ەلىمىزدە ۇيالى تەلەفونداردا ساقتالىپ تۇراتىن جەكە مالىمەتتەر ارقىلى بوپسالاۋ ارەكەتتەرى كەزدەسە باستادى. ەندى سمارتفونىن جوعالتىپ العان ادامنىڭ تاعدىرى الدەكىمنىڭ ويىنشىعىنا اينالۋى ابدەن مۇمكىن. بۇل تۋرالى «31 ارنا» حابارلادى.
اتالعان تەلەارنانىڭ اقپاراتىندا ايتىلعانداي, تالدىقورعان قالاسىنىڭ ءبىر تۇرعىنى – 43 جاستاعى ايەل قالتا تەلەفونىن جوعالتقانىمەن, ونى پوليتسياعا حابارلاماعان. بىرنەشە كۇننەن كەيىن الگى ايەلدى بەيتانىس بىرەۋ ارنەنى ايتىپ قورقىتقان. جۇمباقتاماي سويلەسەك, ايەلدىڭ قولدى بولعان بايلانىس قۇرالىندا اتى-ءجونى كەڭىنەن تانىمال ءبىر شەنەۋنىكپەن تۇسكەن سۋرەتتەرى مەن ءوزارا الماسقان جەكە جازبالارى ساقتالىپتى. ال بوپسالاۋشى ادام وسى دەرەكتەر مەن سۋرەتتەردى ينتەرنەت جەلىلەرىنە ورنالاستىراتىنىن ايتىپ, ايەلدىڭ زارە-قۇتىن قاشىرعان. سودان ول ابىرويىن ساقتاپ قالۋدىڭ قامىمەن تاسادا تۇرىپ, وزىنە تاس اتقان جانعا سۇراعان 3 مىڭ دوللارىن ۇسىنعان. الايدا, كوك قاعازدى شىرەنە تۇرىپ قالتاسىنا باسقان پىسىقاي ونى بوپسالاۋىن وسىمەن توقتاتاتىنىنا كەپىلدىك بەرمەگەن.
«31 ارنانىڭ» ءتۇسىندىرۋى بويىنشا, قولدى بولعان اپپاراتتى جانە سونىمەن بىرگە كولدەنەڭ تابىسقا كوزىن سۇزگەن الاياقتى IMEI-كودى ارقىلى تاۋىپ الۋ قيىن ەمەس كورىنەدى. اتالعان كود ءاربىر قۇرىلعىنىڭ باتارەيكاسى استىندا نەمەسە قورابىندا جازىلىپ تۇرادى ەكەن. قازىرگى تاڭدا ءتيىستى ورىندار IMEI-كودتار بازاسىن جاساقتاۋعا كىرىسىپتى. وسى بازاداعى مالىمەتتەر نەگىزىندە بۇكىر پيعىلدى بوپسالاۋشىلاردى وڭاي قولعا تۇسىرۋگە بولادى.
جولدىباي بازار.
دەرەككوز: «31 ارنا».
فوتو: رravilnyj.ru.