استانا. 5 ماۋسىم. پاۆلودار وبلىسىندا 3 اۋدانعا جاڭا اكىم تاعايىندالدى. بۇل تۋرالى «قازاقپارات» حابارلادى.
پرەزيدەنت اكىمشىلىگىنىڭ كەلىسىمىمەن, پاۆلودار وبلىسىنىڭ اكىمى قانات بوزىمباەۆتىڭ قاۋلىسىمەن اقسۋ قالالىق ءماسليحاتىنىڭ كەزەكتەن سەسسياسىنىڭ بارىسىندا اقسۋ قالاسىنىڭ جاڭا اكىمى بولىپ قايرات نۇكەنوۆ بەكىتىلدى.
قايرات تەمىرشوت ۇلى 1970 جىلدىڭ 15 قىركۇيەگىندە پالودار وبلىسى جەلەزينسكي اۋدانىنىڭ زاحاروۆكا اۋىلىندا تۋعان. جوعارى ءبىلىمدى. ءسىبىر مەملەكەتتىك اۆتوموبيل-جول اكادەمياسىن, پ.ا.ستولىپين اتىنداعى ومبى مەملەكەتتىك اگرارلىق ۋنيۆەرسيتەتىن بىتىرگەن, ماماندىعى – ەكونوميست جانە عالىم-اگرونوم.
ق.نۇكەنوۆ ەڭبەك جولىن جەلەزينسكي اۋدانىنىڭ «جەلەزينسكي» كەڭشارىنىڭ №2 بولىمىندە جۇمىسشى بولىپ باستاعان. 1992 جىلدان شاعىن جانە ورتا بيزنەس كاسىپورىندارىنا جەتەكشىلىك ەتكەن. 2012 جىلى پاۆلودار وبلىسى جەلەزينسكي اۋدانىنىڭ اكىمى بولدى. ال وسى تاعايىنداۋعا دەيىن پاۆلودار وبلىسىنىڭ كاسىپكەرلىك, ساۋدا جانە تۋريزم باسقارماسىن باسقارىپ كەلدى.
سونىمەن بىرگە, پاۆلودار وبلىسى ماي جانە اقتوعاي اۋداندارىنا دا جاڭا اكىمدەر تاعايىندالدى.
ماي اۋدانىنا بەگزيا زەينوللاقىزى ىسقاقوۆا اكىم بولىپ بەكىتىلدى.
بەگزيا زەينوللاقىزى 1961 جىلى 4 اقپاندا رەسەي فەدەراتسياسى نوۆوۆارشاۆسكي اۋدانىنىڭ ەرماك اۋىلىندا تۋعان. 1985 جىلى پاۆلودار پەداگوگيكالىق ينستيتۋتىن بىتىرگەن. ماماندىعى – ورىس ءتىلى جانە ادەبيەتى ءپانىنىڭ مۇعالىمى.
ەڭبەك جولىن پاۆلودار وبلىسىنىڭ كراسنوۋتسكي مەكتەپ-ينتەرناتىنىڭ تاربيەشىسى بولىپ باستاعان. 1987-2002 جىلدار ارالىعىندا مۇعالىم, مەكتەپ ديرەكتورىنىڭ ورىنباسارى, مەكتەپ ديرەكتورى قىزمەتتەرىن اتقارعان. 2002 جىلدان مەملەكەتتىك قىزمەتتە. ول اقتوعاي اۋدانى اكىمىنىڭ ورىنباسارى, اقتوعاي اۋدانىنىڭ ءبىلىم بەرۋ ءبولىمىنىڭ باستىعى بولدى. ال وسىعان دەيىن اقسۋ قالاسى اكىمىنىڭ ورىنباسارى قىزمەتىن اتقارىپ كەلدى.
سونداي-اق, اقتوعاي اۋدانىنىڭ اكىمى بولىپ سەرىك بارلىباي ۇلى باتىرعوجينوۆ تاعايىندالدى.
سەرىك بارلىباي ۇلى 1964 جىلى پاۆلودار وبلىسى ەرتىس اۋدانىنىڭ كوتەلنيكوۆو اۋىلىندا تۋعان. 1993 جىلى اگرونوم ماماندىعى بويىنشا تسەلينوگراد اۋىل شارۋاشىلىعى ينستيتۋتىن, 2004 جىلى قازاق گۋمانيتارلىق زاڭ ۋنيۆەرسيتەتىن ءبىتىردى.
ەڭبەك جولىن 1982 جىلى گولۋبوۆكي كەڭشارىنىڭ №1 بولىمىندە شوپان كومەكشىسى رەتىندە باستادى. كەيىن گولۋبوۆكي كەڭشارىنىڭ باس اگرونومى بولدى. سونىمەن بىرگە, «بەلوۆودسكي حپپ» اكتسيونەرلىك قوعامىندا, بىرنەشە جاۋاپكەرشىلىگى شەكتەۋلى سەرىكتەستىكتە باسشىلىق قىزمەتتەر اتقاردى. ودان كەيىن قاشىر اۋدانى اكىمىنىڭ ءبىرىنشى ورىنباسارى, اۋداندىق اۋىل شارۋاشىلىعى سالاسىنىڭ باسشىسى, كەيىن قاشىر اۋدانىنىڭ اكىمى بولدى. ال وسى تاعايىنداۋ الدىندا ەرتىس اۋدانى اكىمىنىڭ ورىنباسارى قىزمەتىن اتقاردى.
جولدىباي بازار.
دەرەككوز: «قازاقپارات».
فوتو: egemen.kz.