قازاقستان رەسپۋبليكاسىنىڭ سىرتقى ىستەر ءمينيسترى ەرلان ىدىرىسوۆ ارگەنتينا سىرتقى ىستەر ءمينيسترى ەكتور تيمەرمانمەن ونىڭ قازاقستانعا رەسمي ساپارى اياسىندا كەزدەستى. بۇل لاتىن امەريكاسى مەملەكەتى سىرتقى ساياسات ۆەدومستۆوسى باسشىسىنىڭ قازاق ەلىنە العاشقى ساپارى بولىپ تابىلادى, دەپ حابارلادى قر ءسىم-ءىنىڭ ءباسپاسوز قىزمەتى.
سۇحباتتاسۋشىلار ەكونوميكا, ساۋدا, ينۆەستيتسيا, تۋريزم سالاسىنداعى قازاقستان-ارگەنتينا ىنتىماقتاستىعى ماسەلەلەرى مەن حالىقارالىق كۇن تارتىبىندەگى وزەكتى ماسەلەلەردى تالقىلادى.
«ءبىزدىڭ ەلدەرىمىز اراسىنداعى ۇقساستىقتار وتە كوپ, ءبىزدىڭ كوزقاراستارىمىز بەن ادامزات الدىندا تۇرعان تۇراقتى دامۋ مەن ەكولوگيا, يادرولىق قاۋىپسىزدىك پەن كوپپوليارلى الەمدى نىعايتۋ ماسەلەلەرىندەگى قاۋىپ-قاتەرلەردى شەشۋ ءتاسىلدەرىمىز وتە ۇقساس», دەپ اتاپ ءوتتى ە.ىدىرىسوۆ.
«ءبىز ارگەنتينانىڭ وسى جىلدىڭ ەكىنشى جارتىسىندا وكىلەتتى بيزنەس-دەلەگاتسياسىن قازاقستانعا باعىتتاۋدى جوسپارلاپ وتىرعانىنا قۋانىشتىمىز. ءبىز ارگەنتينالىق بيزنەسمەندەرگە ءوز تاراپىمىزدان ولاردىڭ قازاقستاندىق ارىپتەستەرىمەن ىنتىماقتاستىقتارىن باستاي الاتىنداي مازمۇندى باعدارلاما دايىنداماقپىز», دەپ اتاپ ءوتتى قر ءسىم-ءىنىڭ باسشىسى. ول, سونىمەن قاتار, ساۋدا-ەكونوميكالىق ىنتىماقتاستىق جونىندە ەكىجاقتى كوميسسيا قۇرۋ جوسپارى مەن ارگەنتينا تاراپىنىڭ قازاقستاننىڭ دۇنيەجۇزىلىك ساۋدا ۇيىمىنا كىرۋ ماسەلەسىنە قولداۋ كورسەتۋ تۋرالى كەلىسسوزدەردىڭ جالعاسىپ جاتقانىنا نازار اۋداردى.
ەكى ەلدىڭ سىرتقى ساياسات ۆەدومستۆولارىنىڭ باسشىلارى, سونداي-اق, حالىقارالىق ۇيىمدار شەڭبەرىندەگى ىنتىماقتاستىقتى تالقىعا سالدى. «ءبىز ەلدەرىمىزدىڭ بۇۇ-نىڭ ءتۇرلى قۇرىلىمدارىنا ۇمىتكەرلىكتى ءوزارا قولداپ وتىراتىنىمىزعا قۋانىشتىمىز جانە مەن ءوزىمنىڭ ارىپتەسىمە ارگەنتينانىڭ 2017-2018 جىلدارعا بۇۇ قك تۇراقتى ەمەس مۇشەلىگىنە قازاقستان كانديداتۋراسىن قولداعانى ءۇشىن ەرەكشە العىسىمدى بىلدىرەمىن. ارگەنتينانىڭ قولداۋى ءبىز ءۇشىن وتە قۇندى جانە ءبىز بولاشاقتا بۇۇ قك قۇرامىندا بولا وتىرىپ, ورتاق ءمۇددەلەرىمىزدى قورعاۋعا نيەتتىمىز», دەپ مالىمدەدى ە.ىدىرىسوۆ.
ءبىزدىڭ ەلدەرىمىز اراسىنداعى جان-جاقتى ىنتىماقتاستىقتاردى تەرەڭدەتۋگە سەرپىن بەرەتىن قازاقستان رەسپۋبليكاسىنىڭ ۇكىمەتى مەن ارگەنتينا رەسپۋبليكاسىنىڭ ۇكىمەتى اراسىنداعى ازاماتتاردىڭ ۆيزاسىز ساپارلارى تۋرالى كەلىسىمگە قول قويۋ كەلىسسوزدەردىڭ ماڭىزدى قورىتىندىسى بولدى. قازاقستان سىرتقى ساياسات ۆەدومستۆوسىنىڭ باسشىسى قازاقستاندىق ءسىم الەم ەلدەرىمەن ۆيزاسىز رەجىم ورناتۋ بويىنشا جۇمىسىن بەلسەندى تۇردە جالعاستىراتىنىن, ونىڭ ىشىندە تاعى ءبىر لاتىن امەريكاسىنداعى مەملەكەت – چيليمەن ورناتۋ جوسپارى بار ەكەنىن مالىمدەدى. قازاقستان وتكەن جىلى چيليمەن ەكى ەل رەسمي دەلەگاتسيالارى ءۇشىن ۆيزاسىز ساپار جاساۋ تۋرالى كەلىسىمگە قول قويعان بولاتىن.
ە.تيممەرمان ءوز كەزەگىندە ەكى جاقتى قاتىناستار دامۋىنىڭ جوعارى سەرپىنىن اتاپ ءوتىپ, ءوز ەلىنىڭ تاۋ-كەن, اۋىل شارۋاشىلىعى جانە اتوم ونەركاسىبى سالالارىندا ىنتىماقتاسۋعا دەگەن قىزىعۋشىلىعى بار ەكەنىن ءبىلدىردى. ول, سونداي-اق, ارگەنتينا ءسىم باسشىسىنىڭ قازاقستانعا تۇڭعىش ساپارىنىڭ ماڭىزى جوعارى ەكەنىن اتاپ كورسەتتى. كەزدەسۋ سوڭىندا ەكى ەل ءوزارا ءتيىمدى قارىم-قاتىناس ورناتاتىنىنان ءۇمىتتى ەكەنىن جەتكىزدى.