پرەزيدەنتتىككە ۇمىتكەر قاسىم-جومارت توقاەۆتىڭ جاقتاستارى باتىس قازاقستان وبلىسىنىڭ تۇرعىندارىمەن كانديداتتىڭ ەكولوگيانى جاقسارتۋعا ارنالعان باسىمدىقتارىن تالقىلادى.
بۇل – كانديداتتىڭ سايلاۋ الدىنداعى باعدارلاماسىندا بەلگىلەنگەن مىندەتتەردىڭ ءبىرى.
«باتىسقازاقستاندىقتاردى الاڭداتىپ وتىرعان ماڭىزدى پروبلەمالاردىڭ ءبىرى – جايىق وزەنىنىڭ تارتىلۋى. تابيعي رەسۋرستاردى ءتيىمدى پايدالانۋ مەملەكەت ساياساتىنىڭ ماڭىزدى باسىمدىقتارىنىڭ قاتارىندا. سوعان بايلانىستى سۋ رەسۋرستارىن ءتيىمدى پايدالانۋ, قورعاۋ جانە تازالاۋ ۇلكەن مانگە يە. بۇل باعىتتا قوعامنىڭ بەلسەندى ۇستانىمى اسا ماڭىزدى», دەدى رەسپۋبليكالىق قوعامدىق شتاب دەلەگاتسياسىنىڭ باسشىسى ماۋلەن اشىمباەۆ.
ورال قالاسىندا رەسپۋبليكالىق قوعامدىق شتاب مۇشەلەرى وبلىستىڭ زيالى قاۋىم وكىلدەرىمەن, قوعام بەلسەندىلەرىمەن بىرگە كانديدات ۇسىنعان وتاندىق مادەنيەت پەن ونەردى قولداۋعا جانە دامىتۋعا ارنالعان شارالار تۋرالى دا پىكىر الماستى. سونداي-اق شتاب مۇشەلەرى «جايىقجىلۋقۋات» اق الاڭىندا وڭىردەگى كوممۋنالدىق كاسىپورىنداردىڭ وكىلدەرىمەن كەزدەسىپ, باتىسقازاقستاندىقتارعا ق.توقاەۆتىڭ سايلاۋ الدىنداعى باعدارلاماسىنىڭ نەگىزگى باعىتتارى تۋرالى ايتىپ بەردى. ناقتى ايتقاندا, كەزدەسۋدە ەنەرگەتيكالىق قۋاتتى جاڭعىرتۋعا, ينجەنەرلىك جەلىلەردى سالۋعا جانە جوندەۋگە ارنالعان باسىمدىقتار ءسوز بولدى.