13 ءساۋىر كۇنى Halyk Bank پەن سبەربانكتىڭ ءبىزدىڭ ەلدەگى ەنشىلەس بانكى كەلىسىمگە قول قويدى. كەلىسىمگە سايكەس, تسەسسيا شارتى بويىنشا بولشەك بيزنەس كليەنتتەرىنىڭ كرەديتتىك پورتفەلىنىڭ ءبىر بولىگى ساتىپ الىندى. ياعني «سبەربانكتە» رەسىمدەلگەن كرەديتتەردىڭ ءبىر بولىگى Halyk Bank-كە وتەدى.
مامىلەگە قازاقستان دامۋ بانكىندە جەڭىلدىكپەن كرەديت بەرۋ باعدارلاماسى بويىنشا رەسىمدەلگەن اۆتوكرەديتتەردىڭ ءبىر بولىگى, كەپىلسىز كرەديتتەردىڭ, كەزەك كۇتتىرمەيتىن مۇقتاجدىقتارعا ارنالعان قارىزداردىڭ جانە يپوتەكالىق كرەديتتەردىڭ ءبىر بولىگى كىرىپ وتىر. بەرىلگەن كرەديتتەر بويىنشا نەگىزگى قارىزدىڭ جالپى كولەمى 330 ملرد تەڭگەنى قۇرايدى. بۇل رەتتە 2022 جىلعى 1 ساۋىردەگى جاعداي بويىنشا سبەربانكتىڭ تۇتىنۋشىلىق قارىزدارىنىڭ كرەديتتىك قورجىنى 1,1 ترلن تەڭگەگە تەڭ.
«سبەربانك» اق قازاقستانداعى ەنشىلەس بانكىنىڭ باسقارما توراعاسى ەلدار تەڭىزباەۆ قارىزداردى قايتا تابىستاۋ بانك سەكتورىنداعى قالىپتى تاجىريبە ءھام ادەتتەگى ءراسىم ەكەنىن اتاپ ءوتتى.
– ءوزىنىڭ كوپ جىلدىق تاريحىندا «سبەربانك» بىرنەشە رەت ءتۇرلى سىن-قاتەرلەرمەن بەتپە-بەت كەلدى. ولاردى ءاردايىم ءساتتى ەڭسەرىپ, ءوز كليەنتتەرىنىڭ مۇددەسىن باستى نازارعا الدى. ءبىز مىندەتتەرىمىزدى كليەنتتەر الدىندا دا, مەملەكەت الدىندا دا ورىنداۋعا تىرىسامىز. بۇگىنگى تاڭدا «سبەربانك» بارلىق مەملەكەتتىك قارجىنى, ونىڭ ىشىندە جەڭىلدىكپەن كرەديت بەرۋ باعدارلامالارى بويىنشا بەرىلگەن قارجىنى قايتاردى. نەسيە پورتفەلىنىڭ ءبىر بولىگىن بەرۋ قارجى سالاسىندا كەڭ تارالعان تاجىريبە. كليەنتتەردىڭ باسقا بانككە اۋىسۋى ەش قيىندىقسىز رەتتەلەدى. بۇل – سەرىكتەس بانك ءۇشىن نەسيە پورتفەلىن ۇلعايتۋ مۇمكىندىگى. ءبىز اتالعان مامىلەدەن كليەنتتەرىمىزدىڭ قاجەتتىلىكتەرىن قامتاماسىز ەتۋ ءۇشىن قاجەتتى قوسىمشا وتىمدىلىكتى الامىز, – دەدى ەلدار تەڭىزباەۆ.
Halyk Bank-ءتىڭ باسقارما ءتورايىمى ءۇمىت شاياحمەتوۆا بانك قازاقستان ەكونوميكاسى ءۇشىن جۇيە قۇراۋشى قارجى ينستيتۋتى رەتىندە ەڭ الدىمەن قوعامنىڭ مۇددەسى ءۇشىن جۇمىس ىستەيتىنىن جەتكىزدى.
– جەكە تۇلعالاردىڭ نەسيە پورتفەلىنىڭ ەداۋىر بولىگىن ساتىپ الىپ, وسىلايشا «سبەربانككە» وتىمدىلىك بەرە وتىرىپ, Halyk Bank قازاقستاننىڭ بانك سەكتورىنىڭ تۇراقتىلىعىن قولدادى. بۇگىنگى تاڭدا Halyk Bank-كە جەكە تۇلعالاردىڭ قارىزدارى بويىنشا بەرەشەك قالدىعى اۋدارىلدى جانە بۇل مەرزىمى كەشىكتىرىلمەگەن جانە پروبلەمالىق كرەديتتەرسىز ساپالى پورتفەل ەكەنىن اتاپ وتكەن ءجون. ءوز تاراپىمىزدان ءبىز «سبەربانكتەن» Halyk-قا ۇزدىكسىز كوشۋ ءۇشىن بارلىق قاجەتتى شارالاردى قامتاماسىز ەتتىك, – دەيدى ءۇ.شاياحمەتوۆا.
قازاقستان دامۋ بانكىنىڭ باسشىسى رۋسلان ىسقاقوۆ قارجى ينستيتۋتى جەڭىلدەتىلگەن اۆتونەسيەلەۋ باعدارلاماسى شەڭبەرىندە يگەرىلگەن قاراجاتتى مەملەكەتكە قايتارۋدىڭ كەپىلى ەكەنىن جەتكىزدى.
– دامۋ بانكى – باعدارلاما وپەراتورى. سوندىقتان باعدارلامانى ىسكە اسىرۋدىڭ بۇكىل مەرزىمى ىشىندە وعان قاتىساتىن ەكىنشى دەڭگەيلى بانكتەردىڭ تولەم قابىلەتتىلىگىنە قاراماستان, الىنعان قاراجاتتىڭ مەملەكەتكە قايتارىلعانى ءۇشىن تولىق جاۋاپتى بولادى. قازىرگى ۋاقىتتا رەسەي بانكتەرىنىڭ ەنشىلەس كومپانيالارىنا سانكتسيالار ەنگىزىلۋىنە بايلانىستى جەڭىلدەتىلگەن اۆتوكرەديتتەر بەرەشەگىن ەكىنشى دەڭگەيلى باسقا بانكتەرگە اۋدارۋ بويىنشا جەدەل جۇمىس جۇرگىزىلدى, – دەدى ر.ىسقاقوۆ.
جەكە تۇلعالاردىڭ كرەديتتەرىنىڭ كوشى-قون پروتسەسى ىسكە قوسىلدى جانە كليەنتتەر ەشقانداي قيىندىقپەن بەتپە-بەت كەلىپ وتىرعان جوق.
وسى ورايدا, «سبەربانك» كليەنتتەرىنىڭ قولدانىستاعى قارىزدارىنا قاتىستى تالاپتار, اتاپ ايتقاندا نەسيە بەرەشەگىنىڭ قالدىعى, نەسيە بەرۋ مەرزىمى, اي سايىنعى تولەم جانە نەسيە مولشەرلەمەسى وزگەرىسسىز قالادى. قارىزدى قايتا تابىستاۋ كليەنت ءۇشىن قوسىمشا شىعىنعا اكەپ سوقپايدى. سونداي-اق قارىز بويىنشا قۇقىقتاردى باسقاعا بەرۋ, ەگەر قارىز الۋشى نەگىزگى بورىش بويىنشا اي سايىنعى تولەمدەردى جانە ەسەپتەلگەن پايىزدار بويىنشا تولەمدەردى بۇزباسا, ونىڭ كرەديتتىك تاريحىنا اسەر ەتپەيدى. كەستە بويىنشا اي سايىنعى وتەۋ كۇنى وزگەرىسسىز قالادى.
ەگەر «سبەربانكتىڭ» قارىز الۋشىسى Halyk Bank-ءتىڭ كليەنتى بولماسا, نەسيە بويىنشا تولەمدەردى جۇزەگە اسىرۋ ءۇشىن وعان Halyk Homebank ءموبيلدى قوسىمشاسىن جۇكتەپ, تىركەۋدەن ءوتۋ قاجەت. سودان كەيىن وعان قارىزدى وتەۋ ءۇشىن پلاستيكسىز Halyk Bonus Digital تسيفرلى كارتاسى دەرەۋ اشىلاتىن بولادى. اي سايىنعى تولەم سوماسى كەستە بويىنشا تولەم جاساۋ كۇنى Halyk Bank كارتاسىنان/شوتىنان اۆتوماتتى تۇردە الىنادى. سوندىقتان كليەنت ءوزىنىڭ كارتاكالىق نەمەسە اعىمداعى شوتىن ۇنەمى تولىقتىرىپ وتىرۋى قاجەت.
13 ساۋىردەن باستاپ كرەديتتەرى Halyk Bank-كە اۋدارىلعان كليەنتتەر ءوز قارىزىنىڭ مارتەبەسىن جسن بويىنشا بانك سايتىندا سىلتەمە ارقىلى تەكسەرە الادى.