قازاقستان رەسپۋبليكاسى پرەزيدەنتتىگىنە كانديدات قاراقات ابدەن جەزقازعان قالاسىندا وتكەن دوڭگەلەك ۇستەلدە سۋيتسيدپەن كۇرەس جونىندە ۇلتتىق ستراتەگيالىق جوسپار ازىرلەۋدى ۇسىندى.
قاراقات ابدەننىڭ بۇل ۇسىنىسىن جيىنعا قاتىسقان سايلاۋشىلار, پسيحولوگ ماماندار مەن يۋۆەنالدى پوليتسيا ورگاندارىنىڭ ارداگەرلەرى, انالار كەڭەسى مەن ارداگەرلەر كەڭەسىنىڭ مۇشەلەرى قولدادى. دوڭگەلەك ۇستەل بارىسىندا اتالعان ماسەلەگە قاتىستى ستاتيستيكالىق مالىمەتتەر كەلتىرىلدى. 2018-2022 جىلدار ارالىعىندا 18 مىڭعا جۋىق ادام وزىنە-ءوزى قول جۇمساسا, 21 مىڭنان استام قازاقستاندىق وزىنە قول سالۋعا ارەكەت ەتكەن. بەلگىلى بولعانداي, قازاقستان ءوز-وزىنە قول جۇمساۋ بويىنشا العاشقى 20 ەلدىڭ قاتارىندا بولسا, بالالار مەن جاستار اراسىنداعى سۋيتسيد بويىنشا الەمدە العاشقى ۇشتىككە كىرەدى.
«بۇل – ناعىز دابىل قاعاتىن ماسەلە. مۇنداي قايعىلى كورسەتكىشتەر بىزدەن جۇيەلى جۇمىس جۇرگىزۋدى تالاپ ەتەدى. سوندىقتان بۇگىنگى جيىندا سۋيتسيدپەن كۇرەس جونىندە ۇلتتىق ستراتەگيالىق جوسپار ازىرلەۋدى ۇسىندىم. ول ءۇشىن ارنايى ۆەدومستۆوارالىق كوميسسيا قۇرىلىپ, زاڭنامالىق تالاپتارعا سايكەس پارلامەنتتىك تىڭدالىمدا اتالعان ماسەلە كۇن تارتىبىنە شىعارىلۋعا ءتيىس», دەدى ق.ابدەن.
ۇمىتكەردىڭ ايتۋىنشا, بالالار مەن جاستاردىڭ ءوز-وزىنە قول جۇمساۋىنا الەۋمەتتىك ماسەلەلەردىڭ تۋىنداۋى مەن ۇلتتىق, وتباسىلىق قۇندىلىقتاردىڭ السىرەۋى سەبەپ.
ەسكە سالساق, ق.ابدەن وسى ۋاقىتقا دەيىن ەل وڭىرلەرىن ارالاپ, 11 قالا مەن بىرنەشە اۋىلدىق ەلدى مەكەندە 20-دان استام كەزدەسۋ وتكىزدى.