كەشەگى جولداۋ – ۇلكەن تاريحي وقيعا. سەبەبى ماڭىزدى قۇجاتتا ايتىلعان ماسەلەلەر ساياسي وزگەرىستەرگە باعىتتالعان. كونستيتۋتسياعا ەنەتىن وزگەرىستەردىڭ بارلىعى وتە كۇردەلى. مۇنىڭ بارلىعى وتە تۇبەگەيلى وزگەرىستەرگە اكەلەتىنى كۇمان كەلتىرمەيدى.
ەسەپ كوميتەتىنىڭ جوعارعى اۋديت پالاتاسى بولىپ قايتا اۋىسۋىنا قاتىستى كەيبىر ماسەلەلەرگە ەرەكشە توقتالعىم كەلىپ وتىر. سەبەبى مەن ءبىر كەزدەردە وسى ەسەپ كوميتەتىنىڭ باسشىسى بولىپ جۇمىس ىستەگەنمىن. سول كەزدەردە سول كوميتەتتىڭ جۇمىسىن جانداندىرۋعا تۇساۋ بولعان كوپتەگەن ماسەلەلەر, سونىڭ ىشىندە, كونستيتۋتسيادا جازىلعان ماسەلەلەردىڭ كەدەرگى بولعانىن ايتا كەتكىم كەلەدى.
بىرىنشىدەن, قازاقستان – ۋنيتارلى مەملەكەت. سوعان قاراماستان ءبىز كونستيتۋتسياعا ەسەپ كوميتەتىنىڭ اتاۋىن «رەسپۋبليكالىق بيۋدجەتتىڭ ورىندالۋىن باقىلايتىن ەسەپ كوميتەتى» دەپ جازدىق. بۇل جەردە بىرنەشە شەكتەۋ تۇر. كوميتەت تەك قانا رەسپۋبليكالىق بيۋدجەتتى باقىلاۋ كەرەك دەگەن. ال رەسپۋبليكالىق بيۋدجەت دەگەن وتە كوپ اقشا, ول ترانسفەرت رەتىندە ايماقتارعا بارادى. سايكەسىنشە, ەسەپ كوميتەتى ونى تەكسەرە المايدى.
ەسەپ كوميتەتى تۋرالى ارنايى زاڭ دايىنداۋعا دا ونىڭ ارنايى اتاۋى توسقاۋىل بولىپ وتىر. كەز كەلگەن مەملەكەتتە ىشتەي باقىلايتىن ورگان جانە سىرتتاي باقىلاۋ جۇرگىزەتىن تاۋەلسىز ينستيتۋتتار بولادى. تاۋەلدى, تاۋەلسىز دەگەن ۇعىم بيلىككە تاۋەلدىلىكتەن تۋىندايدى. ەسەپ كوميتەتى اتقارۋشى بيلىكتەن تاۋەلسىز بولۋى كەرەك. ال اۋديت پالاتالارىنىڭ بارلىعى اتقارۋشى بيلىكتەن تاۋەلسىز بولۋى قاجەت. بىزدە وسى ۋاقىتقا دەيىن وسىلاردىڭ اراجىگى زاڭدا انىق جازىلماعان. پرەزيدەنتتىڭ بيلىگىن ءبىز اتقارۋشى بيلىكتەن جوعارى دەپ قارايمىز با, الدە, اتقارۋشى بيلىكتىڭ جالعاسى ما؟ الدە, بولەك بيلىك پە؟ بىزدە پارلامەنت قانداي ءرول اتقارادى؟ حالىقتىڭ اتىنان سويلەيتىن زاڭ قابىلدايتىن ورگان با؟ وسى تۇرعىدان الىپ قاراساق, ەسەپ كوميتەتىن جوعارعى اۋديتورلىق پالاتا دەپ اتىن وزگەرتۋ وسىنداي بۇرىنعى شەكتەۋلەردىڭ بارلىعىن الىپ تاستاۋعا مۇمكىندىك بەرەدى. كونستيتۋتسياعا وسىنداي جاڭا اتپەن ەنەتىن بولسا, زاڭ قابىلداۋعا جول اشادى. جوعارى قارجىلىق باقىلاۋ ورگانى بولسا تاۋەلسىز ورگان بولۋى كەرەك.
تەك وسى ينستيتۋتتىڭ ءتيىمدى جۇمىسىنىڭ ارقاسىندا عانا ءبىز حالىقتىڭ بىرلىگى مەن مەملەكەتتىڭ تۇتاستىعىن ساقتاپ قالۋعا جول اشامىز. سەبەبى مەملەكەتتىڭ ءوزى اينالىپ كەلگەندە مەملەكەتتىڭ بيۋدجەتىنەن, سونىڭ ناقتى ءارى ءتيىمدى پايدالانۋىمەن تىعىز بايلانىستى. جاڭا اتاۋدىڭ ءوزى بۇل ينستيتۋتتىڭ جۇمىسىن, قۇزىرەتىن قازاقستاننىڭ بۇكىل اۋماعىندا جۇرگىزۋگە مۇمكىندىك اشادى. اسىرەسە قازاقستان سەكىلدى ۋنيتارلى مەملەكەتكە بۇل وتە قاجەت ورگان.
جاقسىبەك قۇلەكەەۆ,
مەملەكەت جانە قوعام قايراتكەرى