قازاقستاننىڭ ۇلتتىق ءبىلىم بەرۋ سالاسىنىڭ برەندى بولىپ تابىلاتىن ەلىمىزدىڭ بەدەلدى جوعارى وقۋ ورنى نازارباەۆ ۋنيۆەرسيتەتىنىڭ سوڭعى ءۇش جىلداعى كورسەتكىشى بويىنشا رفمش قازاقستاننىڭ «ەڭ ۇزدىك» مەكتەبى بولىپ وتىر. سوڭعى ءتورت جىل ىشىندە مەكتەپتىڭ 184 تۇلەگى وسى وقۋ ورنىنىڭ ستۋدەنتى اتاندى.
ەل اراسىندا №1 مەكتەپ رفمش دەگەن اتاۋمەن بەلگىلى و.جاۋتىكوۆ اتىنداعى رەسپۋبليكالىق مامانداندىرىلعان فيزيكا-ماتەماتيكا ورتا مەكتەپ-ينتەرناتى (رمفمومي) ەلىمىزگە عانا ەمەس الىس جانە جاقىن شەتەلدەرگە دە تانىمال.1972 جىلى قۇرىلعان بۇل ءبىلىم ۇياسى ون جىلدان استام «ۇزدىك وليمپيادا مەكتەبى» جانە «ۇزدىك وليمپيادا كومانداسى» اتىن ابىرويمەن ارقالاپ كەلەدى. دەمەك, بولاشاقتى ويلايتىن جاسوسپىرىمدەر مەن ولاردىڭ اتا-انالارى فيزيكا-ماتەماتيكالىق ءبىلىمنىڭ نەگىزىن قالىپتاستىراتىن رەسپۋبليكالىق فيزماتقا ءتۇسۋدى ارماندايدى.
قازاقستاننىڭ بارلىق ايماعىنىڭ تالانتتى بالالارىن وقىتۋدى كوزدەيتىن مەكتەپ-ينتەرناتتا جىل سايىن 900-گە جۋىق بالا ءبىلىم الادى. قازىرگى تاڭدا مۇندا ەلىمىزدىڭ بارلىق وبلىستارىنان كەلگەن 320 بالا بار. مەكتەپتىڭ جاڭا عيماراتىنىڭ قۇرىلىسى اياقتالعان سوڭ ينتەرناتتاعى ورىن 500-گە دەيىن كەڭەيەدى. بۇل ءبىلىم ۇياسىندا 2003 جىلدان بەرى رمفمومي جانە م.ۆ.لومونوسوۆ اتىنداعى ممۋ تۇلەگى, فيزيكا-ماتەماتيكا عىلىمدارىنىڭ كانديداتى ق.ماقىشوۆ باسشىلىق ەتەدى.
رمفمومي-دىڭ كوپتەگەن تۇلەكتەرى – ەرەكشە كورپوراتيۆتىك مادەنيەتىمەن دارالانعان ىقپالدى ساياساتكەرلەر, عالىمدار مەن ىسكەر بيزنەسمەندەر, ءوز سالاسىنىڭ بىلگىرلەرى مەن جاڭاشىلدارى. ولاردىڭ قاتارىندا ك.ءماسىموۆ, ت.ق ۇلىباەۆ, ق.كەلىمبەتوۆ ە.قاليەۆ, ب.سۇلتانوۆ, ن.قاپپاروۆ, ە.دوساەۆ, ق.قوجامجاروۆ, ت.احسامبيەۆ, ە.ساعاديەۆ, د.ەرەنچينوۆ, س.نۇرعيساەۆ, د.ابىلعازين, ۆ.كيم, ب.كانيەۆ, م.ابدراحمانوۆ, ا.سۇلتانعازين, ا.پاك, ي.شكولنيك, اسقار جانە ءانۋار جۇمادىلداەۆتار, ف.قۋانعانوۆ, ە.بەيسەمبەتوۆ, ا.قۇسايىنوۆ, تاعى باسقا تانىمال ازاماتتار بار. «ياندەكس» كومپانياسىنىڭ (رەسەي) نەگىزىن قالاۋشىلار ا.ۆولوج بەن ي.سەگالوۆيچ تە وسى رمفمومي تۇلەكتەرى.
سوڭعى ون جىلدا 650-گە جۋىق مەكتەپ تۇلەگى الەمنىڭ گارۆارد, يەل, ميچيگان, كارنەگي, كەمبريدج, وكسفورد, باۋمان, بەركلي سەكىلدى 25 ەلىنىڭ ۇزدىك ۋنيۆەرسيتەتتەرىندە ءبىلىم الدى. سونداي-اق, جىل سايىن مۇنداعى وقۋشىلار تۇراقتى نەگىزدە رەسەي, سينگاپۋر, قىتاي, كورەيا جانە تاعى باسقا ەلدەردىڭ ۇزدىك ۋنيۆەرسيتەتتەرىنىڭ گرانتتارىن الادى. مەكتەپتە وسى ماقساتتا اعىلشىن ءتىلىن وقىتۋ جانە حالىقارالىق ەمتيحانداردى ويداعىداي تاپسىرۋ ءۇشىن بارلىق جاعدايلار جاسالعان. سوڭعى 9 جىلدا فيزماتتىقتاردىڭ بەسەۋى الەمنىڭ ەڭ مىقتى جوعارى وقۋ ورنى ماسساچۋسەت تەحنولوگيالىق ۋنيۆەرسيتەتىنە ء(مىت, اقش) ءتۇستى.
رمفمومي-دا وليمپيادالىق قوزعالىستى دامىتۋ ءۇشىن بارلىق جاعدايلار جاسالعان. دۇنيەجۇزىلىك وليمپيادالاردان ء(ىمو, ءىرھو, ءىوى, ءىسھو) قازاقستاننىڭ جۇلدە قورىنا مەكتەپ وليمپياداشىلارى سوڭعى 10 جىل ىشىندە 32 مەدال اكەلدى. ولاردىڭ 2-ءۋى التىن, 10-ى كۇمىس, 20-ى قولا. ولار جىل سايىن الەمنىڭ 16 ەلىندە وتەتىن 30-دان استام حالىقارالىق وليمپيادالارعا, عىلىمي سايىستارعا قاتىسىپ, سوڭعى بەس جىل ىشىندە 527 ماراپاتقا يە بولدى. تەك وتكەن وقۋ جىلىنىڭ وزىندە حالىقارالىق وليمپيادالار مەن سايىستاردان 119 مەدال جەڭىپ الىندى.
مەكتەپتى جىل سايىن 50-دەن استام «التىن بەلگى» اتتەستاتىنىڭ يەگەرلەرى بىتىرەدى. سوڭعى 6 جىلدا 310 تۇلەك وسىنداي توسبەلگى يەسى اتاندى. بيىلعى جىلى وقۋ ۇزدىگىنىڭ وسىنداي جوعارى اتاعىن 84 ۇمىتكەر, ال كەلەسى وقۋ جىلى 129 ۇمىتكەر راستايدى دەپ كۇتىلۋدە. ۇبت-نىڭ ورتاشا بالى جىل سايىن 110-نان اسىپ تۇر.
رمفمومي-دا حالىقارالىق جانە رەسپۋبليكالىق جوبالار ءساتتى جۇزەگە اسىرىلىپ جاتىر. ولاردىڭ باستاماشىسى بولىپ تابىلاتىن مەكتەپ ديرەكتورىنا وسى ءبىلىم ۇياسىنىڭ پەداگوگيكالىق ۇجىمى بەلسەندى قولداۋ كورسەتەدى. ماتەماتيكا, فيزيكا جانە ينفورماتيكا بويىنشا وتكىزىلىپ جۇرگەن حالىقارالىق جاۋتىكوۆ وليمپياداسى, قازاقستان ماتەماتيك جانە فيزيك مۇعالىمدەرىنىڭ رەسپۋبليكالىق شىعارماشىلىق كونكۋرستارى, رەسپۋبليكالىق عىلىمي كوپشىلىك «فيزمات» جۋرنالى, 2012 جىلى مەكتەپ بازاسىندا قۇرىلعان قازاقستان ماتەماتيك مۇعالىمدەرىنىڭ اسسوتسياتسياسى... مىنە, وسى جانە تاعى باسقالارى جىل سايىن مەكتەپتە ساتىمەن جۇزەگە اسىرىلىپ جۇرگەن جوبالاردىڭ تىزبەسى.
رمفمومي-دىڭ دارىندى بالالاردى وقىتۋ مەن تاربيەلەۋدەگى ۇلكەن جەتىستىگى دەپ مەكتەپتىڭ بۇرىنعىشا ەلىمىزدىڭ ورتا ءبىلىم بەرۋ جۇيەسىندە كوشباسشىلىق ورىن الاتىندىعىن ايتۋعا بولادى. بۇل ءبىلىم ۇياسىنىڭ وسىنداي جەتىستىككە جەتۋىنە مەملەكەتتىڭ ورتا ءبىلىم بەرۋ سالاسىنا ۇدايى نازار اۋدارۋى, ءبىلىم جانە عىلىم مينيسترلىگىنىڭ قولداۋى, «رمفمومي تۇلەكتەرىنىڭ قورى» مەن قامقورشىلىق كەڭەسى دەمەۋشىلەر مەن سەرىكتەستەردىڭ كومەگى جاقسى جاعداي تۋعىزۋدا.
وسىنداي مەكتەپتىڭ وقۋشىسى مەن تۇلەگى بولۋ – ءاربىر تالانتتى بالانىڭ ارمانى. دەمەك, ەلىمىزدىڭ ماتەماتيكادان دارىندى كەز كەلگەن وقۋشىسى رفمش شاكىرتى اتانىپ, مەكتەپتىڭ جاڭا جەڭىسىنە ءوز ۇلەسىن قوسا الادى. دارىندى بالالارعا جاڭا وقۋ جىلىندا مەكتەپ ەسىگى ايقارا اشىق.
مايا ەسماعامبەتوۆا.
الماتى.