كەشە ورتالىق كوممۋنيكاتسيالار قىزمەتىندە ۇلتتىق كاسىپكەرلەر پالاتاسىنىڭ مەملەكەتتىك ساتىپ الۋلار جانە جەرگىلىكتى قامتۋ دەپارتامەنتى ديرەكتورىنىڭ ورىنباسارى ايگۇل قوڭىرتاەۆا ءباسپاسوز ءماسليحاتىن وتكىزدى. ول شاعىن جانە ورتا بيزنەستىڭ ينتەگراتسيالىق ۇردىستەردەگى ءرولى تۋرالى اڭگىمەلەدى.
شاراعا «قتج» ۇك» اق كورپوراتيۆتىك دامۋ جونىندەگى باسقارۋشى ديرەكتورى ەركىن جۋسانباەۆ پەن ۇلتتىق كومپانيانىڭ ەكونوميكالىق ينتەگراتسيا دەپارتامەنتىنىڭ ديرەكتورى ءاليا جۇماباەۆا دا قاتىسىپ, ەۋرازيالىق ەكونوميكالىق وداق اياسىنداعى تەمىرجول قىزمەتى تۋرالى ايتتى. ءماسليحات سپيكەرلەرى ەكونوميكالىق ينتەگراتسيانىڭ كاسىپكەرلەرىمىزگە وتە ءتيىمدى بولاتىنىنا نازار اۋداردى. «ەۋرازيالىق ەكونوميكالىق وداق بيزنەسمەندەر ءۇشىن ءتيىمدى. بىلتىرعى جىلى كەدەن وداعى ەلدەرىنە ەكسپورت ايتارلىقتاي ارتتى. اتاپ ايتار بولساق, ترانسفورماتور 7,4, تراكتور 5,7, جۇك كولىكتەرى 3,7 ەسە كوبەيگەن. ەۋرازيالىق ەكونوميكالىق وداققا كىرۋ ارقىلى وتاندىق بيزنەس وكىلدەرىنىڭ باسەكەلەستىككە قابىلەتتىلىگىنىڭ ارتاتىندىعى دا ءمالىم. سونىڭ نەگىزىندە ءبىزدىڭ بيزنەس الەمدىك نارىق تالاپتارىنا بەيىمدەلۋى كەرەك», دەدى ا.قوڭىرتاەۆا.
وسى ارادا, وداق اياسىندا وتاندىق بيزنەس وكىلدەرى 200 ملرد. دوللاردىڭ نارىعىنا قول جەتكىزەتىندىگىن دە ايتىپ وتكەن ءجون. بۇل عالامات نارىققا رەسەي مەن بەلارۋس ەلدەرىنىڭ مۋنيتسيپالدىق ساتىپ الۋلارىنا قاتىسۋ ارقىلى مۇمكىندىك الادى. ال ءبىزدىڭ مەملەكەتتىك ساتىپ الۋلارعا كەدەن وداعىنىڭ ەلدەرى بۇرىننان قاتىسىپ كەلە جاتىر ەكەن. ايتسە دە, ساتىپ الۋ كەزىندە ءوزىمىزدىڭ وتاندىق جابدىقتاۋشىلارعا بەلگىلى ءبىر ارتىقشىلىقتار بەرىلىپ كەلگەن. ەندى ەكونوميكالىق وداق اياسىندا بىرىڭعاي مەملەكەتتىك ساتىپ الۋ ورتالىعى جاسالعاندىقتان, ءۇش ەلدىڭ دە بيزنەس وكىلدەرى بىردەي دەڭگەيدە مەملەكەتتىك ساتىپ الۋعا قاتىساتىن بولادى.
ەۋرازيالىق ەكونوميكالىق وداق اياسىندا تەمىرجول بيلەتىنىڭ قۇنى قىمباتتامايدى. «ەۋرازيالىق ەكونوميكالىق وداقتى قۇرۋ كەزىندە كولىك قاتىناستارىنا قاتىستى كەلىسىمشارتتا وداق ىشىندە تەمىرجولدىڭ ءتاريفىن تەڭەستىرۋ ماسەلەسى قاراستىرىلىپ, ءبىردەي بولسىن دەلىنگەن ەدى. رەسەي تەمىرجولىنىڭ قىزمەتى ءبىزدەن 2-2,5 ەسە قىمبات ەكەنى ءمالىم. وسىنى ەسكەرىپ, ءبىز بۇل شەشىمگە كەلىسپەدىك. ءسويتىپ, ءار ەل ءوزىنىڭ كولىك قىزمەتىنىڭ اقىسىن ءوزى شەشەتىن بولدى», دەدى ە.جۋسانباەۆ.
سونداي-اق ول, ەۋرازيالىق ەكونوميكالىق وداق كولىكتىك ترانزيتتىڭ الەۋەتى مەن باسەكەلەستىكتى ارتتىراتىندىعىن دا ايتتى. قازاقستان, رەسەي جانە بەلارۋس ينفراقۇرىلىمدارىنىڭ شەكارالاس ۋچاسكەلەرىندە تاۋەلسىز تاسىمالداۋشىلارعا تەڭدەي ءمۇمكىندىك اشۋ ماسەلەسى قاراستىرىلىپ وتىرعانىن دا ورتاعا سالدى. اتالعان تەلىمدەر قازاقستان مەن رەسەي اۋماقتارىندا لوكوموتيۆتەرگە قىزمەت كورسەتىلەتىن ورىنداردىڭ شەكاراسى رەتىندە انىقتالاتىن كورىنەدى. ءسويتىپ, تاسىمالداۋشىلار تەڭدەي جاعدايدا جۇمىس ىستەۋ مۇمكىندىكتەرىنە يە بولادى ەكەن.
نۇرباي ەلمۇراتوۆ,
«ەگەمەن قازاقستان».