سەرتكە بەرىك, انتقا ادال

30 جىلداعى تاريحي مەجە

30 جىل ىشىندە ىشكى اسكەرلەردىڭ قالىپتاسۋىنان ۇلتتىق ۇلاننىڭ قازىرگى دەڭگەيىنە دەيىن جەتۋ ءۇشىن بىرنەشە كەزەڭ ارتتا قالدى. اسكەري قالاشىقتاردىڭ ينفرا­قۇرىلىمى جاقساردى, جاڭا اسكەري بولىمدەر قۇرىلىپ, كوپتەگەن الەۋ­مەتتىك ماسەلە شەشىمىن تاپتى. اۋقىم­دى وزگەرىستەر تاربيە جۇمىسىنان تىلدىق قامتاماسىز ەتۋگە, جاۋىنگەرلىك قىزمەت پەن دايىندىقتان تەحنيكا مەن قارۋ-جاراققا دەيىنگى بارلىق سالا­نى قامتىدى. قىزمەتتىك-جاۋىن­گەر­لىك مىندەتتەر اياسى كەڭەيىپ, اسكەر­لەر­دىڭ بارلىق قاجەتتى قۇقىقتىق نەگى­زى قالاندى. ۇيىمدىق-شتات­تىق قۇرى­لىم­داردى ۇتىمدى وڭ­تاي­­لاندىرۋ سا­تى­­لارى ءوتتى. كادرلىق پروبلەمالار جانە اسكەري بولىمدەردى ما­تەريالدىق-تەحنيكالىق قامتاماسىز ەتۋ ماسەلەلەرى شەشىلدى. ءتورت وڭىرلىك – «وڭتۇستىك», «ورتالىق», «باتىس»,  «شى­عىس» قولباسشىلىقتارى قۇرىلدى, تيى­سىنشە تىكەلەي باعىنىستاعى اسكەري بو­لىم­دەر دە ۇيىمداستىرىلدى.

2014 جىلى ىشكى اسكەر ۇلتتىق ۇلانعا اينالىپ, تابيعي جانە تەحنوگەندىك سيپاتتاعى توتەنشە جاعدايلار قاۋپى تۋىنداۋى كەزىندە اسكەرلەردىڭ ءىس-قي­مىل­دارىن ۇيلەستىرۋ جانە باسقارۋ بو­يىنشا جاڭا مىندەتتەر جۇكتەلدى. ال 2015 جىلعى 10 قاڭتاردا «ۇلتتىق ۇلان تۋرالى» زاڭنىڭ قابىلدانۋى مەملەكەتتىك شەكارانى قورعاۋ كەزىندە ۇقك شەكارا قىزمەتىنە جاردەم كورسەتۋ جونىندەگى ماقساتىن ايقىنداپ بەردى. قورعانىس مينيسترلىگىمەن بىرلەسىپ, سوعىس ۋاقىتىندا ەلدىڭ اۋماقتىق قور­عانىس جۇيەسىندەگى جەكەلەگەن مىن­دەت­تەر ناقتىلاندى. بۇل – اسكەردى دامىتۋدىڭ ماڭىزدى كەزەڭى. قۇقىقتىق ءتارتىپ اسكەرلەرى دامۋىنىڭ 30 جىلىندا وتكەن كەزەڭىن قىسقاشا وسىلايشا سيپاتتاۋعا بولادى.

الايدا 2022 جىل حالقىمىزدىڭ بۇكىل ءومىر سالتىن وزگەرتكەن «قا­سىرەتتى قاڭتارمەن» ەستە قالدى. سىن ساعاتىندا ەل ەگەمەندىگىنە قاۋىپ ءتوندى. قاڭتار قىرعىنى بارلىق مەم­لەكەتتىك ورگاندار مەن قوعامدىق ينستيتۋتتار, سونىڭ ىشىندە ۇلتتىق ۇلان ءۇشىن دە ۇلكەن سىناق بولدى.

پارلامەنتتىڭ بىرلەسكەن وتىرىسىندا پرەزيدەنت – قارۋلى كۇشتەردىڭ جوعارعى باس قولباسشىسى قاسىم-جومارت توقاەۆ قاڭتارداعى قايعىلى وقيعا تۋرالى ايتا كەلىپ, ۇلتتىق ۇلان جەكە قۇرامىنىڭ ءىس-ارەكەتتەرىن دە جوعارى باعالادى. الايدا ەڭ وكىنىشتىسى – ءبىز ەكى سارباز­دان, قاتارداعى ماديار قايساروۆ پەن ايبات امانوۆتان ايىرىلدىق. جاۋ­جۇرەك جاۋىنگەرلەردىڭ ەسىمدەرى «وڭ­تۇس­تىك» وڭىرلىك قولباسشىلىعى 5514 جانە 5547 اسكەري بولىمدەرىنىڭ تىزىمىنە ەنگىزىلدى. قوس ساربازدىڭ ەسىمى مەن ەرلىگى جۇرەگىمىزدە ماڭگى قالادى.

قاڭتار قاسىرەتىنىڭ قاتال ساباعى

قاڭتار قاسىرەتى وسال تۇسىمىزدى دا ايقىنداپ بەردى. اسىرەسە داعدارىس جاعدايىندا جەكە قۇرامنىڭ ءىس-ارەكەت­تەرىن جەتىلدىرۋدە, باسقا كۇشتىك قۇرى­لىم­دارىمەن ءوزارا ارەكەتتەسۋدە, سون­داي-اق اسكەرلەردىڭ ماتەريالدىق-تەحنيكالىق جابدىقتالۋى تايعا تاڭبا باسقانداي كورىندى. جەكە قۇراممەن تاربيە جانە يدەولوگيالىق جۇمىستى كۇشەيتۋ, ولاردىڭ جاۋىنگەرلىك رۋحىن نىعايتۋ ماسەلەلەرى دە الدىڭعى قاتارعا شىقتى. سوندىقتان ەل ۇكىمەتى مەن ىشكى ىستەر ءمينيسترى العا قويعان مىندەتتەر اياسىندا ۇلتتىق ۇلاندى دامىتۋدىڭ 2022-2025 جىلدارعا ارنالعان كەشەندى جوسپارى بەكىتىلىپ, ارنايى جانە جەدەل ماقساتتاعى جاڭا بولىمشەلەر قۇرىلا باستادى. سونداي-اق قولدانىستاعى قۇرى­لىم­داردى نىعايتۋدى دا قولعا الدىق.

بۇل بولىمشەلەر ءار وڭىردە ءتيىستى ينفراقۇرىلىم, كولىك جانە ماتەريالدىق-تەحنيكالىق قامتاماسىز ەتىلەدى. ءبىز ولاردى قاجەتتى سانعا جەتكىزۋدى جوس­پارلاپ وتىرمىز. اسكەري كولىكتىك جانە ارميالىق اۆياتسيانى دامىتۋ, اۆتوبرونەتانك تەحنيكاسىنىڭ زاماناۋي ۇلگىلەرىمەن جاراقتاندىرۋ, اۆياتسيالىق بازانى قالىپتاستىرۋ جونىندەگى ءىس-شارالار ىسكە اسىرىلىپ كەلەدى.

ۇلتتىق ۇلاننىڭ اسكەري ينستيتۋتىنا اكادەميا مارتەبەسىن بەرۋ جانە ماگيستراتۋرا باعدارلاماسى بويىنشا وفيتسەرلەردى جوعارى وقۋ ورنىنان كەيىنگى دايارلاۋ ءۇشىن فاكۋلتەت اشۋ – وتكەن جىلداعى ماڭىزدى وقيعانىڭ ءبىرى.

الماتى, اقتوبە, تۇركىستان, جەزقاز­عان, پاۆلودار, قوستاناي قالالا­رىندا قوعامدىق قاۋىپسىزدىكتى قامتاماسىز ەتۋ جونىندەگى مىندەتتەردى شەشۋگە قابى­لەت­تى بولىمشەلەردى قالىپتاستىرۋ دا اسكەريلەردىڭ جاۋىنگەرلىك ازىرلىگىن قولداۋعا باعىتتالىپ وتىر. وتكەن جىلى پولكتەر بازاسىندا استانا, ال­ماتى, اقتوبە قالالارىندا قۇرا­ما­لار جاساقتالىپ, پاۆلودارداعى جەدەل ماقساتتاعى باتالون پولك بولىپ قايتا قۇرىلدى. جەدەل ماقساتتاعى اس­كە­ري بولىمدەردى جاساقتاۋ بيىل دا جالعاسادى.

اكادەميانىڭ ماتەريالدىق-تەحني­كا­لىق بازاسىن, الماتى وبلىسىن­داعى جاۋىنگەرلىك جانە ادىستەمەلىك دايارلاۋ ورتالىعىن, تۇركىستان وبلىسىنداعى تاۋلى وقۋ ورتالىعىن جانە شىعىس قازاقستان وبلىسىنداعى داعدارىسقا قارسى وقۋ ورتالىعىن دايارلاۋدىڭ جانە جەتىلدىرۋدىڭ جاڭا باعدارلامالارى ەنگىزىلەدى. جەتىلدىرۋ ماقساتىندا ءبىز قاراكەمەر كەنتىندەگى وقۋ قۇراماسىن اسكەري كوللەدجگە اينالدىرۋدى جوسپارلاپ وتىرمىز. بۇل, ەڭ الدىمەن, اسكەري قىزمەتتىڭ بەدەلىن ارتتىرۋ ءۇشىن جاسالادى, وسىلاي اسكەردە ماماندىق العان سارباز ازاماتتىق سەكتوردا سۇرانىسقا يە بولادى.

بۇدان باسقا, اسكەري قىزمەتشىلەردىڭ مورالدىق رۋحىن نىعايتۋ, جەكە قۇرام­مەن تاربيە جانە يدەولوگيالىق جۇمىس­تى كۇشەيتۋ بويىنشا ۇلكەن جۇمىس جۇر­گىزىلىپ كەلەدى. جاۋىنگەرلەردى دە­­سترۋك­تيۆتى كۇشتەر تاراپىنان جاعىم­سىز اقپاراتتىق-پسيحولوگيالىق اسەر­دەن قورعاۋعا جانە قارسى ناسيحات جۇر­گىزۋگە مۇمكىندىك بەرەتىن اسكەري-ساياسي جۇمىس­تىڭ جاڭا تۇجىرىمداماسى قا­­­بىلداندى.

كۇردەلى مەتەوجاعدايلار كەزىندە ۇلت­تىق ۇلان بولىمشەلەرى ءوزارا ءىس-قيمىل جاسايتىن ورگاندارمەن بىرلەسىپ ماڭعىستاۋ وبلىسىنىڭ جاڭاوزەن قالا­سىن­دا سۋ باسۋ جاعدايىندا, اقمولا وبلىسىنىڭ قىزىلسۋات كەنتىندە جولاۋ­شىلار مەن تەحنيكانى قار قۇرساۋىنان ەۆاكۋاتسيالاۋ كەزىندە اۆاريالىق-قۇتقارۋ ءىس-شارالارىنا بەلسەندى قاتىستى. «ورتا­لىق» وڭىرلىك قولباسشىلىعىنا قاراستى 5510, 6697 اسكەري بولىمدەرىنىڭ جەكە قۇرامى قوستاناي وبلىسى اۋ­ليە­كول اۋدانىنىڭ اۋماعىندا ءورت وشاقتارىنىڭ زارداپتارىن جويۋعا تج قىزمەتكەرلەرىمەن بىرگە قاتىسىپ, بارلىعى 400 اسكەري قىزمەتشى تارتىلدى. ال قازان ايىنىڭ باسىندا 5518 اسكەري ءبولىمىنىڭ جەكە قۇرامى شىعىس قازاقستان وبلىسىنىڭ سەرەبريانسك, جاڭا سوگرا كەنتتەرىندە ءورت بولعان كەزدە حالىققا كومەك قولىن سوزدى.

ءار ساننىڭ ارتىندا ۇيلەسىمدى جۇمىس تۇر

وتكەن جىلى ۇلاندىقتار 784 قوعام­دىق-ساياسي جانە باسقا دا بۇقارالىق ءىس-شارانى قامتاماسىز ەتۋگە قاتىسىپ, داع­دارىس جانە توتەنشە جاعداي كەزىندە 164 مىندەتتى اتقارعان. اسكەري جاساقتار 29 مىڭعا جۋىق قۇقىق بۇزۋشىنى ۇستاپ, ىشكى ىستەر ورگاندارىنا جەتكىزدى. سونداي-اق قىلمىستىق-اتقارۋ جۇيەسى مەكەمەلەرىن كۇزەتۋ جونىندەگى قاراۋىل­دار سوتتالعانداردىڭ ىشكى تىيىم سالىن­عان ايماققا كىرۋىنىڭ 3 دەرەگىن انىقتاپ, تىيىم سالىنعان ايماقتارعا زاڭسىز زاتتاردى لاقتىرۋعا تىرىسقان 153 ادامنىڭ ارەكەتىنە توسقاۋىل قويدى. وسىلايشا, 111 ادام ۇستالدى, تىيىم سالىنعان زات­تاردى كولىكتى وتكىزۋ جونىندەگى ءبوپ ارقى­لى تاسىمالداۋدىڭ 25 جاعدايى تىلكەلدى.

قاج مەكەمەلەرىن كۇزەتۋ, ايداۋىلداۋ جونىندەگى قاراۋىلدار مەن سوتتال­عان­داردى باقىلاۋ جانە قاداعالاۋ جو­نىن­دەگى باقىلاۋشىلار اسكەري جاساق­تار قۇرامىندا ەسىرتكى بار 1 كگ جۋىق زات, قۇرامىندا ءسپيرتى بار 37,4 ل سۇيىقتىق, 1622 ۇيالى تەلەفون, 915 سيم-كارتا, 1 ملن تەڭگەدەن استام اقشا, 634 شانشۋ-كەسۋ زاتىن تاركىلەدى. قاراۋىلدار ايداۋىلداۋ بويىنشا 3 868 مىندەت ورىنداپ, ولار 55 مىڭعا جۋىق سوتتالعان مەن قاماۋدا وتىرعان ادامدى تاسىمالدادى.

قىزمەتتىك يتتەردى قولدانا وتىرىپ, قىلمىس جاساۋ بەلگىلەرى بار 47 قۇقىق بۇزۋشى ۇستالدى, 10,27 كگ ەسىرتكى زاتى, 2 ملن تەڭگەدەن استام سوماعا ۇرلانعان م ۇلىك, 3 اتىس قارۋى, 3 تراۆماتيكالىق, 3 سۋىق قارۋ, 10 گراناتا, 35 وق-ءدارى تابىلىپ, تاركىلەندى.

جاۋىنگەرلىك مىندەتتەرىن ورىنداۋ­دان بولەك جەكە قۇرام جىل بويى 119 بىر­لەسكەن وقۋ-جاتتىعۋعا قاتىستى. ونىڭ ىشىندە 8 رەسپۋبليكالىق, «قاز­قۇتقارۋ-2022», «بەكەت-2022», «الاڭ-2022» جەدەل-تاكتيكالىق وقۋ-جاتتى­عۋ­لارىندا جانە تەررورعا قارسى ارنايى جەدەل جوسپارلارى بويىنشا – 36, سونداي-اق ءىىم-ءنىڭ ارنايى جەدەل جوسپارلارىنا سايكەس ءوزارا ءىس-قيمىل جاسايتىن ورگاندارمەن بىرلەسە وتكىزىلگەن 40 جەدەل-تاكتيكالىق وقۋ-جاتتىعۋلارىن ايتىپ وتسە بولادى. بۇل سانداردىڭ ارتىندا ۇلتتىق ۇلاننىڭ بارلىق قىزمەتىنىڭ ۇيلەسىمدى جۇمىسى, قىلمىسقا قارسى كۇ­رەستە الدىڭعى شەپتە جۇرگەن اسكەري قىز­مەتشىلەردىڭ وراسان زور ەڭبەگىنىڭ ناتيجەسى.

وتكەن جىلى عانا زاڭدىلىق پەن قۇقىق­تىق ءتارتىپتى قامتاماسىز ەتۋ كە­زىندە كورسەتكەن باتىلدىعى مەن جان­­قيار­­لىعى ءۇشىن ۇلتتىق ۇلاننىڭ 21 اسكەري قىزمەتشىسى مەملەكەت تاراپىنان ماراپاتتالدى. وكى­نىش­تىسى, ونىڭ 3-ەۋى قايتىس بولعاننان كەيىن مارقۇمنىڭ وتبا­­­­­سىنا تاپسىرىلدى. جالپى, وسى 30 جىل ىشىندە ۇلتتىق ۇلاننىڭ 250-دەن استام اسكەري قىزمەتشىسى, ونىڭ 27-ءسى قايتىس بولعاننان كەيىن ناگرادتالعان.

جاۋىنگەرلىك دايىندىق اسا ماڭىزدى

سىرتقى دەسترۋكتيۆتى اسەردىڭ ءوسۋى, ىشكى قاۋىپسىزدىكتىڭ قازىرگى قاۋىپتەرى, قاڭتار وقيعاسى مەن پاندەميا ۇلتتىق ۇلاننان تىڭعىلىقتى جاۋىنگەرلىك دايىندىقتى, بىلىكتىلىك پەن كاسىبيلىكتى تالاپ ەتتى. سوندىقتان ءبىز ارقاشان سىن-قاتەرلەرگە دايىن بولۋىمىز كەرەك. وسىعان وراي اسكەرلەردىڭ جاۋىنگەرلىك الەۋەتىن ارتتىرۋ ماقساتىندا «بۇركىت» ارنايى ماقساتتاعى, جەدەل ماقساتتاعى بولىمشەلەردىڭ ۇيىمدىق-شتاتتىق قۇرىلىمىن جەتىلدىرۋ كەشەنى وتكىزىلدى.

اسكەري-كولىكتىك جانە ارميالىق اۆياتسيانى دامىتۋ, اۆتوبرونەتانك تەحنيكاسىنىڭ زاماناۋي ۇلگىلەرىمەن جاراقتاندىرۋ, اۆياتسيالىق بازانى قالىپتاستىرۋ جونىندەگى ءىس-شارالار دا ىسكە اسىرىلۋدا. اۆياتسيالىق بولىم­شەلەردە قاراپايىم جانە كۇردەلى مەتەورو­لوگيالىق جاعدايلاردا قىزمەت­تىك-جاۋىنگەرلىك مىندەتتەردى شەشۋگە قابىلەتتى ۇشاقتاردىڭ ءارتۇرلى تۇرلەرى بار. اۆياتەحنيكانى ساپالى پايدالانۋ جانە اۆياتسيالىق پەرسونالدى دايار­­­­­لاۋ ءۇشىن استانا اۋەجايىندا اۆيابازا ينفراقۇرىلىمىنىڭ قۇرىلىسى اياقتالدى.

ودان باسقا Y-8 ۇشاقتارى مەن مي-171 تىكۇشاقتارى سياقتى اۆياتسيالىق تەحنيكانىڭ جاڭا ۇلگىلەرى كەزەڭ-كە­زە­­ڭىمەن قارۋلانۋعا ەنگىزىلەدى, بۇل قو­عام­دىق قاۋىپسىزدىكتىڭ بارلىق سىن-قا­تەر­لەرى مەن قاتەرلەرىنە جەدەل دەن قويۋعا مۇمكىندىك بەرەدى. بۇل شارالاردى ىسكە اسىرۋ قىسقا مەرزىمدە ەلدىڭ كەز كەلگەن وڭىرىندە ارنايى وپەراتسيالاردى جۇرگىزۋ ءۇشىن كۇشتەر مەن قۇرالداردى ءتيىمدى باسقارۋدى جانە ۋاقتىلى ارتتىرۋدى قامتاماسىز ەتۋگە باعىتتالعان.

وتكەن جىلى ءبىزدىڭ بولىمشەلەر 9 حالىق­ارالىق, ونىڭ ىشىندە «كو­بالت-2022» تاكتيكالىق-ارنايى جانە ء«وزارا ءىس-قيمىل-2022» كوماندالىق-شتاب­تىق وقۋ-جاتتىعۋلارىنا قاتى­سىپ, جوعارى جاۋىنگەرلىك داعدى مەن كاسىبيلىكتى كورسەتتى. سونىمەن قاتار شىۇ جەلىسى بويىنشا ارنايى بولىم­شە­­لەرىمىز تەرروريزمگە قارسى بىرلەسكەن وقۋ-جاتتىعۋلارعا بەلسەندى قاتىسادى.

«بۇركىت» ارنايى ماقساتتاعى بولىم­شەلەرى – ۇلتتىق ۇلاننىڭ ەليتاسى. بۇل ەلدەگى جاۋىنگەرلىك تاپسىرمالاردى ءوز بەتىنشە ورىنداي الاتىن ءۇش ارنايى جاساقتىڭ ءبىرى. ولار­دىڭ باستى مىندەتى – جوعارى قاۋىپ تون­دىرەتىن جانە مەملەكەتتىڭ نەگىزگى مۇد­دەلەرىنە, ازاماتتاردىڭ ءومىرى مەن دەن­ساۋلىعىنا قاۋىپ توندىرەتىن قۇقىق بۇزۋشىلىقتارعا دەن قويۋ. ارنايى كۇشتەردىڭ جاۋىنگەرلەرى كۇرەس پەن اتۋدىڭ بارلىق نەگىزىنە يە جانە ولارعا ۇلكەن مورالدىق-پسيحولوگيالىق جۇك­تەمە جۇكتەلەدى.

وتكەن جىلى اسكەري بولىمدەر مەن ارنايى ماقساتتاعى بولىمشەلەر 4387 ءتۇرلى قىزمەتتىك-جاۋىنگەرلىك مىندەتتى, ونىڭ ىشىندە جەدەل-ىزدەستىرۋ قىزمەتىن جۇزەگە اسىراتىن ورگاندارعا جاردەم كورسەتۋ بويىنشا 725 مىندەتتى ورىندادى. 139 رەت قارسى قاراۋىلداردىڭ قاۋىپسىزدىگى قامتاماسىز ەتىلدى.

ىشكى ىستەر مينيسترلىگىنىڭ باسشىلىعى مەن ۇلتتىق ۇلاننىڭ باس قولباسشىلىعى «بۇركىت» بولىمشەلەرىنىڭ جەكە قۇرامىن دايارلاۋعا ەرەكشە كوڭىل بولەدى. كۇرەڭ بەرەت – قۇقىقتىق ءتارتىپ اسكەرلەرىنىڭ ارنايى ماقساتتاعى بولىمشەسىنىڭ سيمۆولى. ونى تەك بىلىكتىلىك سىناقتارىنان ءساتتى ءوتىپ, ءوزىنىڭ كاسىبي, فيزيكالىق جانە مورالدىق قاسيەتتەرىمەن وسى قۇقىقتى دالەلدەي العان اسكەري قىزمەتشىلەر عانا كيە الادى.

ارنايى ماقساتتاعى بولىمشەلەردە تەك كەلىسىمشارت بويىنشا اسكەري قىز­مەتشىلەر مەن وفيتسەرلەر قىزمەت اتقا­را­دى جانە ولار ءۇشىن جاۋىنگەرلىك دايارلىقتىڭ ارنايى باعدارلاماسى ازىر­لەندى. ويتكەنى ولاردىڭ قىزمەتى وتە قاۋىپتى. ىشكى ىستەر ورگاندارىمەن بىر­لە­سىپ, ولار كۇن سايىن قىلمىستاردى اشۋعا, اسا قاۋىپتى قىلمىسكەرلەردى ۇستاۋ­عا, ارنايى وپەراتسيالارعا قاتىسادى.

تاريح بولاشاق وتان قورعاۋشىلاردى ەرتە جاستان دايىنداۋ كەرەكتىگىن تالاي رەت كورسەتتى. ۇلتتىق ۇلاندا «جاس بۇركىت» اسكەري-پاتريوتتىق قوزعالىسى جۇمىس ىستەيدى. بۇگىندە وڭىرلەردە قامقورلىققا الىنعان 61 اسكەري-پاتريوتتىق سىنىپ جانە 7 «جاس بۇركىت» سپورتتىق اسكەري-پاتريوتتىق كلۋب تابىستى جۇمىس ىستەپ كەلەدى.

وتكەن جىلى ارنايى ماقساتتاعى بولىمشەلەر تۋرالى «بۇركىت» كوركەم ءفيلمى ءتۇسىرىلدى. بۇل – ۇلتتىق ۇلاننىڭ باس­تا­ماسىمەن تۇسىرىلگەن ءۇشىنشى فيلم. مەملەكەت باسشىسىنىڭ اسكەرگە شا­قىرۋ جانە اسكەرگە دەيىنگى جاستارمەن جۇمىستى كۇشەيتۋ, ولاردى پاتريوتيزم رۋحىندا تاربيەلەۋ تۋرالى تاپسىرماسىن ىسكە اسىرۋ ماقساتىندا تۇسىرىلگەن ءفيلمنىڭ كەڭ ەكرانعا شىعۋى وسى جىلدىڭ كوكتەمىندە جوسپارلانعان.

ارينە, اسكەري قىزمەتتىڭ ءبىر جىلىندا جاس ساربازدى تاربيەلەۋ, اسكەري ءىستى ۇيرەتۋ جانە فيزيكالىق تۇرعىدان ونى قاتايتۋ وڭاي شارۋا ەمەس. اسكەردە جاس جاۋىنگەرلەر قىزمەتتىڭ ءبىرىنشى كۇنىنەن باستاپ ولاردى ۇلاندىق ورتا­عا بەيىمدەۋگە جانە اسكەري ءىستى وسى تاسىلمەن وقىتۋعا باعىتتالعان تاربيە جانە ۇيىمداستىرۋ ءىس-شارالارى كە­شەندى تۇردە وتكىزىلەدى. جالپى, اسكەري قىزمەتشىلەردىڭ مورالدىق-پسيحو­لوگيا­لىق جاعدايى بۇگىنگى كۇنى بارلىق قىزمەتتىك-جاۋىنگەرلىك مىندەتتەردى ورىنداۋعا مۇمكىندىك بەرەدى. بۇعان قاڭتار وقيعالارى دالەل. سىن ساتتە جاراقات العان اسكەري قىزمەتشىلەردىڭ جاۋىنگەرلىك شەپتەرگە قايتا ورالۋعا تىرىسقانى مورالدىق-پسيحولوگيالىق دايىن­دىقتىڭ جوعارى دەڭگەيىن كورسە­تەدى.

اسكەري قىزمەتشىلەرىمىز كۇندەلىكتى قىزمەت اتقارۋ كەزىندە باتىلدىق, قىرا­عىلىق تانىتىپ, ءتۇرلى جاعدايلاردا ازاماتتارعا كومەكتەسىپ, جانقيارلىق ەرلىك ۇلگىسىن كورسەتىپ ءجۇر. ال كاسىبي مەرەكە كۇنى ۇلتتىق ۇلاننىڭ بارلىق جەكە قۇرامىن, ولاردىڭ وتباسى مۇشەلەرىن, ارداگەرلەرى مەن قىزمەتشىلەرىن قۇتتىق­­­تاپ, قاجىرلى قىزمەتتەرىنە تولايىم تابىس تىلەيمىن.

ەركىن بوتاقانوۆ,

ىشكى ىستەر ءمينيسترىنىڭ ورىنباسارى – ۇلتتىق ۇلاننىڭ باس قولباسشىسى,

گەنەرال-مايور