پرەزيدەنت جانىنداعى ورتالىق كوممۋنيكاتسيالار قىزمەتىندە ءداستۇرلى بريفينگ ءوتتى. باسقوسۋدىڭ بۇل جولعى قوناعى «قازپوشتا» اق باسقارما توراعاسى اسحات بەيسەنباەۆ بولدى. باق وكىلدەرىمەن كەزدەسۋىندە ۇلتتىق پوشتا وپەراتورىنىڭ باسشىسى ەلباسى ن.نازارباەۆتىڭ «قازاقستان – 2050: ءبىر ماقسات, ءبىر مۇددە, ءبىر بولاشاق» جولداۋىن جۇزەگە اسىرۋ بارىسىندا اتقارىلىپ جاتقان ءىس-شارالار جايىندا باياندادى.
«قازاقستاننىڭ الەۋمەتتىك-ەكونوميكالىق دامۋىنا, وتانداستارىمىزدىڭ ءال-اۋقاتىنىڭ جاقسارۋىنا ءوزىنىڭ سۇبەلى ۇلەسىن قوسۋشى, 22 مىڭنان استام ادامنىڭ باسىن بىرىكتىرگەن, كوپتەگەن الىپ شاھارلار مەن اۋىلدى ەلدى مەكەندەردە پوشتا جانە قارجى قىزمەتىن كورسەتۋدە سەنىمدى وپەراتور رەتىندە ءوزىن تانىتىپ ۇلگەرگەن كومپانيادا ستراتەگيالىق مەملەكەتتىك قۇجات بەلسەندى تۇردە تالقىلانىپ, ناسيحاتتالۋدا. «قازپوشتا» اق باسشىلىعى كومپانيانىڭ ستراتەگيالىق ماڭىزدى تاپسىرمالارىن ايقىنداعاندا, ەڭ الدىمەن بۇقارا حالىقتىڭ مۇقتاجىن ەسكەرەدى», دەدى «قازپوشتا» اق باسقارما توراعاسى اسحات بەيسەنباەۆ. سونداي-اق ول «ءبىز, شىن مانىندە ءاربىر قازاقستاندىقتىڭ, سونىڭ ىشىندە, اسىرەسە, اۋىل تۇرعىندارىنىڭ ءومىرىن جاقسارتۋدى كوزدەيمىز. ءبىزدىڭ قىسقا مەرزىمدى جوسپارلارىمىزدا اۋىل تۇرعىندارى ءۇشىن مەملەكەتتىك قىزمەتتەر, كاتالوگ بويىنشا تاۋارلارعا تاپسىرىس بەرۋ, ساقتاندىرۋ قىزمەتى, بروكەرلىك قىزمەت, نەسيەلەۋ سىندى وزگە دە اسا قاجەتتى قىزمەت تۇرلەرىن كورسەتۋ بار», دەپ اتاپ ءوتتى ول.
وسى رەتتە, اۋىلدىق پوشتا ءبولىمشەلەرىنىڭ دامۋىنا كومپانيانىڭ جالعىز اكتسيونەرى «سامۇرىق-قازىنا» قورىنىڭ كومەگى ايتارلىقتاي كوپ بولعان. 2013 جىلى قور تاراپىنان اۋىلدىق پوشتا بولىمشەلەرىن تەحنيكالىق تۇرعىدان كۇشەيتۋ جوباسىنىڭ جۇزەگە اسىرىلۋىنا 1,6 ميلليارد تەڭگە كولەمىندە قاراجات ءبولىنىپ, اتالعان قاراجات 64 دانا بروندالعان اۆتوكولىكتەر, 114 دانا جىلجىمالى پوشتا بولىمشەلەرىن, 723 سەيفتەر ساتىپ الۋعا جۇمسالىپتى. سونىمەن بىرگە, «حالىقتىق IPO» باعدارلاماسىن ءساتتى جۇزەگە اسىرۋ شەڭبەرىندە قور كادرلاردى وقىتۋعا, تەحنيكالىق جابدىقتاۋعا, باعدارلامالىق قامتاماسىز ەتۋ مەن اقپاراتتىق-ماركەتينگتىك ونىمدەردى جانە دە 3231 كومپيۋتەر ساتىپ الۋعا 487 ميلليون تەڭگە كولەمىندە قارجى بولگەن. سونداي-اق, قور تاراپىنان 2014 جىلى كاسسالىق توراپتارىن جاڭعىرتۋعا 917 ميلليون تەڭگە ءبولۋى جوسپارلانعان.
جولداۋدى جۇزەگە اسىرۋدىڭ جالپىۇلتتىق ءىس-شارالار جوسپارىنداعى تەڭدەستىرىلگەن جالاقىنى كوتەرۋ ماسەلەسى وزەكتى تاقىرىپ بولىپ تابىلسا, ءوز كەزەگىندە «قازپوشتا» اق مەملەكەت باسشىسىنىڭ تاپسىرماسىن, وندىرىستىك جۇمىسشىلارعا جالاقىلارىن 12 پايىز, اكىمشىلىك قىزمەتشىلەر جالاقىلارىن 7 پايىز كوتەرۋ ارقىلى ورىنداپ شىقتى, ال 2014 جىلدىڭ 1 ساۋىرىنەن باستاپ ءوندىرىس سالاسىنىڭ بارلىق جۇمىسشىلارىنىڭ جالاقىسىنا 10 پايىز كولەمىندە ۇستەمە قارجى قوسىلادى. جالپى العاندا, «قازپوشتا» اق سوڭعى 2 جىلداعى جۇمىسشىلار جالاقىسىنىڭ جيىنتىق ءوسىمى 32 پايىزدى قۇراعان. ال, ءوز كەزەگىندە كومپانيا مەنەدجمەنتى بۇدان ءارى قاراي دا جۇمىسشىلاردىڭ جالاقى دەڭگەيىن ورتاشا رەسپۋبليكالىق كورسەتكىشكە جەتكىزۋ باعىتىندا جۇمىستار اتقارماق.
جولداۋداعى پرەزيدەنت تاپسىرمالارىنىڭ ءبىرى مۇمكىندىگى شەكتەۋلى ازاماتتارعا تيىسىنشە كوڭىل ءبولۋ ماسەلەسى بولىپ تابىلادى. وسىعان بايلانىستى اسحات بەيسەنباەۆ «اتالعان ازاماتتار ساناتىنا تەڭ قۇقىقتار قامتاماسىز ەتە وتىرىپ, كۆوتالاردى كوبەيتۋ ءبىز ءۇشىن باستى باسىمدىقتاردىڭ ءبىرى بولىپ سانالادى. وسى رەتتە ءبىز, كورپوراتيۆتىك الەۋمەتتىك باستى قاعيدالارعا سۇيەنە وتىرىپ, كومپانيادا 110 مۇمكىندىگى شەكتەۋلى ادامدارعا ارنالعان «كەدەرگىسىز ايماقتى» جاسادىق دەپ اتاپ ءوتتى. پوشتا مەكەمەسىنىڭ باسشىسى ءوز بايانداۋىندا كولىكتىك ينفراقۇرىلىم سالاسىن دامىتۋ ىسىنە كوپ كوڭىل بولەتىندىكتەرىن, ونىڭ سەبەبى, ۇلتتىق پوشتا وپەراتورى ءۇشىن لوگيستيكالىق وپەراتسيالار وندىرىستىك ءۇردىستىڭ قۇرامداس ءبىر بولىگى ەكەندىگىن دە نازاردان تىس قالدىرمادى.
زاماناۋي پوشتا يندۋسترياسى قازىرگى تاڭدا تۇبەگەيلى وزگەرىستەر ۇستىندە دەسەك, قاعاز جونەلتىلىمدەرىنىڭ اجەپتاۋىر قىسقارۋى مەن ەلەكتروندى كوممەرتسيا سالاسى دامۋىنىڭ ناتيجەسىندە سالەمدەمەلىك جونەلتىلىمدەر كولەمىنىڭ ەداۋىر ءوسۋىن ەسكەرە وتىرىپ, ۇلتتىق پوشتا وپەراتورلارىنىڭ ءداستۇرلى بيزنەس-مودەلدەرى قايتا قۇرىلۋدا. «باتىس ەۋروپا – باتىس قىتاي» حالىقارالىق ءدالىزى اۆتوكولىك باعىتتارىن كەڭەيتىپ, تەمىرجول كولىگىنەن اقىرىنداپ الىستاۋ سياقتى قوسىمشا مۇمكىندىكتەرگە جول اشقان. بۇل پوشتا جونەلتىلىمدەرىنىڭ باقىلاۋ ۋاقىتتارىن قىسقارتىپ, وسى باعىتتاعى لوگيستيكالىق شىعىنداردى وڭتايلاندىرۋعا جاعداي تۋعىزادى.
ءابدىراحمان قىدىربەك,
«ەگەمەن قازاقستان».