جۋىردا قازاقستان رەسپۋبليكاسى ەكولوگيا جانە تابيعي رەسۋرستار ءمينيسترى ءزۇلفيا سۇلەيمەنوۆا مەن جاپونيانىڭ پارلامەنتتىك سىرتقى ىستەر ۆيتسە-ءمينيسترى يوشيكاۆا يۋمي ەكىجاقتى كەزدەسۋ بارىسىندا ەكولوگيا سالاسىنداعى ءوزارا ىنتىماقتاستىق ماسەلەلەرىن تالقىلادى.
ايتا كەتۋ كەرەك, جاپونيا 2020 جىلى 2050 جىلعا دەيىن پارنيكتىك گازدار شىعارىندىلارىنىڭ نولدىك دەڭگەيىنە جەتۋدى ماقسات ەتىپ قويدى. قازىرگى ۋاقىتتا كۇنشىعىس ەلى ەنەرگەتيكالىق كوزدەردەن پارنيكتىك گازداردىڭ شىعارىلۋ كولەمى بويىنشا الەمدە 5-ورىندا (قحر, اقش, ءۇندىستان, رەسەيدەن كەيىن) تۇر.
جاپوندىق تاراپ بىرلەسكەن كرەديتتەۋ مەحانيزمى (JCM) اياسىندا قازاقستانمەن ىنتىماقتاستىققا مۇددەلى ەكەنىن ءبىلدىردى. بۇل مەحانيزم وزىق تەحنولوگيالاردى جانە شىعارىندىلاردى ازايتۋ جونىندەگى ينفراقۇرىلىمدى تاراتۋعا, سونداي-اق كليماتتىڭ وزگەرۋىنىڭ سالدارىن جۇمسارتۋ جونىندەگى شارالاردى جۇزەگە اسىرۋعا ىقپال ەتەدى. سونىمەن قاتار JCM پارنيكتىك گازدار شىعارىندىلارىن ازايتۋعا نەمەسە سىڭىرۋگە باعىتتالعان كليماتتىق جوبالاردى جۇزەگە اسىرۋدى قاراستىرادى.
ايتا كەتەلىك, JCM اياسىنداعى نەسيەلەر اتالعان مەحانيزم شەڭبەرىندە پارنيكتىك گازدار شىعارىندىلارىن ازايتۋ نەمەسە ءسىڭىرۋ بويىنشا شارالاردى ىسكە اسىرۋ بارىسىندا جوبا قاتىسۋشىلارى قول جەتكىزگەن پارنيكتىك گازدار شىعارىندىلارىن ازايتۋ نەمەسە ءسىڭىرۋدىڭ ساندىق كورسەتكىشتەرى نەگىزىندە بەرىلەدى.
سونداي-اق تاراپتار كرەديتتەۋدىڭ بىرلەسكەن مەحانيزمى بويىنشا ىنتىماقتاستىق تۋرالى مەموراندۋمعا ەكى ەلدىڭ ۇكىمەتتەرى دەڭگەيىندە قول قويۋ ماسەلەلەرىن تالقىلادى.
«ەگەمەن-اقپارات»