بۇل ارادا مىنانى اتاپ ايتقان ءجون – «ينتەرگاز ورتالىق ازيا» اق 1997 جىلدىڭ شىلدە ايىندا قۇرىلعان. كومپانيا ءوزىنىڭ كونتسەسسياسىنا بەرىلگەن قازاقستاننىڭ گاز تاسىمالداۋ جۇيەسىن تىكەلەي باسقارۋدى جۇزەگە اسىرادى جانە «قازترانسگاز» اق («قازمۇنايگاز» ۇك» اق ەنشىلەس كاسىپورنى) قۇرامىنا كىرەدى. كومپانيا ەلىمىزدە جىلدىق وتكىزۋ قابىلەتى 190 ملرد. تەكشە مەترگە دەيىنگى, ۇزىندىعى 14 مىڭ كيلومەتردەن اساتىن ماگيسترالدىق گاز قۇبىرلارىنىڭ نەگىزگى جەلىسىن باقىلايدى.
بالالاردى قورعاۋدىڭ حالىقارالىق كۇنى مەرەكەسىندە «قازترانسگاز» اكتسيونەرلىك قوعامى «دار» جانە «كZ» قوعامدىق قورلارىمەن بىرلەسىپ استانادا تۇراتىن تۇرمىسى تومەن جانە كوپبالالى وتباسىلارىنىڭ بالدىرعاندارىنا ارناپ «باقىتتى بالا» دەگەن اتپەن قايىرىمدىلىق شاراسىن وتكىزدى.
انە-مىنە دەگەنشە جىل سايىن بالالار اسىعا كۇتەتىن مەرەكە دە كەلىپ جەتتى. بالانىڭ ءبارى بىردەي ەمەس پە؟ بارلىعى دا سىيلىق العىسى, مەرەكەدە الاڭعا شىعىپ, ءماز-مەيرام بولىپ ويناعىسى كەلەدى. جالپى, دۇنيەدە ۇلكەندەر ءۇشىن بالانى قۋانتۋدان اسقان قانداي مارتەبە بار دەسەڭىزشى! مىنە, «قازترانسگاز» اكتسيونەرلىك قوعامى دا ءبۇلدىرشىندەرگە قامقورلىعىن ايانىپ قالماي, 2 ميلليون تەڭگەدەن استام اقشا جۇمساپ, قۋانىش سىيلاۋدى ماقسات ەتتى. بولىنگەن قاراجاتقا جەتكىنشەكتەردىڭ وي-ءورىسىن, ويلاۋ قابىلەتىن دامىتۋعا باعىتتالعان كىتاپتار, ويىندار, شىعارماشىلىق جيىنتىقتار جانە سپورتتىق كەرەك-جاراقتار ساتىپ الىندى.
– ءبىزدىڭ قايىرىمدىلىق قىزمەتىمىزدىڭ باستى ماقساتى – بالا جۇرەگىن قۋانىشقا بولەۋ. ولاردى وزدەرىنە كەرەك نارسەلەردى الىپ بەرۋ ارقىلى عانا قۋانتۋعا بولادى. سول ءۇشىن ءبىز شىنايى كومەك كورسەتىپ وتىرمىز, – دەيدى «قازترانسگاز» اق باس ديرەكتورى سەرىك سۇلتانعالي شارا بارىسىندا.
جىل باسىنان بەرى «قازترانسگاز» اكتسيونەرلىك قوعامى 300 ميلليون تەڭگەدەن استام سوماعا دەمەۋشىلىك جانە قايىرىمدىلىق كومەك كورسەتىپتى. ۇلى وتان سوعىسىنىڭ ارداگەرلەرىنە, ونىڭ ىشىندە اقمولا وبلىسىندا جانە ءوڭىر ورتالىعى كوكشەتاۋ قالاسىندا تۇراتىن 50 سوعىس ارداگەرىنىڭ ارقايسىسىنا 50 مىڭ تەڭگەدەن اقشالاي سىيلىق تابىستالدى جانە دە گاز سالاسىنىڭ ارداگەرلەرىنە كومەك كورسەتىپ كورەگەندىك جاساپتى. كومپانيا قازاقستاندىق سپورتشىلاردى قولداۋعا جىل سايىن شامامەن 100 ميلليون تەڭگە بولەدى. اكتسيونەرلىك قوعامنىڭ ەندىگى جوسپارىندا بالالار ۇيلەرىنە كومەك كورسەتۋ جونىندەگى قايىرىمدىلىق قىزمەتتى ودان ءارى جالعاستىرىپ, بارىنشا كەڭەيتۋ مىندەتى تۇر. مىنە, تاپقان تابىسىنىڭ بەلگىلى ءبىر بولىگىن قايىرىمدىلىق پەن دەمەۋشىلىككە ءبولىپ جۇرگەن كومپانيانىڭ كۇنى كەشە اتقارعان شارۋاسىنىڭ ءبىر پاراسى ناق وسىنداي.
مارات اققۇل,
«ەگەمەن قازاقستان».