كەشە بايلانىس جانە اقپارات قىزمەتكەرلەرى كۇنىنە وراي, قازاقستان پرەزيدەنتى اكىمشىلىگى باسشىسىنىڭ ورىنباسارى باعلان مايلىباەۆتىڭ قاتىسۋىمەن قازاقستان حالقى اسسامبلەياسىنىڭ ەتنوسارالىق قاتىناستار ماسەلەسى جونىندەگى جەتەكشى جۋرناليستەر مەن ساراپشىلار كلۋبىنىڭ وتىرىسى ءوتتى. وتىرىستا قحا قىزمەتىن اقپاراتتىق سۇيەمەلدەۋ جونىندەگى ماسەلەلەر جانە 2015 قازاقستان حالقى اسسامبلەياسى جىلىن باق-تاردا ناسيحاتتاۋ بويىنشا مىندەتتەر, ەتنوسارالىق كەلىسىمدى نىعايتۋ جونىندەگى ىسكە اسىرىلىپ جاتقان جوبالار, قحا-نى وڭىرلىك دەڭگەيدە ناسيحاتتاۋ بويىنشا جۇرگىزىلگەن جۇمىستار جايى تالقىلاندى.
ب.مايلىباەۆ قازاقستان حالقى اسسامبلەياسى XXI سەسسياسىنىڭ قوعام ءۇشىن ماڭىزىنا توقتالدى. «بۇل سەسسيانىڭ سوڭىندا تاريحي شەشىمدەر قابىلدانعانىن بىلەسىزدەر. ال ولار ءوز كەزەگىندە وسى ينستيتۋتتىڭ جۇمىسىن جانداندىرىپ, ودان ءارى جەتىلدىرە تۇسەتىنى انىق. قازىر مەملەكەت باسشىسى نۇرسۇلتان نازارباەۆ بەرگەن تاپسىرمالار بويىنشا اۋقىمدى جۇمىستار اتقارىلۋدا. ەگەر دە ءبىز الەمنىڭ 30 دامىعان ەلىنىڭ قاتارىنا قوسىلعىمىز كەلسە, وندا ەلىمىزدە ەتنوسارالىق تۇراقتىلىق پەن كونفەسسياارالىق كەلىسىم بولۋى كەرەك. بۇل باعىتتا, ياعني اسسامبلەيا قىزمەتىنىڭ دامۋىنا, قوعامدا كەلىسىم ورناۋىنا ۇلەس قوسۋدا جۋرناليستەردىڭ ەڭبەگى ايرىقشا», – دەدى ول.
قازاقستان حالقى اسسامبلەياسى توراعاسىنىڭ ورىنباسارى ەرالى توعجانوۆ ءوز سوزىندە ەل بىرلىگىن, پاتريوتيزمدى, ۇلتارالىق تاتۋلىقتى دامىتۋدا باق وكىلدەرىنىڭ ءرولى ەرەكشە ەكەنىن اتاپ كورسەتتى. «ءبىز بايلانىس جانە اقپارات قىزمەتكەرلەرى كۇنى قارساڭىندا قازاقستان حالقى اسسامبلەياسى جانىنداعى جۋرناليستەر مەن ساراپشىلار كلۋبىنىڭ كەزەكتى وتىرىسىندا باس قوسىپ وتىرمىز. ءسوز قۇدىرەتىنە باس يگەن حالىقتىڭ ۇرپاعى ءۇشىن بۇل كۇن شىنىندا دا ماڭىزى ەرەكشە مەرەكە. قالام ۇستاپ, وي تەرگەن بارشا اقپارات سالاسىنىڭ قىزمەتكەرلەرىن بۇگىنگى كاسىبي مەرەكەسىمەن قۇتتىقتايمىز. كيەلى ۇعىمعا اينالعان باستى قۇندىلىعىمىز – قوعامدىق كەلىسىمدى ەلگە تاراتۋدا, ساناعا ءسىڭىرۋ مەن ساقتاۋدا, قازاقستان حالقى اسسامبلەياسىنىڭ وسى باعىتتاعى قىزمەتىن قوعامعا ءتۇسىندىرۋ مەن ناسيحاتتاۋدا سىزدەردىڭ ەڭبەكتەرىڭىز زور», دەدى ە. توعجانوۆ.
وسىلاي دەي كەلە, ول بۇل باسقوسۋدىڭ ماقساتى باق وكىلدەرىمەن بىرگە قازاقستان حالقى اسسامبلەياسى قىزمەتىن اقپاراتتىق سۇيەمەلدەۋ باعىتىنداعى جۇمىستاردى تالقىلاپ, الداعى ۋاقىتتا بىرلەسە اتقارىلاتىن مىندەتتەردى انىقتاپ الۋ ەكەنىن جەتكىزدى. «ەلباسى نۇرسۇلتان نازارباەۆ اسسامبلەيانىڭ ءححى سەسسياسىندا 2015 جىلدى قازاقستان حالقى اسسامبلەياسى جىلى دەپ جاريالاۋ تۋرالى تاپسىرما بەرگەنى بارشاڭىزعا ءمالىم. بۇگىن, مىنە, وسى جانە باسقا دا ماسەلەلەر بويىنشا قازاقستاندىق جۋرناليستەرمەن, ساراپشىلارمەن بىرلەسە وتىرىپ پىكىر الماساتىن ۋاقىت كەلدى», دەدى ول.
وتىرىس اياسىندا سويلەگەن سوزىندە ەرالى توعجانوۆ قازاقستان حالقى اسسامبلەياسىنىڭ ەتنوسارالىق قاتىناستار ماسەلەلەرى جونىندەگى جۋرناليستەر مەن ساراپشىلار كلۋبى اسسامبلەيانىڭ XV سەسسياسىندا مەملەكەت باسشىسىنىڭ تاپسىرماسىمەن قۇرىلعانىن, بۇل كلۋب باق-تى جۇمىلدىراتىن كەڭەستىك-ساراپشىلىق الاڭعا اينالعانىن, ونىڭ ماقساتى – ەتنوسارالىق ءجانە كونفەسسياارالىق كەلىسىمدى نىعايتۋ ەكەنىن اتاپ ءوتتى. ونىڭ ايتۋىنشا, وسى جىلدار ارالىعىندا اتالعان كلۋب اسسامبلەيا جۇمىسىن اقپاراتتىق جاعىنان قولداۋ باعىتىندا ايتارلىقتاي جۇمىستار اتقارعان.
ماسەلەن, جۋرناليستەر مەن ساراپشىلار كلۋبىنىڭ مۇشەلەرى اسسامبلەيانىڭ بىرقاتار ستراتەگيالىق جانە باعدارلامالىق قۇجاتتارىن ازىرلەۋگە ءوز ۇلەستەرىن قوسىپتى. قحا جۇمىسىن ناسيحاتتايتىن جۋرناليستەر مەن پرەزيدەنت اكىمشىلىگىنىڭ يدەولوگيالىق قۇرىلىمى اراسىنداعى تىعىز بايلانىس ورناپ وتىر ەكەن. «بۇل باعىتتا جۋرناليستەر اقپاراتتىق جۇمىستار مەن مەديا-جوسپارلاردى جۇزەگە اسىرۋدا بەلسەندىلىك تانىتىپ كەلەدى», دەدى ە. توعجانوۆ. سونداي-اق, ول سوڭعى 6 اي ىشىندە باق-تا ەتنوسارالىق تاتۋلىق, قوعامدىق كەلىسىم ماسەلەلەرى بويىنشا 3903 ماتەريال شىققانىن اتاپ كورسەتتى. ولاردىڭ 592-ءسى باسىلىمداردا جارىق كورسە, 425-ءى تەلەارنالاردان بەرىلگەن. ال 2886 اقپارات ينتەرنەت-رەسۋرستاردا جاريالانىپتى.
ءسوزىنىڭ سوڭىندا قازاقستان حالقى اسسامبلەياسى توراعاسىنىڭ ورىنباسارى قوعامدىق كەلىسىم مەن ۇلتتىق بىرلىك ماسەلەسى قازاقستان جۋرناليستەرى ءۇشىن كاسىبي ءوسۋىنىڭ نەگىزىنە اينالعانىن ايتا كەلە, اسسامبلەيا قىزمەتىنە اقپاراتتىق تۇرعىدا قولداۋ بىلدىرۋگە كۇش سالىپ جۇرگەن باق وكىلدەرىنە شىعارماشىلىق تابىس تىلەدى.
جيىن اياسىندا, سونداي-اق, پارلامەنت سەناتىنىڭ دەپۋتاتى اناتولي باشماكوۆ, «باس رەداكتورلار كلۋبى» قب پرەزيدەنتى بيبىگۇل جەكسەنباي, ل.ن.گۋميلەۆ اتىنداعى ەۇۋ يۋنەسكو كافەدراسىنىڭ پروفەسسورى ءادىل احمەتوۆ, «يۋجنىي كازاحستان» وبلىستىق گازەتىنىڭ باس رەداكتورى مارينا ليمارەنكو, «قازاقستان» رترك قاراعاندى وبلىستىق فيليالىنىڭ رەداكتورى ءاشىمحان جامپەيىسوۆ ءسوز الىپ, ەتنوسارالىق كەلىسىمدى نىعايتۋ مەن قحا قىزمەتىن ناسيحاتتاۋ بويىنشا الداعى ۋاقىتتا جۇرگىزىلۋى ءتيىس جۇمىستار جايىن, سونىمەن قاتار, وڭىرلىك باق-تارداعى اسسامبلەيا مىندەتتەرىن ءتۇسىندىرۋ جونىندەگى جۇمىستار توڭىرەگىندە بايانداپ بەردى.
باسقوسۋ اياسىندا قازاقستان حالقى اسسامبلەياسىنىڭ شەشىمىمەن تاۋەلسىزدىكتى, ەل بىرلىگىن نىعايتۋعا, مادەنيەتارالىق ۇنقاتىسۋدى دامىتۋعا جانە قازاقستاندىق ءپاتريوتيزمدى تاربيەلەۋگە قوسقان ەلەۋلى ۇلەسى ءۇشىن بىرقاتار باق وكىلدەرى ماراپاتتالىپ, سوڭىنان «استانا» راديوسىنىڭ ديرەكتورى, «باس رەداكتورلار كلۋبى» قب پرەزيدەنتىنىڭ ورىنباسارى گۇلميرا قاراكوزوۆا «مۋلتيمەديا-پروفي» تاقىرىبىندا شەبەرلىك ءدارىسىن وتكىزدى.
احمەد مۇرادوۆ,
پارلامەنت ءماجىلىسىنىڭ دەپۋتاتى:
– تاۋەلسىزدىكتى العان جىلدارى ەلىمىزدە «بىرلىك» دەگەن ءسوز العاش ايتىلا باستاعان كەزدە كوپتەگەن ۇيىمدار, قوعامدىق بىرلەستىكتەر وزدەرىن «شاڭىراق» دەپ اتادى. ول كەزدە بۇل ءسوزدىڭ ماعىناسىن بىرەۋ ءتۇسىندى, بىرەۋ جەتە تۇسىنبەي جاتتى. ال كەيىننەن ءبىز قازاقستان حالقى اسسامبلەياسىن قۇرعان كەزدە ەلىمىزدەگى ءتۇرلى ەتنوس وكىلدەرى ونىڭ رۋحاني ءمان-ماڭىزىنا تەرەڭ بويلاي باستادى. «شاڭىراق» ءسوزىنىڭ قاسيەتىن دە ءتۇسىنىپ, بۇل قازاقستاندى ءوزىنىڭ وتانى دەپ سانايتىن ازاماتتاردىڭ ورتاق يدەياسىنا اينالدى. ياعني, بۇگىندە «قازاقستان – مەنىڭ وتانىم» دەۆيزى قازاقستاننىڭ باعىت-باعدارى, قازاقستان حالقى اسسامبلەياسىنىڭ ۇستاناتىن يدەياسى بولىپ وتىر. ءبىر سوزبەن ايتقاندا, اسسامبلەيا رۋحاني, مادەني, تاريحي قۇندىلىقتاردىڭ باسىن بىرىكتىرەتىن ماڭىزدى ينستيتۋت بولىپ قالىپتاستى.
ۆيدادي سالاحوۆ,
قحا مۇشەسى:
قازاقستان جەرىندە ءبىر حالىق تۇرادى. الايدا, ءبىز ءتۇرلى ەتنوستىق توپتارعا بولىنەمىز. ەتنوستىق سان الۋاندىعىنا قاراماستان, ەلىمىزدە تاتۋلىق پەن بىرلىك, قوعامدىق كەلىسىم – ايرىقشا نازاردا تۇرعان ماسەلەلەردىڭ ءبىرى. سول سەبەپتى, قازىرگى تاڭدا بۇل جەردە ەتنوسارالىق جانە كونفەسسياارالىق كيكىلجىڭدەر ورىن الىپ وتىرعان جوق. ولار بولعان كۇننىڭ وزىندە تەز ارادا شەشىمىن تابادى دەپ ويلايمىن. سەبەبى, قازاقستان ءوزىنىڭ تاۋەلسىزدىگىن العان جىلداردان باستاپ, ۇلتجاندىلىق يدەياسىن ءوزىنىڭ باستى ۇستانىمىنا اينالدىرىپ كەلەدى. بۇل ورايدا, قحا-نىڭ ءرولى زور. ويتكەنى, قازىرگى تاڭدا قازاقستان حالقى اسسامبلەياسى ەلىمىزدە قونىس تەپكەن بارلىق ەتنوس وكىلدەرىنىڭ باسىن بىرىكتىرۋگە, ولاردى ءبىر ماقسات جولىندا جۇمىلدىرۋعا ۇلكەن ۇلەس قوسىپ وتىر.
ءلايلا ەدىلقىزى,
«ەگەمەن قازاقستان».