تاراز – تاريحىمىزدىڭ التىن دىڭگەگى

ساۋلەت ونەرىنىڭ ورتا عاسىرلىق ءىنجۋ-مارجانى ايشا ءبيبى, قا­را­حان, داۋىتبەك كەسەنەلەرى, كيەلى تەكتۇرماس, اقىرتاس ساراي كەشەنى, قالي ءجۇنىستىڭ «شىعىس مونشاسى» جانە بۇگىندە قولعا الىنىپ جاتقان «ەجەلگى تاراز» اسپاناستى مۇرا­جايى سەكىلدى باعا جەتپەس جادىگەرلەر تاراز قالاسىنا ەرەكشە كورىك بەرىپ, جىلدان-جىلعا تۋريستەردىڭ قىزىعۋشىلىعىن ارتتىرىپ كەلەدى. ەلباسى ن.نازارباەۆتىڭ: «تاراز – تاريحىمىزدىڭ التىن دىڭگەگى», دەپ باسا كورسەتۋى وتكەنىمىزگە ىزەت, بۇگىنگى ۇرپاققا زور ماقتانىش ەكەنى انىق. وسىناۋ كيەلى ولكەدە ەجەلگى داۋىرلەردەن, ورتا عاسىرلاردان, كەيىنگى تاريحىمىزدان جەتكەن ۇزىن سانى 1000-نان اسىپ جىعىلاتىن تاريحي-مادەني مۇرالار بار. راس, مۇنداي مۇرالار تەك ءبىر ەلدىڭ, ءبىر ۇلتتىڭ مۇددەسى ءۇشىن ەمەس, بۇكىل جەر شارىن مەكەن ەتەتىن ادامزات ءۇشىن قىزمەت ەتۋى ءتيىس. جامبىل وبلىسىنىڭ اكىمدىگى كونە تاريحىمىزدى تۇگەندەۋگە, زەردەلەۋگە جان-جاقتى قولداۋ كورسەتىپ كەلەدى. بيىل مادەنيەت سالاسىنا 3,8 ملرد. تەڭگە نەمەسە 2013 جىلعىدان 34,7 پايىزعا ارتىق قاراجات قاراستىرىلدى. سونداي-اق, «مادەني مۇرا» رەسپۋبليكالىق باعدارلاماسى بويىنشا جۇرگىزىلگەن ەجەلگى تاراز قالاسى ورنىنداعى عىلىمي-ارحەولوگيالىق زەرتتەۋ جۇمىستارى كەزىندە تابىلعان جادىگەرلەر كونە تاريحىمىزدان كوپ سىر شەرتەدى. وتكەن جىلى «ەجەلگى تاراز» قالاشىعىندا جۇرگىزىلەتىن ارحەولوگيالىق عىلىمي-زەرتتەۋ جۇمىستارىنا وبلىس بيۋدجەتىنەن 130 ملن. تەڭگە ءبولىنىپ, قازبا جۇمىستارىنىڭ ءۇشىنشى كەزەڭى اياقتالعان بولاتىن. ناتيجەسىندە 33 000 قىش قۇمىرا بۇيىمدارىنىڭ سىنىقتارى تابىلدى. ولاردىڭ ىشىندە 107 داناسى بۇتىندەي ساقتال­عان. بيىل وبلىس بيۋدجەتىنەن 100 ملن. تەڭگە ءبولىنىپ, ارحەولو­­گيا­­لىق عىلىمي-زەرتتەۋ جۇمىستارى جالعاسىن تاپقالى وتىر. جانە 50 ملن. تەڭگەگە ۋاقىتشا شاتىر ورناتىلادى. سونداي-اق, بيىلدان باستاپ, «ەجەلگى تاراز» قالاشىعى ورنىندا «كونە تاراز – ماڭگىلىك ەلدىڭ بەسىگى» اتتى «ارحەولوگيالىق ساياباقتىڭ» بيزنەس-جوسپارى جاسالۋدا. اتالعان تاقىرىپتاعى بيز­نەس جوسپار نەگىزىندە «ەجەلگى تاراز» قالاشىعىن اشىق اسپان استى مۇرا­جايىنا اينالدىرىپ, تۋريستىك كلاستەردى دامىتۋ جۇمىستارى ىسكە اساتىن بولادى. مۇنىڭ بارلىعى ارينە, وتكەننىڭ ورنىن تولتىرۋعا, تاريح سىرىن ۇعىنۋعا تىرىسقان ىلكىمدى ءىس-شارالار بولىپ تابىلادى. ورالحان ءداۋىت, «ەگەمەن قازاقستان». جامبىل وبلىسى. سۋرەتتەردى تۇسىرگەن اقادىل رىسماحان.