كەشە پرەزيدەنتتىڭ كومەكشىسى – قاۋىپسىزدىك كەڭەسىنىڭ حاتشىسى قايرات قوجامجاروۆ دۋشانبەدە بولعان شانحاي ىنتىماقتاستىق ۇيىمىنا مۇشە ەلدەر قاۋىپسىزدىك كەڭەستەرى حاتشىلارىنىڭ توعىزىنشى كەزدەسۋىنە قاتىستى, دەپ حابارلادى قازاقستان رەسپۋبليكاسى پرەزيدەنتىنىڭ ءباسپاسوز قىزمەتى.
كۇن تارتىبىنە سايكەس, كەزدەسۋدە شىۇ كەڭىستىگىندەگى قاۋىپسىزدىك سالاسىنداعى احۋال, تەرروريزممەن, سەپاراتيزممەن جانە ەكسترەميزممەن, ەسىرتكىنىڭ زاڭسىز اينالىمىمەن, ترانسشەكارالىق ۇيىمداسقان قىلمىسپەن كۇرەستە ءوزارا ءىس-قيمىلدى تەرەڭدەتۋ تۋرالى پىكىر الماسۋلار ءوتتى.
قازاقستان دەلەگاتسياسىنىڭ باسشىسى ق.قوجامجاروۆ كەزدەسۋگە قاتىسۋشىلاردى ءبىزدىڭ مەملەكەتىمىزدىڭ شىۇ جەلىسى بويىنشا اتالعان باعىتتاردا قابىلداپ جاتقان شارالارى تۋرالى حاباردار ەتتى.
دەلەگاتسيالار باسشىلارىن تاجىكستان رەسپۋبليكاسىنىڭ پرەزيدەنتى ە.راحمون قابىلدادى.
دۋشانبەدە, سونداي-اق, ق.قوجامجاروۆتىڭ قحر مەملەكەتتىك كەڭەسىنىڭ مۇشەسى – قىتايدىڭ قوعامدىق قاۋىپسىزدىك مينيسترى گو شەنكۋنمەن كەلىسسوزى ءوتتى.
كەلىسسوزدەر بارىسىندا قاۋىپسىزدىكتى قامتاماسىز ەتۋ سالاسىنداعى ەكىجاقتى ىنتىماقتاستىقتى دامىتۋ باعىتى اتاپ كورسەتىلىپ, ءتيىستى مەملەكەتتىك ورگاندار جەلىسى بويىنشا ءوزارا ءىس-قيمىلدى دامىتۋ جايى قۋاتتالدى.