الەمدىك QS World University Ranking by Subject رەيتينگى بويىنشا ەۇۋ قازاقستاندىق جوو اراسىندا ءۇش ءپان بويىنشا ءبىرىنشى ورىندا, دەپ حابارلايدى Egemen.kz.
ەلىمىزدىڭ كەلەشەگىن قالايتىن كاسىبي بىلىكتى كادرلاردى تاربيەلەۋ – اسا جاۋاپتى ءارى ماڭىزدى مىندەت. بۇل رەتتە مەملەكەت باسشىسى جاڭا ەكونوميكانى قالىپتاستىرۋ جولىندا جوعارى وقۋ ورىندارىنىڭ باسەكەگە قابىلەتتىگىن ارتتىرۋ قاجەتتىگىن قاداپ ايتتى. مامانداردى دايارلاۋ ساپاسىن, ۋنيۆەرسيتەتتەردىڭ تيىمدىلىگىن, ءبىلىم بەرۋ باعدارلامالارىنىڭ وزەكتىلىگىن تاۋەلسىز رەيتينگتەر ارقىلى تارازىلاۋعا بولادى.
جىل سايىنعى QS World University Rankings by Subject 2022 پاندىك رەيتينگى جاريالاندى. الەمدىك ۋنيۆەرسيتەتتەردە وقىتىلاتىن پاندەردىڭ ساپاسىن بريتاندىق Quacquarelli Symonds اگەنتتىگى باعالادى. رەيتينگكە الەمنىڭ 1543 جوعارى وقۋ ورنى قاتىسقان.
الەمدىك رەيتينگتە ەلىمىزدىڭ جوعارى وقۋ ورىندارى دا بار. ماسەلەن, بيىل ل.ن. گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ QS پاندىك رەيتينگىسىندەگى پوزيتسيالارى كەڭەيدى جانە ايتارلىقتاي نىعايدى. ەۇۋ الەمنىڭ ۇزدىك ۋنيۆەرسيتەتتەرىنىڭ 11 پاندىك رەيتينگىسىنەن ورىن العان. وتكەن جىلى بۇل كورسەتكىش 4-كە جەتكەن.
حالىقارالىق رەيتينگ ناتيجەلەرى بويىنشا ەۇۋ قازاقستاندىق جوو اراسىندا 3 پاننەن كوش باستاپ كەلەدى: «قوناق ءۇي بيزنەسى جانە بوس ۋاقىتتى باسقارۋ», «ساياسات جانە حالىقارالىق زەرتتەۋلەر», «ونەر جانە ديزاين».
سونىمەن بىرگە وتاندىق ۋنيۆەرسيتەتتەرمەن قاتار ەۇۋ «تاريح», «لينگۆيستيكا», «فيزيكا جانە استرونوميا», «قۇقىقتانۋ» پاندەرى بويىنشا دا الدىڭعى قاتارلاردان ورىن الدى.
پاندىك رەيتينگتى وتكىزۋ بارىسىندا ۋنيۆەرسيتەتتىڭ اكادەميالىق ساراپشىلار مەن جۇمىس بەرۋشىلەر اراسىنداعى بەدەلى, عالىمداردىڭ عىلىمي زەرتتەۋلەرىنەن دايەكسوز الۋ, جاريالانىمداردىڭ حيرش يندەكسى باعالانادى.
الەمنىڭ 200 ۇزدىك پاندەرىنىڭ تىزىمىنە ەۋرازيا ۇلتتىق ۋنيۆەرسيتەتىنىڭ 6 ءپانى كىرەدى: «قوناق ءۇي بيزنەسى جانە بوس ۋاقىتتى باسقارۋ», «ونەر جانە ديزاين», «تاريح», «قۇقىقتانۋ», «ساياسات جانە حالىقارالىق زەرتتەۋلەر», «لينگۆيستيكا».
الەمنىڭ ۇزدىك جوو پاندىك رەيتينگىسىندە ل.ن. گۋميلەۆ اتىنداعى ەۋرازيا ۇلتتىق ۋنيۆەرسيتەتى كوپتەگەن كورسەتكىشتەر بويىنشا ونداعان ساتىعا كوتەرىلگەن. «قوناق ءۇي بيزنەسى جانە بوس ۋاقىتتى باسقارۋ»پانى العاشقى جۇزدىككە كىرسە, «لينگۆيستيكا» بويىنشا 251-300 ورىندارىنا يە الەمدىك ۋنيۆەرسيتەتتەر قاتارىنان 101-150 اراسىنداعى توپقا ەندى.
الەمدىك رەيتينگتىڭ توپ-500 قۇرامىنا ەۇۋ-ءنىڭ «ونەر جانە گۋمانيتارلىق عىلىمدار», «الەۋمەتتىك عىلىمدار جانە مەنەدجمەنت» پاندىك وبلىستارى, «ەكونوميكا جانە ەكونومەتريكا», «فيزيكا جانە استرونوميا», «بيزنەس جانە مەنەدجمەنت»پاندەرى كىردى.
ايتا كەتكەن ءجون, بيىلعى جىلى ەۇۋ-ءنىڭ «الەۋمەتتىك عىلىمدار جانە مەنەدجمەنت» پاندىك وبلىسى العاش رەت QS پاندىك رەيتينگىسىنە كىردى.