پرەمەر-ءمينيستردىڭ ورىنباسارى – ساۋدا جانە ينتەگراتسيا ءمينيسترى سەرىك جۇمانعارين ەلوردادا «الەۋمەتتىك ءامياننىڭ» پيلوتتىق تسيفرلىق سەرۆيستەرىن ەنگىزۋ بارىسىن تەكسەردى.
استاناداعى №8 مەكتەپ-ليتسەيى مەن №10 ەمحانا «الەۋمەتتىك ءاميان» ارقىلى ازاماتتاردى اقشالاي جانە اقشالاي ەمەس مەملەكەتتىك قولداۋدىڭ تسيفرلىق قۇرالدارىن قۇرۋ بويىنشا پيلوتتىق جوباعا قاتىسىپ جاتىر. «جالپى ءبىلىم بەرەتىن مەكتەپتەردى تەگىن, جەڭىلدەتىلگەن ىستىق تاماقپەن قامتاماسىز ەتۋ», «مىندەتتى الەۋمەتتىك مەديتسينالىق ساقتاندىرۋ شەڭبەرىندە ءدارى-دارمەكپەن جانە دارىگەردىڭ ۇسىنىسى (رەتسەپتى) بويىنشا تەگىن مەديتسينالىق كومەكتىڭ كەپىلدىك بەرىلگەن كولەمىمەن قامتاماسىز ەتۋ» قىزمەتتەرى سىناقتان وتۋدە.
№8 مەكتەپتە 1 675 بالا وقيدى, ونىڭ ىشىندە 5-11 سىنىپتا وقيتىن 63 وقۋشى از قامتىلعان وتباسىنان شىققان. مەكتەپ اسحاناسىن ارالاۋ بارىسىندا سەرىك جۇمانعارينعا «الەۋمەتتىك ءاميان» قوسىمشاسىنىڭ دەمو-نۇسقاسى كورسەتىلدى.
جوبا ونەركاسىپتىك پايدالانۋعا بەرىلگەننەن كەيىن ىستىق تاماققا جولداما الۋ ءۇشىن مەملەكەتتەن الەۋمەتتىك قولداۋ الاتىن بالالاردىڭ اتا-انالارىنا ءوتىنىش جازۋدىڭ قاجەتى بولمايدى. ولاردىڭ ۇيالى تەلەفون نومىرىنە SMS حابارلاما جىبەرىلەدى, سودان كەيىن بالانىڭ كولىك كارتاسىن «الەۋمەتتىك اميانعا» قوسىپ, ونى مەكتەپتە جەڭىلدىكتى تۇسكى اس الۋ ءۇشىن پايدالانۋعا بولادى.
س.جۇمانعارين جاقىن ماڭداعى «الەۋمەتتىك تولەمدەر ەسەبىنەن تاۋارلاردى ساتىپ الۋ» قىزمەتى سىناقتان وتكەن ءۇي جانىنداعى دۇكەندە بولدى. بۇل اتاۋلى الەۋمەتتىك كومەك الۋشىلارعا, سونىڭ ىشىندە نەگىزگى ازىق-ت ۇلىك ونىمدەرىن ساتىپ الۋعا بولىنەتىن, ولاردى دۇكەندەردەن QR تولەمىن قولدانا وتىرىپ ساتىپ الۋعا مۇمكىندىك بەرەدى.
مىندەتتى الەۋمەتتىك مەديتسينالىق ساقتاندىرۋ جانە رەتسەپت بويىنشا تەگىن مەديتسينالىق كومەكتىڭ كەپىلدىك بەرىلگەن كولەمى بويىنشا ءدارى-دارمەكپەن قامتاماسىز ەتۋ شەڭبەرىندە دارىلىك زاتتاردى الۋ ءۇشىن 83 مىڭ ازامات تىركەلگەن №10 قالالىق ەمحانانىڭ بازاسىندا «الەۋمەتتىك ءاميان» دەنساۋلىق ساقتاۋ مينيسترلىگىنىڭ اقپاراتتىق جۇيەلەرىمەن بىرىكتىرىلەتىن بولادى.
بۇل قىزمەت دارىگەردىڭ تسيفرلىق رەتسەپتى قولدانۋشىنىڭ-پاتسيەنتتىڭ تەلەفونىنا بىردەن تۇسەتىندىگىمەن ىڭعايلى. مەديتسينا قىزمەتكەرلەرىنە قۇجاتتاردى قولمەن تولتىرۋ, ال پاتسيەنتكە قاعاز رەتسەپتتى الىپ ءجۇرۋدىڭ قاجەتتىلىگى بولمايدى.
«الەۋمەتتىك قولداۋدىڭ اقشالاي ەمەس تۇرلەرىنىڭ تەتىگى قازىردىڭ وزىندە جەتكىلىكتى تۇردە ازىرلەنگەن دەپ سانايمىن, اقشالاي تۇرلەرى بويىنشا ءبىز ولاردى تەك بانك كارتالارىنا عانا ەمەس, «الەۋمەتتىك اميانعا» دا الۋعا بولاتىنداي ەتىپ قاراستىرامىز جانە ءارتۇرلى نۇسقالاردى ۇسىنامىز. سونىمەن قاتار ازامات مەملەكەتتىك قولداۋ شەڭبەرىندە, مىسالى, اتاۋلى الەۋمەتتىك كومەك – الەۋمەتتىك ماڭىزى بار ازىق-ت ۇلىك ونىمدەرىن ساتىپ الۋعا ەسەپتەلەتىن قاراجاتتى كورە الادى», دەدى سەرىك جۇمانعارين.
2023 جىلى قولدانىسقا ەنگىزۋ ءۇشىن «الەۋمەتتىك اميانداعى» تسيفرلىق قىزمەتتەردى (مەكتەپتەردە تەگىن جانە جەڭىلدەتىلگەن باعامەن ىستىق تاماققا ۆاۋچەرلەر, ءدارى-دارمەك بەرۋ) ىسكە قوسۋدى كەزەڭ-كەزەڭىمەن باستاۋ جوسپارلانۋدا. بۇل رەتتە نورماتيۆتىك-قۇقىقتىق بازاعا ءتيىستى وزگەرىستەر ەنگىزۋ جۇمىستارى اياقتالۋدا.