ۇكىمەت ۇيىندە مەملەكەتتىك اپپارات قىزمەتىن بيۋروكراتيادان ارىلتۋ جانە قوعام ءومىرىنىڭ بارلىق قىرلارىن تسيفرلاندىرۋ ماسەلەلەرى تالقىلاندى. پرەمەر-ءمينيستردىڭ ورىنباسارى –ۇكىمەت اپپاراتىنىڭ باسشىسى عالىمجان قويشىباەۆتىڭ توراعالىعىمەن وتكەن كەڭەسكە تسيفرلىق دامۋ, يننوۆاتسيالار جانە اەروعارىش ونەركاسىبى ءمينيسترى باعدات مۋسين, وسى ۆەدومستۆونىڭ ۆيتسە-مينيسترلەرى جانە ورتالىق مەملەكەتتىك ورگاندار اپپاراتتارىنىڭ باسشىلارى قاتىستى.
ع.قويشىباەۆ تسيفرلىق تەحنولوگيالاردى ەنگىزۋ جانە بيۋروكراتيادان ارىلتۋ مەملەكەتتىك اپپارات جۇمىسىنىڭ تيىمدىلىگىن ارتتىرىپ قانا قويماي, ءبىرىنشى كەزەكتە قازاقستاندىقتاردىڭ ءومىر ساپاسىن جاقسارتۋعا ىقپال ەتەتىنىن اتاپ كورسەتتى.
«بيىل دەبيۋروكراتيزاتسيالاۋ جانە تسيفرلاندىرۋ ماسەلەلەرىندە بىرقاتار سەرپىندى قادامداردى جۇزەگە اسىرۋىمىز كەرەك. ەڭ الدىمەن, مۇندا حالىقتىڭ ءبىرىنشى كەزەكتەگى قاجەتتىلىكتەرىنە ەرەكشە نازار اۋدارعان ءجون. بۇل جۇمىس مەملەكەتتىك اپپاراتتىڭ قىزمەتىن بيۋروكراتيادان ارىلتۋ جونىندەگى جارلىقتى جانە پرەزيدەنتتىڭ سايلاۋالدى باعدارلاماسىن ورىنداۋ شەڭبەرىندە كەشەندى تۇردە جۇرگىزىلۋدە», دەدى ع.قويشىباەۆ.
اتالعان مىندەتتەردى شەشۋ قالاي ىسكە اسىرىلاتىنى تۋرالى ب.مۋسين باياندادى. ماسەلەن, جاسالىپ جاتقان جۇمىستىڭ بارلىعى ادامنىڭ مۇددەسىنە قىزمەت ەتۋى كەرەك.
ء«بىز تسيفرلاندىرۋ ءاربىر قازاقستاندىققا باعىتتالۋعا ءتيىس ەكەنىن تۇسىنەمىز. ونلاين-رەجىمدە اۆتوكولىكتى قايتا راسىمدەۋ, تۋ تۋرالى كۋالىك الۋ سياقتى ازاماتتارىمىزدىڭ ءومىرىن ەداۋىر جەڭىلدەتكەن جۇمىستار ىسكە اسىرىلۋدا. الايدا ءارى قاراي دامۋ كەرەك. 10 نەگىزگى ومىرلىك جاعدايدى انىقتادىق, ولاردى تولىعىمەن قاراستىرىپ, ءوزىمىز ءۇشىن پرواكتيۆتى مەملەكەتتىك قىزمەتتەردى ەنگىزۋ بويىنشا جۇمىستى جالعاستىراتىن نەگىزگى ساتتەردى بەلگىلەدىك», دەدى ب.مۋسين.
سونىمەن قاتار مينيستر مەملەكەتتىك قىزمەتشىلەرگە, ازاماتتارعا جانە بيزنەسكە اسەر ەتەتىن بيۋروكراتيادان ارىلتۋ پروتسەسىنىڭ ءۇش نەگىزگى باعىتىن بەلگىلەدى. ماسەلەن, مەملەكەتتىك قىزمەتشىلەر ءۇشىن دەرەكتەر نەگىزىندە شەشىمدەر قابىلداۋدى جەدەلدەتۋدە ەسەپ بەرۋدى اۆتوماتتاندىرۋ, ازاماتتار ءۇشىن وتباسىنىڭ تسيفرلىق كارتاسىن (قۇجاتتاردى قاجەت ەتپەيتىن پرواكتيۆتى قىزمەتتەر) ەنگىزۋدى, بيزنەس ءۇشىن تازا پاراقتان رەتتەۋدى جۇرگىزۋ جوسپارلانۋدا.
كەڭەستى قورىتىندىلاي كەلە, ع.قويشىباەۆ تسيفرلىق دامۋ, يننوۆاتسيالار جانە اەروعارىش ونەركاسىبى ۆيتسە-مينيسترلەرىنە تسيفرلىق ترانسفورماتسيانى ىلگەرىلەتۋدىڭ ماڭىزدى ەكەنىن ەسكە سالدى.
«بيۋروكراتيادان ارىلتۋ تەك مەملەكەتتىك ورگانداردىڭ جۇمىسىن جەڭىلدەتۋمەن عانا شەكتەلمەۋى كەرەك. ونى ەلىمىزدىڭ ازاماتتارى وزدەرىنىڭ كۇندەلىكتى ومىرىندە سەزىنۋگە ءتيىس. بۇل ماسەلەنى شەشۋ ءۇشىن ءبىز ادامنىڭ مۇددەسىنە باعىتتالعان ءتاسىلدى جۇزەگە اسىرامىز, ول مەملەكەتتىك اپپاراتتىڭ حالىقپەن ءوزارا ءىس-قيمىل جاساۋىنا تىكەلەي اسەر ەتەدى», دەپ تۇيىندەدى ع.قويشىباەۆ.