قازاقستان رەسپۋبليكاسىنىڭ پرەزيدەنتتىگىنە كانديدات جيگۋلي دايراباەۆ پانفيلوۆ اۋدانىنداعى «ەرنار» شارۋا قوجالىعىنا بارىپ, كاسىپورىن ۇجىمىمەن كەزدەستى. قازىرگى ۋاقىتتا ءوندىرىس وشاعى گولوۆاتسكي اۋىلىنىڭ تۇرعىندارىن تۇراقتى جۇمىسپەن قامتاماسىز ەتىپ, اۋىل شارۋاشىلىعى سالاسىنىڭ دامۋىنا اۋقىمدى ۇلەس قوسىپ وتىر.
جيگۋلي دايراباەۆ كاسىپورىننىڭ زاماناۋي تەحنولوگيالاردى بەلسەندى قولداناتىندىعىن ەرەكشە اتاپ ءوتتى. كانديداتتىڭ ايتۋىنشا, سوڭعى جىلدارى الەمدە سۋ رەسۋرستارىنىڭ احۋالى بويىنشا الاڭداۋشىلىق ارتىپ كەلەدى. حالىق سانى ۇلعايىپ, ونەركاسىپ پەن اۋىل شارۋاشىلىعى قارقىندى دامۋدا. بۇل ءوز كەزەگىندە سۋدى پايدالانۋدىڭ كولەمىن ارتتىرىپ وتىر.
ء«بىز جاڭا تەحنولوگيالار مەن تسيفرلاندىرۋ ارقىلى سۋدى ۇنەمدەۋگە كوشۋىمىز كەرەك. سۋ تاپشىلىعىن جويۋدىڭ باسقا جولى جوق. بۇل – اسا ماڭىزدى مىندەت. سۋ ۇنەمدەۋ تەحنولوگيالارىن تولىق كولەمدە ەنگىزۋ سۋ شىعىنىن ازايتىپ, ونىمدىلىكتى ارتتىرا وتىرىپ, سۋارمالى جەرلەردى ۇتىمدى پايدالانۋعا مۇمكىندىك بەرەدى. جاڭبىرلاتىپ سۋارۋ ءادىسى ءشولدى جانە شولەيتتى جەرلەردى يگىلىككە جاراتىپ, باۋ-باقشا ەگۋ, جىلىجايلار سالىپ, ءونىم الۋعا جاقسى مۇمكىندىك بەرەدى. ەلىمىزدە الەمدىك وزىق تاجىريبەلەردى اۋىل شارۋاشىلىعىنا ەنگىزۋ جۇمىستارى جالعاسىپ جاتىر. باستىسى ءبىز بۇل باعىتتاعى شارالاردى توقتاتپاۋىمىز كەرەك. اۋىل شارۋاشىلىعى سالاسىنا باعىتتالعان سۋبسيديا كولەمىن ۇلعايتۋ جانە ليزينگتىك كومپانيالارعا قولداۋ كورسەتۋىمىز قاجەت», دەدى كانديدات.