بۇگىن ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتى مەن «QazBioPharm» ۇلتتىق حولدينگى» اق ىنتىماقتاستىق تۋرالى كەلىسىمگە قول قويدى. قۇجات كادرلاردى دايارلاۋ ءۇشىن بىرلەسكەن ءبىلىم بەرۋ جوبالارىن ىسكە اسىرۋدى جانە بيولوگيا, بيوتەحنولوگيا, ۆيرۋسولوگيا, ەكولوگيا, گەنەتيكا جانە باسقا دا سالالاردا عىلىمي زەرتتەۋلەر جۇرگىزۋدى كوزدەيدى, دەپ حابارلايدى Egemen.kz.
كەلىسىمگە ەۇۋ رەكتورى ەرلان سىدىقوۆ جانە «QazBioPharm «ۇلتتىق حولدينگى» اق باس ديرەكتورى كۇنسۇلۋ زاكاريا قول قويدى. تاراپتار ءبىلىم بەرۋ, عىلىمي-تەحنيكالىق جانە يننوۆاتسيالىق قىزمەت سالاسىنداعى ىنتىماقتاستىقتى دامىتۋعا نيەتتى.
«تاياۋدا مەملەكەت باسشىسى پارلامەنتتىڭ ءبىرىنشى سەسسياسىنىڭ اشىلۋىندا وتاندىق ەكونوميكانىڭ دامۋى عىلىمنىڭ جەتىستىكتەرىنە نەگىزدەلۋى ءتيىس ەكەنىن اتاپ ءوتتى. بۇل رەتتە تەك پاتەنتتەر الۋ, ماقالالار جازۋ جەتكىلىكسىز. عىلىمي ازىرلەمەلەر وندىرىسكە كەڭىنەن ەنگىزىلىپ, ەكونوميكانىڭ وسىمىنە ىقپال ەتۋى كەرەك. بۇل تۇرعىدا زەرتتەۋ ۋنيۆەرسيتەتتەرىنە ەرەكشە ميسسيا جۇكتەلەدى. ەۇۋ دا زەرتتەۋ ۋنيۆەرسيتەتىنە ترانسفورماتسيالانۋدا.
كوروناۆيرۋسقا قارسى وتاندىق ۆاكتسينانى تابىستى ازىرلەگەن جانە شىعارعان QazBioPharm حولدينگىمەن بۇگىنگى كەلىسىم كادرلاردى دايارلاۋ ساپاسىن ارتتىرۋعا, بىرلەسكەن عىلىمي زەرتتەۋلەر جۇرگىزۋگە, ۋنيۆەرسيتەت پەن حولدينگ عالىمدارىنىڭ عىلىمي جانە عىلىمي-تەحنيكالىق قىزمەتىنىڭ ناتيجەلەرىن كوممەرتسيالاندىرۋعا ۇلكەن جول اشادى», دەدى ەرلان سىدىقوۆ.
بيىلعى جىلدان باستاپ وتاندىق فارماتسەۆتيكا ونەركاسىبى ءۇشىن قاجەتتى مامانداردى وقىتۋدىڭ بىرلەسكەن باعدارلامالارى ازىرلەنەدى. عىلىمي كادرلاردى دايارلاۋ ماقساتىندا ەۇۋ مەن QazBioPharm بىرلەسكەن ديسسەرتاتسيالىق كەڭەس قۇرۋدى جوسپارلاپ وتىر. حولدينگ ەۇۋ ءبىلىم الۋشىلارىنىڭ وندىرىستىك جانە عىلىمي تاعىلىمدامادان ءوتۋ بازاسىنا اينالادى.
ء«بىز كادرلاردى بىرلەسىپ دايارلاۋدى جۇزەگە اسىرامىز. سەبەبى «QazBioPharm» حولدينگىنە بيولوگيالىق قاۋىپسىزدىك, بيوتەحنولوگيا, فارماتسيا, گەنەتيكا سالاسىنداعى جوعارى بىلىكتى ماماندار قاجەت. قازىرگى ۋاقىتتا الەمنىڭ 300 ۇزدىك ۋنيۆەرسيتەتتەرىنىڭ قاتارىنا كىرەتىن جانە ايتارلىقتاي عىلىمي الەۋەتكە يە ەۋرازيا ۇلتتىق ۋنيۆەرسيتەتىمەن كەلىسىم ورتاق ماقساتتاردى ىسكە اسىرۋعا, سونىڭ ىشىندە بيولوگيالىق قاۋىپسىزدىكتى قامتاماسىز ەتۋ جانە وتاندىق فارماتسيانى دامىتۋ ءۇشىن بەرىك عىلىمي-ءبىلىم بەرۋ پلاتفورماسىن قالىپتاستىرادى», دەپ اتاپ ءوتتى كۇنسۇلۋ زاكاريا.
ەۇۋ مەن QazBioPharm جاڭا پرەپاراتتار مەن تەحنولوگيالاردى ازىرلەۋگە جانە شىعارۋعا كىرىسەدى. قوس مەكەمەنىڭ عالىمدارى بيولوگيا, بيوتەحنولوگيا, ۆيرۋسولوگيا, ەكولوگيا, گەنەتيكا سالالارىندا بىرلەسكەن عىلىمي-زەرتتەۋ جۇمىستارىن جۇرگىزەدى. سونداي-اق ۋنيۆەرسيتەت عالىمدارىنىڭ بيولوگيا, بيوتەحنولوگيا سالاسىنداعى عىلىمي جوبالارى مەن جاڭا دارىلىك پرەپاراتتار بويىنشا ازىرلەمەلەرىن كوممەرتسيالاندىرۋ كوزدەلۋدە.