بولعاندا قانداي! اينالايىن اتامىز قازاق «قالاۋىن تاپسا قار جانادى», دەپ ءبىلىپ ايتقان عوي. سەنبەسەڭىز, پەتروپاۆلعا كەلىپ, وبلىستىق پروكۋراتۋرانىڭ ءمالىمەتتەرىنە قانىقساڭىز توبە شاشىڭىز تىك تۇرماسا ءبىز-اق وتىرىكشى بولايىق. القيسسا, سونىمەن دەنساۋلىق ساقتاۋ سالاسىنا قاتىستى بەتى اشىلعان ورەسكەل ولقىلىقتاردىڭ كەيبىرىن «سويلەتىپ كورەيىك».
قۇزىرلى ورگاننىڭ جۋىردا وتكەن كەزەكتى ماجىلىسىندە ءبىر جارىم جىلدىڭ ىشىندە اۋرۋحانالاردا 45 ادامنىڭ قايتىس بولعانى, ولاردىڭ كەيبىرى مەديتسينا قىزمەتكەرلەرىنىڭ بىلىكسىزدىگى مەن بىلىمسىزدىگىنەن كوز جۇمعانى ناقتى مىسالدارمەن باياندالدى. وزدەرىنىڭ مىندەتتەرىنە سالدىر-سالاق قاراعانى ءۇشىن 18 مەيىربيكەگە قاتىستى قىلمىستىق ءىس قوزعالعان. مىسالى, وبلىس ورتالىعىنداعى № 3 اۋرۋحانادا جاس اناعا تولعاق كەزىندە جەدەل مەديتسينالىق كومەك كورسەتىلمەۋى سالدارىنان شارانا ءولى تۋعان. جالعان انىقتاما تولتىرۋ, جەڭىلدىكپەن بەرىلەتىن ءدارى-دارمەكتەردى اقشاعا الدىرتۋ, ارنايى ماماندار جوقتىعىنان جاڭا قوندىرعىلاردىڭ بوسقا قاڭتارىلىپ تۇرۋى سەكىلدى فاكتىلەر تىركەلگەن. ءبىر جاعىنان, مۇنداي كەمشىلىكتەردىڭ ورىن الۋىنا جوعارى ءبىلىمدى مامانداردىڭ جەتىسپەۋشىلىگى كەرى اسەرىن تيگىزىپ وتىرعانى الاڭداتپاي قويمايدى. تيميريازەۆ اۋدانىندا جۇمىس ىستەيتىن ءبىر دارىگەر ءارى حيرۋرگ ءارى ونكولوگ ءارى وتولارينگولوگ قىزمەتىن قوسا اتقارادى ەكەن. بۇدان كەيىن قانداي ساپالى ەم-دوم كۇتۋگە بولادى دەگەن سۇراق ءوز-وزىنەن تۋىندايدى.
ەڭ سوراقىسى سول, ءسولتۇستىكقازاقستاندىق دارىگەرلەر ءبىر قولىمەن الەمدى, ءبىر قولىمەن بەسىكتى تەربەتەتىن ءازيز انالاردى ەركەكتەرمەن وپ-وڭاي شاتاستىرىپ الادى ەكەن. ماسەلەن, اتپال ازاماتتاردىڭ تورتەۋىنەن تەك ايەلدەردە عانا كەزدەسەتىن اۋرۋ «تابىلعان». اتاپ ايتقاندا, ءۇش ناۋقاستان جاتىر موينى, بىرەۋىنەن ومىراۋ بەزى ىسىگى اۋرۋى «انىقتالعان». شىندىعىنا كەلگەندە, ولاردىڭ ءبارى قۇلان-تازا كۇيدە بولعان. پروكۋراتۋرا وكىلدەرىنىڭ ايتۋىنشا, وسى جەردە ءبىر شيكىلىك جاتقان سەكىلدى. سكيرينگتىك تەكسەرىلۋگە مۇلدەم كەلمەگەن تۇرعىندار تىزىمگە ەنگىزىلىپ, ءار «كليەنت» ءۇشىن دارىگەرگە مەملەكەتتەن 3 مىڭ تەڭگەدەن تولەنىپ وتىرعان سىڭايلى. دەمەك, قالتالارىن «قالىڭداتۋ» ءۇشىن گوگول رومانىنداعى «ءولى جاندار» ەسەبىن كوبەيتۋ ارقىلى نەبىر قۋلىق-سۇمدىققا بارۋلارى ابدەن مۇمكىن. دۇرىستاپ تەكسەرسە, جەمقورلىق ءىس-ارەكەتتىڭ سيىردىڭ بۇيرەگىندەي بۇلت ەتىپ شىعا كەلۋى عاجاپ ەمەس.
«اق حالاتتى ابزال جاندار» دەپ دارىپتەگەندە اياق-قولىن جەرگە تيگىزبەيتىن گيپپوكراتتىڭ انتىنا ادال كاسىپ يەلەرى ايدىڭ, كۇننىڭ امانىندا ايەل مەن ەركەكتى جاڭىلىستىرىپ, ساۋ ادامدى «اۋرۋ» ەتىپ قويعانى اۋرۋحانا جاعالاپ جۇرگەندەردى شوشىندىرىپ وتىر.
ءومىر ەسقالي,
«ەگەمەن قازاقستان».
سولتۇستىك قازاقستان وبلىسى.