«نۇر وتان» پارتياسى وبلىستىق فيليالىندا ەتنومادەني بىرلەستىكتەر جەتەكشىلەرى مەن وكىلدەرى قاتىسۋىمەن وتكەن دوڭگەلەك ۇستەلدە وسىنداي ۇسىنىس جاسالدى.
مۇنداي پىكىر بىلدىرگەن «داعىستان» ەتنومادەني ءبىرلەستىگىنىڭ توراعاسى راماز شيرانوۆتىڭ ايتۋىنشا, مەكتەپتەردە, ورتا بۋىن وقۋ ورىندارىندا قازاقستان حالقى اسسامبلەياسى ۇلگىسىندە ۇيىم قۇرۋدىڭ ماڭىزى زور. سوندا جەتكىنشەكتەردىڭ وزدەرىنىڭ قىزمەتىن ەش كەدەرگىسىز, ەشكىمنىڭ ارالاسۋىنسىز-اق بەلسەندى جۇرگىزۋىنە مۇمكىندىك اشىلىپ, بۇل ءوز كەزەگىندە دوستىق پەن باۋىرمالدىققا ەرتە باستان باۋلۋعا ۇلكەن ىقپال ەتەر ەدى. ر.شيرانوۆتىڭ ۇسىنىسى جىلى قابىلداندى.
كىشى اسسامبلەيانىڭ ءبىر شاڭىراق استىندا ءومىر ءسۇرىپ جاتقان سان ۇلت ورەندەرىنىڭ پاتريوتتىق, وتانشىلدىق سەزىمىن كوتەرۋ, ورتاق رۋحاني بايلىقتى باعالاۋ, ۇلتتىق سالت-داستۇرلەردى ساقتاۋ, انا ءتىلدى ايالاۋ سياقتى يگى ءىس-شارالارعا ۇيىتقى بولاتىنى تاعى انىق. قازاقستان حالقى اسسامبلەياسىنىڭ ۇلتتار مەن ۇلىستار اراسىنداعى تاتۋلىق پەن تۇسىنىستىكتى بىرىكتىرۋدە ءرولى ۇلكەن ەكەنىنە كوز جەتۋىنە وراي قوعامداعى ىنتىماقتاستىق مادەنيەتىن جاس ۇرپاق بويىنا ءسىڭىرىپ, ازاماتتىق ۇستانىم قالىپتاستىرۋدا جەتكىنشەكتەر ءۇشىن ۇيرەنەر ۇلگى بارى اتالدى.
ءسويتىپ, مەكتەپتەر جانىنان كىشى اسسامبلەيالار قۇرىلا باستايتىن بولدى.
ايقىن نەسىپباي,
«ەگەمەن قازاقستان».
قاراعاندى.