قر ۇكىمەتىنىڭ 2022 جىلعى 25 مامىرداعى قاۋلىسىمەن قازاقستان رەسپۋبليكاسىنىڭ عىلىمىن دامىتۋدىڭ 2022-2026 جىلدارعا ارنالعان تۇجىرىمداماسى بەكىتىلدى, دەپ حابارلايدى Egemen.kz.
تۇجىرىمداما قازاقستاندىق عىلىمنىڭ جاھاندىق باسەكەگە قابىلەتتىلىگىن جانە ونىڭ ۇلتتىق دەڭگەيدەگى ماسەلەلەردى شەشۋگە قوسقان ۇلەسىن ارتتىرۋ ءۇشىن عىلىمي-زەرتتەۋ, عىلىمي-تەحنيكالىق نەمەسە تاجىريبەلىك-كونسترۋكتورلىق جۇمىستاردى قارجىلاندىرۋ ماسەلەسىنە ەرەكشە نازار اۋدارادى.
ماسەلەن, جەتەكشى عىلىمي مەكتەپتەردى, زەرتتەۋ ۋنيۆەرسيتەتتەرىن قالىپتاستىرۋ جانە دامىتۋ ءۇشىن گرانتتىق قارجىلاندىرۋ بويىنشا كوزدەلگەن قاراجات شەڭبەرىندە مەگاگرانتتار ءبولۋدى قوسا العاندا, مەملەكەتتىك قولداۋ شارالارىن كورسەتۋ جوسپارلانۋدا.
الەمدىك ترەندتەرگە سايكەس عىلىمي ۇيىمداردىڭ, زەرتتەۋ ۋنيۆەرسيتەتتەرى مەن زەرتحانالاردىڭ عىلىمي ينفراقۇرىلىمى دايەكتى تۇردە جاڭعىرتىلادى.
بۇل رەتتە قولدانبالى زەرتتەۋلەردى قارجىلاندىرۋدا جەكە قوسا قارجىلاندىرۋ ۇلەسىن ارتتىرۋعا, عىلىمنىڭ وندىرىسپەن بايلانىسىن نىعايتۋعا, ناقتى سەكتوردى, بيزنەستى عىلىمي بولىمشەلەردى قۇرۋعا جانە دامىتۋعا ىنتالاندىرۋعا, باسىم باعىتتاردى دەربەس ايقىنداۋعا, قاجەتتى عىلىمي ازىرلەمەلەرگە تاپسىرىس بەرۋگە جانە ولاردى ەنگىزۋگە باسا نازار اۋدارىلادى.
سونداي-اق عالىمنىڭ الەۋمەتتىك مارتەبەسىن ارتتىرۋ ءۇشىن جەتەكشى عالىمدارعا ارنالعان الەۋمەتتىك جەڭىلدىكتەر پاكەتىن ازىرلەۋ ۇسىنىلادى.
جاس كادرلاردىڭ عىلىمعا كەلۋىن ىنتالاندىرۋ ءۇشىن جىل سايىن الەمنىڭ جەتەكشى عىلىمي ورتالىقتارىنا 500 قازاقستاندىق عالىمدى تاعىلىمدامادان وتۋگە جىبەرۋ, اكادەميالىق جازۋعا, اعىلشىن تىلىنە, تسيفرلىق داعدىلارعا وقىتۋ, عىلىمي ءوتىنىم مەن باسقا دا قاجەتتى قۇزىرەتتەر مەن داعدىلاردى ازىرلەۋ, شەتەلدە جۇمىس ىستەيتىن قازاقستاندىقتاردى عىلىمي ۇيىمدارعا تارتۋ, قازىرگى زامانعى عىلىم مەنەدجەرلەرىن دايارلاۋ بويىنشا كەشەندى شارالار ىسكە اسىرىلادى.
بۇدان باسقا, عالىمداردى عىلىمعا قوسقان ۇلەسى ءۇشىن ىنتالاندىرۋ جانە كوتەرمەلەۋ ءۇشىن جىل سايىن 2 مىڭ اەك (6 ملن تەڭگەدەن استام) مولشەرىندە 50 «ۇزدىك عىلىمي قىزمەتكەر» سىيلىعى بەرىلەدى.
سونداي-اق عىلىم سالاسىندا مەملەكەتتىك عىلىمي ستيپەنديالار مەن سىيلىقتار بەرۋ ارقىلى عىلىم مەن تەحنيكانىڭ دامۋىنا ۇلەس قوسقان عالىمداردى كوتەرمەلەۋ جالعاسادى.
قۇجات ازىرلەۋشىلەرىنىڭ پىكىرىنشە, تۇجىرىمدامانى ىسكە اسىرۋ قازاقستاندىق عىلىمنىڭ جاھاندىق باسەكەگە قابىلەتتىلىگىن ارتتىرۋعا جانە ونىڭ ەلدىڭ الەۋمەتتىك-ەكونوميكالىق جانە قوعامدىق-ساياسي دامۋىنا ۇلەسىن ارتتىرۋعا, عزتكج-عا جەكە سەكتور ينۆەستيتسيالارىنىڭ وسۋىنە جانە ۇلتتىق جانە وڭىرلىك دەڭگەيلەردەگى قولدانبالى پروبلەمالاردى شەشۋگە ىقپال ەتەدى.
تۇجىرىمدامانىڭ تولىق ماتىنىمەن مىنا سىلتەمە ارقىلى تانىسۋعا بولادى.
قاۋلى قول قويىلعان كۇنىنەن باستاپ قولدانىسقا ەنگىزىلەدى.