ل.ن. گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ «يادرولىق تەحنولوگيالار پاركى» اق عالىمدارى جاڭا ونەرتابىستارىنا پاتەنت الىپ, وندىرىسكە ەنگىزدى, دەپ جازادى Egemen.kz.
امبەباپ رادياتسيالىق تىگىلگەن گيدروەل توپىراقتاعى ىلعال جەتىسپەۋشىلىگى ماسەلەسىن شەشۋمەن قاتار اۋىلشارۋاشىلىق داقىلداردىڭ ونىمدىلىگىن ارتتىرادى جانە توپىراقتىڭ اەراتسياسىن حيميالىق لاستانۋ قاۋىپىنە جول بەرمەي جاقسارتادى. 2023 جىلى 500 توننا گيدروگەلدى نارىققا ۇسىنۋ جوسپارلانعان.
ەۇۋ عالىمدارى اگروونەركاسىپتىك سالاعا ارنالعان بىرەگەي گيدروگەل جاسادى. جاڭا پرەپارات اۋىل شارۋاشىلىعى داقىلدارىنىڭ شىعىمدىلىعىن 2 ەسەگە, ونىمدىلىگىن ورتا ەسەپپەن تورتتەن ءبىر ەسەگە ارتتىرادى. گيدروگەلدى اپروباتسيالاۋ جۇمىستارى اقمولا وبلىسىنىڭ اۋماعىنداعى ەگىستىكتەردە جۇرگىزىلدى. سىناقتاردىڭ ناتيجەسى امبەباپ پرەپاراتتىڭ توپىراق ىلعالدىلىعىن ساقتاۋعا, ءونىمدى وسىمدىكتەردى قالىپتاستىرۋعا, تىڭايتقىشتار كولەمىن ازايتۋعا جانە ونىمدىلىكتى ارتتىرۋعا كومەكتەسەتىنىن كورسەتتى.
«كوكتەمگى-كۇزگى ماۋسىمدا زىعىر مەن كۇنباعىس ەگۋ بارىسىندا ءبىزدىڭ جاڭا پرەپاراتتى قولدانىپ, زىعىر ونىمدىلىگى 38,4% – عا, كۇنباعىس 25,9% - عا ارتقانىن بايقادىق. جاڭا سۋپەرابسوربەنت سىناقتارى ءونىمدى ىلعالدىڭ 20-30% - عا كوپ جينالۋىن, وسىمدىكتەردىڭ ءوسۋى 13-27%-عا ۇلعايۋىن, وسىمدىكتەردىڭ ۆەگەتاتسيالىق دامۋ كەزەڭىنىڭ 5-7 كۇنگە ۇزارۋىن, وسىمدىكتەردىڭ ءونىمدى جايىلۋى 25-31%-عا ۇلعايۋىن كورسەتتى. گيدروگەلدىڭ بىرەگەيلىگى - ونىڭ سوربتسيالىق سىيىمدىلىعى. 1 گرامم سۋپەرابسوربەنت 300 گرامم سۋدى ساقتاي الادى», دەپ اتاپ ءوتتى ل.ن. گۋميلەۆ اتىنداعى ەۇۋ كەاق جانىنداعى «يادرولىق تەحنولوگيالار پاركى» اق باسقارما توراعاسى الەكساندر بوريسەنكو.
ەۇۋ عالىمدارى جاڭا تەحنولوگيانى كوممەرتسيالاندىردى جانە وندىرىسكە ەنگىزدى. وتكەن جىلى جەكە سەرىكتەسپەن گيدروگەلدەردى ءوندىرۋ جانە ساتۋمەن اينالىساتىن بىرلەسكەن «BetaSorb» كاسىپورنى قۇرىلدى. 2023 جىلى 500 توننا گيدروگەلدى نارىققا ۇسىنۋ جوسپارلانعان.
ەۇۋ عالىمدارىنىڭ يننوۆاتسيالىق پرەپاراتتى قۇرۋ يدەياسى رادياتسيالىق تىگۋ ادىسىنە نەگىزدەلگەن. وڭدەۋدىڭ مۇنداي ءتۇرى گيدروگەلدىڭ ستەريلدىگىن جانە تۇراقتىعىن قامتاماسىز ەتىپ, مۇزداتۋ مەن ءجىبىتۋدىڭ بىرنەشە تسيكلدارى كەزىندە ونىڭ قاسيەتتەرىن ساقتاۋعا جول اشادى. پرەپارات پايدالانۋ مەرزىمى اياقتالعاننان كەيىن ىدىرايدى, سونىمەن قاتار ول تىڭايتقىشتىڭ اسەرىن ارتتىرۋ مۇمكىندىگىنە يە.
ايتا كەتۋ كەرەك, ەۇۋ عالىمدارىنىڭ بۇل جوباسى ازياداعى يادرولىق ىنتىماقتاستىق فورۋمىندا (FNCA) ۇسىنىلعان جانە FNCA جىل سىيلىعىمەن ماراپاتتالعان.