قازاقستان پرەزيدەنتى جانىنداعى ورتالىق كوممۋنيكاتسيالار قىزمەتىندە سەنات دەپۋتاتى يكرام ادىربەكوۆتىڭ قاتىسۋىمەن بريفينگ ۇيىمداستىرىلدى. بريفينگ اياسىندا ەۋرازيالىق ەكونوميكالىق وداق قۇرۋ تۋرالى شارتقا قول قويىلۋىنا بايلانىستى الداعى ۋاقىتتا جۇزەگە اسىرىلاتىن ينتەگراتسيالىق ۇدەرىستەر تۋراسىندا اڭگىمە قوزعالدى.
سەنات دەپۋتاتى ءوز سوزىندە تاۋەلسىزدىكتىڭ العاشقى جىلدارىنان باستاپ ەل پرەزيدەنتى كورشى ەلدەرمەن ىنتىماقتاستىق پەن ارىپتەستىكتى دامىتۋدى ەل ساياساتىنىڭ نەگىزگى باسىمدىعى رەتىندە ايقىنداپ بەرگەنىنە توقتالدى: «ەلباسى 1992 جىلى قازان ايىندا بۇۇ باس اسسامبلەياسىنىڭ مىنبەرىنەن العاش رەت ءسوز سويلەگەن كەزدە ەۋرازياداعى ەكونوميكالىق كەڭىستىكتى قايتادان جانداندىرۋ كەرەكتىگىنە نازار اۋدارعان بولاتىن. مىنە, بۇگىنگى تاڭدا بۇل يدەيا, وسى ۇسىنىس ناقتى تۇردە ىسكە استى. پرەزيدەنتتىڭ تۇراقتى ۇستانىمىنا سايكەس, وڭىرلىك ينتەگراتسيا ەلدىڭ تەك ەكونوميكالىق مۇددەسىن ىلگەرىلەتۋگە جانە دامىتۋعا باعىتتالاتىن بولادى», دەدى ي.ادىربەكوۆ.
ونىڭ ايتۋىنشا, قازاقستان – حالىقارالىق نارىققا تەڭىز ارقىلى شىعاتىن جولى جوق ەل بولىپ تابىلاتىندىقتان, ىشكى شاعىن نارىق ەلدىڭ ەكونوميكالىق, رەسۋرستىق, ترانزيتتىك الەۋەتىن تولىق اشۋعا, پايدالانۋعا مۇمكىندىك بەرمەيدى. ال ەۋرازيالىق ەكونوميكالىق وداق بيزنەستىڭ ءورىسىن كەڭەيتىپ قانا قويماي, قازاقستاننىڭ 170 ملن. حالقى بار نارىققا شىعۋىنا مۇمكىندىك تۋعىزادى.
دەپۋتات, سونداي-اق, مەملەكەتتىڭ پارمەندى, بەلسەندى ەكونوميكالىق ساياساتىنىڭ ناتيجەسىندە وندىرىستىك ينفراقۇرىلىم قۇرىلىپ, قالىپتاسقانىن, وسىنىڭ ءناتيجەسىندە ەسكى ءوندىرىس ورىندارى قايتادان جاڭارتىلىپ, بۇگىندە ەلىمىزدىڭ بارلىق وڭىرىندە جاڭا كاسىپورىندار سالىنىپ جاتقانىن تىلگە تيەك ەتتى. «وسىنىڭ نەگىزىندە ەلىمىزدە قىسقا مەرزىم ىشىندە جاڭا كاسىپكەرلەر, ءبىلىمدى, بىلىكتى مەنەدجەرلەر توبى پايدا بولدى. بيزنەس تولىقتاي اياعىنان تۇردى. دەمەك, ەندىگى كەزەكتە ينتەگراتسيا كورشى ەلدەرمەن تەڭ ەكونوميكالىق ىقپالداستىق پەن ىنتىماقتاستىققا بارۋعا مۇمكىندىك اشاتىن بولادى. جالپى, ەۋرازيالىق ەكونوميكالىق وداق – ءوندىرىس سالاسىن دامىتۋدىڭ, وتاندىق تاۋاردى ساتۋ نارىعىن كەڭەيتۋدىڭ, ۇلتتىق بيزنەستىڭ باسەكەلەستىك الەۋەتىن ارتتىرۋدىڭ جاڭا مۇمكىندىگى. قازىرگى تاڭدا دۇنيەجۇزىلىك ساۋدا ۇيىمىنا كىرۋگە قاتىستى جۇمىستار قارقىندى تۇردە جۇرگىزىلۋدە. دەمەك, قازاقستاننىڭ وسى ۇيىمعا مۇشە بولۋعا تولىقتاي مۇمكىندىگى بار», دەدى ول ءوز سوزىندە.
بريفينگ اياسىندا سەنات دەپۋتاتى شيكىزاتتىق ەمەس سالانى قارقىندى دامىتۋ ءۇشىن ينۆەستورلارعا قولداۋ كورسەتىلىپ, جاڭا مۇمكىندىكتەر قاراستىرىلاتىنىن دا اتاپ ءوتتى. «پارلامەنت وسى سەسسيانىڭ اياعىنا دەيىن ينۆەستيتسيالىق كليماتتى جاقسارتۋعا باعىتتالعان جاڭا زاڭ قابىلدايتىن بولادى. ماسەلەن, مامانداردىڭ زەرتتەۋىنشە, قازاقستانداعى ينۆەستيتسيالىق احۋال كاسىپكەرلەرگە سالىناتىن سالىق جاعىنان بولسىن, زاڭ تاراپىنان كورسەتىلەتىن جەڭىلدىكتەر جاعىنان بولسىن, مەملەكەت تاراپىنان كورسەتىلەتىن قولداۋ-كومەك پەن سۋبسيديالار جاعىنان بولسىن, بەلارۋس پەن رەسەيمەن سالىستىرعاندا تارتىمدى. قازىرگى كۇننىڭ وزىندە ءبىزدىڭ كاسىپكەرلەرىمىز وسىنداي قولداۋ-كومەكتىڭ ناتيجەسىندە 18-20 پايىز ەسەبىندە ارتىقشىلىققا يە بولۋدا», دەدى دەپۋتات. «ءارينە, بۇل ۇزاق – مەرزىمدى جوبا. قول قويعان شارتتىڭ ءۇش ەلدىڭ پارلامەنتتەرىندە ءبىر كەزەڭدە قارالۋى, راتيفيكاتسيادان ءوتۋى قاراستىرىلىپ جاتىر. وسىعان بايلانىستى, زاڭ جوباسى قىركۇيەك ايىندا پارلامەنت ءماجىلىسىنىڭ قاراۋىنا تۇسەدى دەپ جوبالاپ وتىرمىز», دەي كەلىپ ي.ادىربەكوۆ وسى زاڭ جوباسىن تالقىلاۋ كەزىندە دەپۋتاتتاردىڭ بۇل جۇمىسقا ساراپشىلاردى, مامانداردى تارتۋعا دا مۇمكىندىگى بار ەكەنىن جەتكىزدى.
ءلايلا ەدىلقىزى,
«ەگەمەن قازاقستان».