الەم جاڭالىقتارى

شاراينا

يسپان مونارحى تاقتان باس تارتتى 76 جاستاعى يسپان مونارحى حۋان كارلوس تاقتان باس تارتتى. ەندى ونىڭ ۇلى فەليپە كورول بولادى. حۋان كارلوس 39 جىل بويىنا مەملەكەت باسشىسى بولىپ كەلگەن ەدى. ونىڭ تاقتان باس تارتقانى تۋرالى يسپانيا پرەمەر-ءمينيسترى ماريانو راحوي حابارلاعان. جوعارى مارتەبەلى كورول حۋان كارلوس ءوز ۇلى, حانزادا فەليپەنىڭ پايداسىنا تاقتان باس تارتتى, دەپ مالىمدەگەن مينيسترلەر كابينەتىنىڭ باسشىسى. سوڭعى جىلدارى حۋان كارلوستىڭ دەنساۋلىعى سىر بەرە باستاعان بولاتىن. ول 2012 جىلى بوتسۆانادا ءپىل اۋلاۋ كەزىندە مىقىنىن ءۇش جەردەن سىندىرىپ العان ەدى. وتا جاساۋ ءساتسىز ءوتىپ, ينفەكتسيا تۇسۋىنە بايلانىستى 2013 جىلى  مونارحقا ەكىنشى رەت وپەراتسيا جاساۋعا تۋرا كەلگەن. سونىمەن بىرگە, ءپىل اۋلاۋدىڭ حۋان كارلوستىڭ بەدەلىنە نۇقسان كەلتىرگەنىن دە ايتا كەتۋ كەرەك. ونىڭ اڭشىلىقپەن كوڭىل كوتەرۋى جانۋارلاردى قورعاۋشىلارعا ۇناعان جوق. پەلەنىڭ ۇلى 33 جىلعا سوتتالدى «سانتوس» كلۋبىنىڭ بۇرىنعى قاقپاشىسى, داڭقتى فۋتبولشى پەلەنىڭ ۇلى ەدسون چولبي ناسيمەنتۋ ەسىرتكى ساۋداسىمەن اينالىسقانى ءۇشىن 33 جىلعا باس بوستاندىعىنان ايىرىلدى. كوشەدەگى جارىسقا قاتىسىپ, سونىڭ سالدارىنان ءبىر موتوتسيكلشىنىڭ قازا تابۋىنا بايلانىستى ول التى ايعا باس بوستاندىعىنان ايىرىلعاندىقتان, قاقپاشىعا 29 جاسىندا سپورتتان كەتۋگە تۋرا كەلگەن ەدى. ال 2005 جىلى ول كوكاين ساتقانى ءۇشىن قاماۋعا الىنىپ, 2006 جىلى بوستاندىققا شىققان. ايتا كەتۋ كەرەك, ونىڭ اكەسى پەلە ءۇش دۇركىن الەم چەمپيونى, فيفا نۇسقاسى بويىنشا حح عاسىردىڭ ەڭ ۇزدىك فۋتبولشىسى. برازيليا قۇراماسى قاتارىندا 92 ماتچ وتكىزىپ, قارسىلاستار قاقپاسىنا 77 دوپ سوققان. تەل-اۆيۆ قارسى سوققى جاسادى يزرايل اسكەرى سيريا تاراپىنان بولعان اتقىلاۋلارعا ارتيللەريادان وق جاۋدىردى جانە گازا سەكتورىنان جىبەرىلگەن زىمىرانعا قارسى جاۋاپ رەتىندە اۋە سوققىلارىن جاسادى. سيريا جاعىنان اتىلعان سنارياد تەل-ءاۆيۆتىڭ باقىلاۋىنداعى گولان قىرقاسى اۋماعىنا ءتۇسىپ جارىلعان بولاتىن. زارداپ شەككەندەر تۋرالى اقپارات جوق. بۇل وقيعا پالەستينانىڭ بىرەگەي ۇكىمەتى انت قابىلداۋعا بىرنەشە ساعات قالعاندا ورىن الدى. ول فاتح جانە حاماس قوزعالىستارىنىڭ ءوزارا بىتىمگە كەلۋى ناتيجەسىندە قۇرىلعان بولاتىن. گولاند قىرقاسىنىڭ ءجيى-ءجيى وق استىندا قالاتىنىن ايتا كەتۋ كەرەك. جانە سيريالىق وپپوزيتسيا مەن ۇكىمەت اسكەرلەرى اراسىنداعى قاقتىعىس بارىسىندا سناريادتار كوپتەگەن جاعدايلاردا بۇل جەرگە كەزدەيسوقتان دا كەلىپ ءتۇسىپ جاتادى. ءۇندىستاندا جاڭا شتات پايدا بولدى ءۇندىستاننىڭ وڭتۇستىگىندەگى اندحرا-پرادەش شتاتى رەسمي تۇردە ەكى بولىككە ءبولىنىپ, ونىڭ سولتۇستىك اۋماعىندا جاڭا 29-شى شتات قۇرىلدى. وعان تەلانگانا دەگەن اتاۋ بەرىلگەن. جاڭا شتات قۇرۋ تۋرالى شەشىمدى ءۇندى بيلىگى ۇستىمىزدەگى جىلدىڭ اقپان ايىندا قابىلداعان بولاتىن. جەرگىلىكتى تۇرعىندار ءوڭىردىڭ جەتكىلىكسىز قارجىلاندىرىلاتىنىنا ۇزاق ۋاقىتتار بويى نارازىلىق ءبىلدىرىپ كەلدى. اندحرا-پرادەشتىڭ استاناسى بولىپ تابىلاتىن حايداراباد قالاسى جاڭا پايدا بولعان قۇرىلىمنىڭ دا اكىمشىلىك ورتالىعى بولىپ تابىلادى. اندحرا-پرادەشتىڭ ءوز اكىمشىلىك ورتالىعى پايدا بولعانعا دەيىن حايداراباد 10 جىل بويى ەكى شاتتىڭ استاناسى بولىپ قالا بەرەدى. چەرچيللدىڭ كىشى قىزى دۇنيەدەن ءوتتى ۇلبريتانيادا 92 جاسقا قاراعان شاعىندا ۋينستون چەرچيللدىڭ كىشى قىزى مەري سوامس قايتىس بولدى. بۇل تۋرالى 1 ماۋسىم كۇنى ۆۆس News اگەنتتىگى حابارلادى. تۋعانداعى اتى-ءجونى بويىنشا مەري سپەنسەر-چەرچيلل ەكىنشى دۇنيەجۇزىلىك سوعىس جىلدارىندا كومەكشى قىزمەتتىڭ كىشى وفيتسەرى شەنىنە يە بولدى. ول كوپتەگەن ماڭىزدى ساپارلاردا, سونىڭ ىشىندە 1945 جىلى چەرچيلل امەريكالىق پرەزيدەنت گارري ترۋمەنمەن جانە كەڭەستىك كوسەم يوسيف ستالينمەن كەزدەسىپ, گەرمانيا مەن ەۋروپانىڭ سوعىستان كەيىنگى بولاشاعىن تالقىلاعان پوتسدام كونفەرەنتسياسىنا بارعان كەزدە دە اكەسىنىڭ قاسىندا ەرىپ ءجۇردى. سوڭعى جىلدارى مەري سوامس قايىرىمدىلىقپەن اينالىسىپ, ومىرباياندىق كىتاپتار جازدى. رەسەي ەكپا سەسسياسىنا قاتىسپايدى مەملەكەتتىك دۋمانىڭ حالىقارالىق ىستەر جونىندەگى كوميتەتىنىڭ توراعاسى الەكسەي پۋشكوۆ رەسەيلىك دەلەگاتسيانىڭ ەۋروپا كەڭەسى پارلامەنتتىك اسسامبلەياسىنىڭ ماۋسىم ايىنداعى سەسسياسىنا قاتىسپايتىنىن مالىمدەدى. ءبىز ءبىزدىڭ دەلەگاتسياعا قارسى سانكتسيا كۇشىندە تۇرعان كەزىندە اسسامبلەيامەن قىزمەتتەستىكتى ۋاقىتشا توقتاتامىز, دەپ اتاپ وتكەن ول «يزۆەستيا» گازەتىنە بەرگەن سۇحباتىندا. ونىڭ ايتۋىنشا, 26 مامىردا, ەكپا پرەزيدەنتتىك كوميتەتىنىڭ مۇشەسى تيني كوكسكە, ول ماسكەۋگە كەلىپ, مەملەكەتتىك دۋما توراعاسى سەرگەي نارىشكينمەن كەزدەسكەن كەزدە ءمالىم ەتىلگەن. ونىڭ سىرتىندا وسىدان بىرنەشە كۇن بۇرىن نارىشكين ەكپا ءتورايىمى اننا براسسەردىڭ اتىنا جولداعان حاتتا دا ول تۋرالى ناقتى ايتىلعان. كورپوراتيۆتىك ۇشاق اپاتقا ۇشىرادى Gulfstream جەكە ۇشاعى حەنسك-فيلد اۋەجايىنىڭ ۇشۋ-قونۋ جولاعىنان اسا بەرىپ, شامامەن العاندا بوستون قالاسىنان 30 شاقىرىم جەردە جارىلعان. جەرگىلىكتى بيلىكتىڭ اقپاراتىنشا, كورپوراتيۆتىك ۇشاق بورتىنداعى 7 ادامنىڭ ءبارى دە قازا تاپقان. ۇشاق 31 مامىر كۇنى اقش-تىڭ «ويىن استاناسى» اتلانتيك-سيتيگە ۇشىپ بارۋعا ءتيىس بولاتىن. قازا تاپقانداردىڭ اتى-جوندەرى مەن قايعىلى وقيعانىڭ سەبەپتەرى ازىرگە ايتىلماي وتىر. تەرگەۋ جۇمىستارىمەن كولىكتەگى ۇلتتىق قاۋىپسىزدىك باسقارماسى مەن فەدەرالدىق اۆياتسيا باسقارماسى اينالىسۋدا. بوستون حالىقارالىق اۋەجايىنىڭ ارىپتەسى رەتىندە جۇمىس ىستەپ كەلگەن اەرودروم وسى وقيعادان كەيىن ءبىرجولا جابىلعان. ينتەرنەت ماتەريالدارى نەگىزىندە ازىرلەندى.