ءۇيىن يت ەمەس, تۇيەقۇس كۇزەتەدى

الگى امەريكالىق مۋلتفيلمدەردە كورسەتەتىن تۇيەقۇس ەسىڭىزدە شىعار. كوپشىلىك ايتاتىنىنداي, قۇمعا باسىن تىعىپ تۇرىپ الاتىن شە؟ ءوزى ەسەرسوقتاۋ كورىنەتىن انيماتسيالىق فيلمدەردىڭ وسى ءبىر كەيىپكەرىن كورسە بالا بىتكەن ىشەك-سىلەسى قاتقانشا كۇلەدى. تۇيەدەي بولعان قۇستىڭ باسىن قۇمعا سۇعىپ جىبەرىپ, تىعىلعان كەيىپ تانىتقانى كۇلكى شاقىرماي تۇرمايدى ەندى. مىنە, سونداي تۇيەقۇس قىزىلوردانىڭ قازالى اۋدانىندا بار ەكەن. ول قايدان كەلگەن, نەعىپ جۇرگەن قۇس؟ ءبىزدىڭ ايماققا قالاي جەرسىنگەن؟ قازالىلىق باۋىرجان سەرىمبەتوۆ دەگەن ازامات وسى تۇقىمداس تۇيەقۇستى الۋ ءۇشىن ءبىر جىل كەزەكتە تۇرىپتى. ءسويتىپ, 2011 جىلى الماتىدان العان ءتورت بالاپانىن ەلگە اكەلەدى. بىراق ونىڭ ەكەۋى جولدا ءولىپ قالادى. سۋىق تيگەن كورىنەدى. ءبىزدىڭ وڭىردە كوپ كەزدەسەتىن تۇيەتاۋىقتىڭ بالاپاندارى دا باستاپقىدا دۇرىستاپ قاراماساڭ, ءوز اياعىنا ءوزى شالىنىپ, مويىنى قايىرىلىپ قالا بەرەدى. سۋىققا ءتوزىمسىز. سول سياقتى, مىنا تۇيەقۇستىڭ بالاپانى دا العاشقى كەزدە ءالسىز بولعان-اۋ شاماسى. ال ەكەۋى امان-ساۋ قازالىعا جەتەدى. سولايشا, ءبىر قوراز بەن ءبىر مەكيەن بالاپاندى اسىراي باستايدى. بىراق قوراز بالاپان دا ۇزاق تۇراقتامايدى. ول دا ءولىپ قالىپتى. بۇگىندە باۋىرجان سەرىمبەتوۆتىڭ قوراسىندا ءتورت بالاپاننان قالعان جالعىز تۇيەقۇس ءومىر ءسۇرىپ جاتىر. ءوزى ءنان. بويى 3 مەتردەن اسادى. جارىقتىق, كۇنىنە 1 سانتيمەتر وسەدى ەكەن. ال سالماعى 70 كيلو كورىنەدى. تۇيەقۇس دەسە, دەگەندەي-اق. نەگىزىنەن جوڭىشقا مەن ءداندى داقىلداردى قورەك ەتەدى. دەي تۇرعانمەن, دەنە تۇرپاتى ءداۋ بولعاندىقتان شىعار, اسا تاماق تالعامايتىنعا ۇقسايدى. باۋكەڭ ءوزى اسىلتۇقىمدى جان-جانۋارلاردى اسىراپ, جەرسىندىرۋمەن اينالىسادى. قوراسىندا اقمەشىت اتىرابىنا بەلگىلى ارعىماقتارى دا بار. مۇنى ماقتان ءۇشىن ەمەس, وزىندىك ءحوببيى سانايدى. تۇيەقۇستى دا سونداي قىزىعۋشىلىقتىڭ ارقاسىندا اسىراپ, جەرسىندىرىپ وتىر. ال ولاردى كۇتىپ-باعۋ مەن باپتاۋدى عالامتور ارقىلى مەڭگەرگەن. ءتۇرلى جان-جانۋار اسىرايتىن سەرىمبەتوۆ ۇيىندە يت ۇستامايدى ەكەن. «ۇيگە ءيتتىڭ قاجەتى جوق. تۇيەقۇستىڭ ءوزى اۋلاعا بوتەن ادامداردى كىرگىزبەيدى»,– دەيدى ك ۇلىپ. دەسەك تە, تۇيەقۇسىڭىز ايەل ادامدارعا تيىسپەيتىن بولىپ شىقتى. بىراق تانىمايتىن ەر ادامدار كەلسە, تىرقىراتىپ قۋىپ كەپ بەرەدى ەكەن. ەرجان بايتىلەس, «ەگەمەن قازاقستان». قىزىلوردا وبلىسى.