداعانداي اۋىلىنىڭ كەم-كەتىگىن تۇگەندەپ, تۇرمىسىن بازارلى ەتۋگە جۇمىستانسا, شالعاي اۋىلدان دا بەرەكە تارقامايدى. وسىنداي ونەگەلى ءىس جۋىردا ماڭعىستاۋداعى تۇششىقۇدىق اۋىلىندا جۇزەگە استى.
تۇششىقۇدىق – اۋىزبىرشىلىككە ۇيىعان, قازىنالى قارتى, جالىندى جاسى بار, وزدەرى قالىپتاستىرعان جاقسى ىسكە جۇرت بولىپ جۇمىلا كەتۋدى ساباقتاسقان سالتقا اينالدىرعان اۋىل. «قايدا باراسىڭ؟» دەگەنگە, «ىنتىماققا بارامىن» دەپ جاۋاپ بەرگەن باقىتتىڭ جاۋابى مەن تاڭداۋى راس-اق, ىنتىماعى جاراسقان اۋىلدىڭ ىرىسى تارقاماعان, اۋىل توپىراعىنان ەل جۇگىن ارقالاعان «سەن تۇر, مەن اتايىن» اتان جىلىك ازاماتتار تۇلەدى.
الىستا تۇرىپ, ىرگەلى جۇمىستىڭ تىزگىنىن ۇستاعان نەمەسە كاسىبىنىڭ تاسىن ورگە دومالاتقان تۇششىقۇدىق تۇلەكتەرى تۋعان اۋىلىنا قايىرىلىپ, بار-جوعىن تۇگەندەۋگە مۇرىندىق بولدى. ولار اۋىلدان سپورت كەشەنىن سالۋدى قولعا العان بولاتىن, اعالاردىڭ جاقسى باستاماسىن ءىلىپ اكەتكەن اۋىل جىگىتتەرى – 1965-1996 جىل ارالىعىندا تۋعاندار بىلەك پەن تىلەك قوسىپ, ارقايسىسى ءوز شاما-شارقىنشا قۇرىلعان «تۇششىقۇدىق» قورىنا قارجى سالدى. بۇدان اۋىل تۇرعىندارى دا تىس قالماي, مۇمكىندىگىنشە قارجىلاي ۇلەستەرىن قوسقان. سونداي-اق, «ماڭعىستاۋمۇنايگاز» اق جانە «قاراجانباسمۇنايگاز» اق كاسىپورىندارى دا قارجىلاي دەمەۋشىلىك جاساعان.
ناتيجەسىندە مەكتەپ اۋلاسىنان ءوز الدىنا بولەك عيمارات بولىپ ەڭسەلى سپورت كەشەنى بوي كوتەردى. بوس ۋاقىتىن ماڭىزدى ۇيىمداستىرىپ, سالاماتتى ءومىر سالتىن ۇستانامىن دەگەن كەز كەلگەن اۋىل تۇرعىنىنا ەسىگى اشىق سپورتزالدا ۆولەيبول, باسكەتبول, فۋتبول ويناۋلارىنا تولىق مۇمكىندىك بار.
– بوكس, قازاقشا كۇرەس تۇرلەرىنەن جاتتىقتىراتىن ارنايى ماماندى كەلىسىپ, اۋىلعا اپارۋعا جۇمىستانۋدامىز. ءبىزدىڭ بالا كەزىمىزدە اۋىلدا مۇنداي سپورت زالدارى تەك ارمان بولاتىن, ول اۋىلدارداعى قازىرگى بالالاردىڭ دا ارمانى ەكەنىن بىلەمىز. سوندىقتان, اۋىلداستارىمىزعا كومەك بولسىن دەدىك. سپورتزالدا جاتتىعۋ تەگىن, دەيدى اۋىل پەرزەنتى, قۇرىلىس جۇمىستارىن جۇرگىزگەن, ءارى وسى ىسكە تۇلەك-دەمەۋشى رەتىندە قوماقتى قارجى سالعان «اليانس لتد» جشس ديرەكتورى اسقار كەرەلباەۆ.
سپورت كەشەنىنىڭ «انگار» بولىگى 30ح18=540 شارشى مەتر. جاڭا عيماراتتا سپورت باپكەرلەرى وتىراتىن, ۇيىرمەگە قاتىسۋشى سپورتشىلار كيىنىپ-شەشىنەتىن, جۋىناتىن ورىندارى بار. كەشەننىڭ سىرتقى اۋلاسىن اباتتاندىرۋعا جانە بولاشاقتا جازعى سپورت الاڭىن سالۋعا 2500 شارشى مەتر جەر بولىنگەن, كەشەن لايىقتى جۇمىس جاساۋى ءۇشىن جەرگىلىكتى مەكتەپ بالانسىنا بەرىلدى. اۋىل ازاماتتارىنىڭ ءوز كۇشتەرىمەن سالىنعان كەشەننىڭ اشىلۋى ەرەكشە اتالىپ ءوتتى. ىزگى ىسكە ۇيىتقى بولعان ازاماتتارعا جەرگىلىكتى اكىمدىك پەن «نۇر وتان» پارتياسى اتىنان العىس ايتىلىپ, قۇرمەت كورسەتىلدى.
– پارتيانىڭ وبلىستىق فيليالى «ءبىزدىڭ اۋىل» جوباسى اياسىندا اۋىلدان شىققان كاسىپكەرلەردىڭ, مەكتەپ تۇلەكتەرىنىڭ, قاراپايىم تۇرعىنداردىڭ تۋعان اۋىلىن گۇلدەندىرۋ جولىنداعى باستامالارىنا ءاردايىم قولداۋ ءبىلدىرىپ كەلەدى. جوبا اياسىندا تۇششىقۇدىق تۇلەكتەرىنىڭ تۋعان اۋىلىندا سپورت كەشەنىن سالۋ جونىندەگى باستاماسى قازىر وبلىس جاستارىنىڭ قولداۋىنا يە بولىپ وتىر. بۇل باستاما باسقا اۋىلداردا دا جالعاسىن تابادى دەپ سەنەمىز, دەدى «نۇر وتان» پارتياسى ماڭعىستاۋ وبلىستىق فيليالىنىڭ ءبولىم باسشىسى گ.نۇراحمەتحانوۆا.
ءدال وسى كۇنى تۇششىقۇدىققا كورشى شەبىر اۋىلىندا دا سپورت كەشەنى پايدالانۋعا بەرىلدى. بۇل – «ماڭعىستاۋمۇنايگاز» اق-تىڭ اۋىل تۇرعىندارىنا تارتۋى بولاتىن.
گۇلايىم شىنتەمىرقىزى,
«ەگەمەن قازاقستان».
ماڭعىستاۋ وبلىسى.