ەردوعان پارتياسىنىڭ جەڭىسى
تۇركيا پرەمەر-ءمينيسترى رەجەپ تايىپ ەردوعان ءوزىنىڭ ادىلەت جانە دامۋ پارتياسى ەلدەگى وتكەن جەرگىلىكتى سايلاۋلاردا جەڭىسكە جەتكەنىن جاريا ەتتى. بۇعان قوسا, ول جاقتاستارىنا قاراتا ايتقان سوزىندە قارسىلاستارى ءوزىنىڭ اتاعىنا كىر كەلتىرىپ, نامىسىن اياقاستى ەتكىلەرى كەلگەندەرى ءۇشىن «سازايلارىن تارتاتىنىن» مالىمدەدى. ياعني, ۇكىمەت باسشىسى قارسىلاستارىن بيلىكتەن الاستاتپاق.
سايلاۋ بيۋللەتەندەرىن رەسمي ەسەپتەۋ ءالى اياقتالعان جوق. دەگەنمەن, بيۋللەتەندەردىڭ 85 پايىزى تەكسەرىلگەننەن كەيىن ەردوعان پارتياسىنىڭ ايقىن باسىمدىقپەن جەڭىسكە جەتكەنى ءمالىم بولىپ وتىر. ونىڭ قارسىلاسى – حالىقتىق-رەسپۋبليكالىق پارتيا ەكىنشى ورىنعا تۇراقتاناتىن سىڭايلى. ەسكە سالا كەتسەك, تۇركياداعى سايلاۋالدى ناۋقانى ۇلكەن جەمقورلىق جانجالدار اياسىندا وتكەنى بەلگىلى. سوعان قاراماستان, حالىق تاعى دا ەردوعانعا سەنىم ارتۋدا. ول تۇركيا پرەمەر-ءمينيسترى ورىنتاعىندا 11 جىلدان استام ۋاقىتتان بەرى وتىر.
ۋلتراوڭشىلداردىڭ تابىسى
كوسەمى پرەزيدەنت فرانسۋا وللاند بولىپ تابىلاتىن فرانتسيانىڭ سوتسياليستىك پارتياسى ەلدە ءوتىپ جاتقان مۋنيتسيپالدى سايلاۋلاردىڭ ەكىنشى تۋرىندا جەڭىلىس تاپتى. سوتسياليستەر شامامەن 40,5 پايىز داۋىس جيناعان. كوش باسىنا «حالىقتىق قوزعالىس ءۇشىن وداق» پارتياسىنىڭ ليبەرال-كونسەرۆاتورلارى شىعىپ كەتكەن. ولاردى سايلاۋشىلاردىڭ 46 پايىزى قولداپ, ءوز داۋىستارىن بەرگەن.
الەۋمەتتىك ساۋالدامالارعا سۇيەنەر بولساق, وتستاۆكاعا كەتۋى ىتيمال ءارى تانىمالدىلىعى جاعىنان ەڭ تومەن ۇكىمەت مۇشەلەرى پرەمەر-مينيستر جان-مارك ەرو, سىرتقى ىستەر ءمينيسترى لوران فابيۋس جانە ىشكى ىستەر ءمينيسترى مانۋەل ۆالس بولىپ وتىر. مۋنيتسيپالدى سايلاۋداعى جالپى جەڭىلىسكە قاراماستان, پاريجدە سوتسياليستىك پارتيا وزىپ شىقتى. ءسويتىپ, ەل استاناسىندا انن يدالگو جەڭىسكە جەتىپ, پاريج تاريحىندا العاشقى ايەل مەر اتاندى. بۇعان دەيىن ول قازىرگى مەر بەرتران دەلانوەنىڭ ورىنباسارى بولعان ەدى. ال بۇگىندە ەلدە فرانسۋا وللاند رەيتينگىنىڭ تومەندەگەنى انىق بايقالادى.
قوس كورەيا ءبىر-بىرىنە وق اتتى
كەشە سولتۇستىك جانە وڭتۇستىك كورەيا ەلدەرى تەڭىز شەكاراسى اۋدانىندا ءبىر-بىرىنە ارتيللەريادان وق جۇمسادى. بۇعان دەيىن كحدر وڭتۇستىك كورشىلەرىن سارى تەڭىزدە جاتتىعۋلار وتكىزۋ نيەتى بار ەكەنىنەن قۇلاعدار ەتكەن ەكەن. وڭتۇستىك كورەيا قورعانىس مينيسترلىگى وكىلدەرىنىڭ سوزدەرىنە قاراعاندا, سولتۇستىككورەيالىق سناريادتاردىڭ ءبىر بولىگى تەڭىز شەكاراسىنىڭ وڭتۇستىككورەيالىق جاعىنا قۇلاعان.
سودان كەيىن وڭتۇستىك كورەيا تاراپى ارتيللەريالىق قارۋدان جاۋاپ وق اتۋعا شەشىم قابىلداعان. سناريادتارمەن «الماسۋلار» وڭتۇستىك كورەيانىڭ پەننەندو ارالىنا جاقىن ماڭدا ورىن العان. ارالدا تۇرعىنداردىڭ قاۋىپسىز جەرلەرگە ەۆاكۋاتسياسى جاريالانسا, زارداپ شەككەندەر تۋرالى ناقتى ەشتەڭە ايتىلمايدى. جىل باسىنان بەرى كحدر بىرقاتار زىمىراندىق سىناقتاردى جۇزەگە اسىرعانى بەلگىلى. ناۋرىز ايىنىڭ سوڭىندا ورتا قاشىقتىقتاعى ەكى بالليستيكالىق زىمىران ۇشىرىلدى. بۇل ارەكەت بۇۇ تاراپىنان جازعىرىلعان دا بولاتىن.
كوز جۇمعاندار سانى 20-دان استى
ۆاشينگتوندا لاي كوشكىنىنەن قازا تاپقاندار سانى, رەسمي دەرەك بويىنشا, 21 ادامعا جەتكەن. بۇل تۋرالى وڭىرلىك جەدەل قىزمەت وكىلدەرىنە سىلتەمە جاساي وتىرىپ حابارلاندى. بۇعان دەيىن قازا تاپقاندار سانى 18 ادام دەلىنىپ كەلگەن بولاتىن. جەدەل قىزمەتتەگىلەردىڭ سوزىنە قاراعاندا, جاقىن ارادا قازا تاپقانداردىڭ رەسمي ءتىزىمى تاعى 4 اداممەن تولىعۋى ىقتيمال.
وقيعا بولعان جەردە جۇمىس ىستەپ جاتقان قۇتقارۋشىلار 4 ادامنىڭ ءمايىتىن تاپقان. ولار ساراپتاماعا جىبەرىلىپتى. ال كوشكىن سالدارىنان ءىز-ءتۇزسىز جوعالىپ كەتكەندەر قاتارىن 30 ادام تولىقتىرىپ وتىر. اۋەلدە ولاردىڭ سانى 170 دەلىنگەن ەدى. بىراق كەيىن مۇنىڭ تىم اسىرا ايتىلعان سان ەكەنى انىقتالدى. نوسەر جاڭبىر تۋىنداتقان لاي كوشكىنى 22 ناۋرىز كۇنى سيەتل قالاسىنىڭ سولتۇستىك-شىعىسىنان 88 شاقىرىم جەردەگى وسو ەلدى مەكەنىندە ورىن العان ەدى.
مىسىردا پرەزيدەنت سايلاۋى وتەدى
ەگيپەتتىڭ ورتالىق سايلاۋ كوميسسياسى الداعى پرەزيدەنت سايلاۋىنىڭ رەسمي كۇنىن بەلگىلەدى. ءسويتىپ, ەلدەگى ەڭ جوعارى لاۋازىمعا سايلاۋ 2014 جىلدىڭ 26 جانە 27 مامىرىندا وتەتىن بولدى. قاجەت بولعان جاعدايدا سايلاۋدىڭ ەكىنشى كەزەڭى 16 جانە 17 ماۋسىمدا وتكىزىلمەك. ال داۋىس بەرۋلەردىڭ قورىتىندىسى سايلاۋ وتكەن سوڭ 10 كۇننەن كەشىكتىرىلمەي رەسمي تۇردە جاريا ەتىلۋى ءتيىس.
ۇمىتكەرلەردى تىركەۋ ۇدەرىسى كەشە باستالىپ كەتتى جانە ول 20 ساۋىرگە دەيىن جالعاسادى. سايلاۋ ناۋقانى رەسمي تۇردە 3 ناۋرىزدا باستالسا, سايلاۋعا ءۇش كۇن قالعاندا مارەسىنە جەتەتىن بولادى. مىسىردىڭ بۇرىنعى پرەزيدەنتى موحاممەد مۋرسي تاعىنان وتكەن جىلعى شىلدە ايىنىڭ باسىندا ەلدەگى جاپپاي نارازىلىق شەرۋلەرىنەن سوڭ تايدىرىلعان ەدى. ال ول سول وقيعادان ءبىر جىل بۇرىن ەل تاريحىندا بۇكىل حالىق بولىپ سايلاعان العاشقى مەملەكەت باسشىسى بولعان-تىن. بۇگىندە مۋرسي بىرنەشە باپ بويىنشا قىلمىستى دەپ تانىلىپ وتىر. ادلي مانسۇر قازىرگى كەزدە مىسىردىڭ ۋاقىتشا پرەزيدەنتى بولىپ تابىلادى.
پارا الدى دەپ ايىپتالىپ وتىر
سوت ءيزرايلدىڭ بۇرىنعى پرەمەر-ءمينيسترى ەحۋد ولمەرتكە Holyland قۇرىلىس كومپانياسىنىڭ ءىسى بويىنشا جەمقورلىققا بوي الدىردى دەپ كىنا تاقتى. بۇل ءىس بويىنشا تاعى دا 9 ادام ايىپتالىپ وتىر. ولاردىڭ ىشىندە ولمەرتتىڭ بۇرىنعى كەڭەسشىسى شۋلا زاكەن, يەرۋساليمنىڭ بۇرىنعى مەرى ۋري لۋپوليانسكي جانە باسقالار بار. تاعى ءۇش ادام اقتاپ الىنىپتى.
تەرگەۋ مالىمدەپ وتىرعانىنداي, ولمەرت يەرۋساليم مەرى بولىپ تۇرعان كەزىندە قۇرىلىس جوبالارىن قولداعانى ءۇشىن پارا الىپ كەلىپتى. بىراق بۇرىنعى پرەمەر-مينيستر ءوزىنىڭ كىناسىزدىگىن ايتىپ, اقتالۋدا كورىنەدى. جالپى, اتالعان قۇرىلىس كومپانياسىنا قاتىستى بۇل ءىس يزرايل تاريحىنداعى اسا ءىرى جەمقورلىق جانجالداردىڭ ءبىرى بولىپ وتىر. جانە دە بۇل جەمقورلىققا بوي الدىردى دەگەن تۇرعىداعى ولمەرتكە قاتىستى العاشقى ءىس ەمەس. 2008 جىلى ول جەمقورلىق جانجالعا بايلانىستى ۇكىمەت باسشىسى لاۋازىمىمەن قوشتاسۋعا ءماجبۇر بولعان ەدى.
قىسقا قايىرىپ ايتقاندا:
پاكىستان سوتى ەلدىڭ بۇرىنعى پرەزيدەنتى پەرۆەز مۋشاررافتى مەملەكەتكە ساتقىندىق جاسادى دەپ ايىپتادى. ول 2007 جىلى, ياعني پرەزيدەنت بولىپ تۇرعان كەزىندە ەل اۋماعىندا توتەنشە جاعدايلار ەنگىزىپ, ءوزىنىڭ وكىلەتتىلىگىن ايتارلىقتاي ارتتىرعان بولاتىن. وعان وسى ارەكەتى ايىپ بولىپ تاعىلىپ وتىر. ەندى مۋشارراف, ەل زاڭناماسىنا سايكەس, ءولىم نەمەسە ومىرباقي تۇرمەدە وتىرۋ جازاسىنا كەسىلۋى ءتيىس. ول پاكىستاندى 1999-2008 جىلدار ارالىعىندا باسقارعان بولاتىن.
رەسەيلىك كاسىپكەر ميحايل حودوركوۆسكي شۆەيتساريادا تۇرۋعا رەسمي رۇقسات الدى. رۇقسات قاعازى 27 ناۋرىزدا بەرىلگەن. ول سانكت-گاللەن كانتونىندا تۇرۋدى قالاپتى. ويتكەنى, زايىبى مەن بالالارى سوندا تۇرىپ جاتىر ەكەن. سونىمەن قاتار, اتالعان كانتوندا سالىق رەجىمى وڭتايلى كورىنەدى. كاسىپكەر ەۋروپاعا تۇرمەدەن شىعارىلىسىمەن جەدەل ۇشىپ كەتكەن بولاتىن. ەندى ول رەسەيگە ورالعىسى جوق ەكەنىن دە مالىمدەپ ۇلگەرىپتى. حودوركوۆسكيدىڭ ەكى قىلمىستىق ءىس بويىنشا كىنالى دەپ تانىلىپ, 10 جىل تۇرمەدە وتىرىپ شىققانى بەلگىلى.
ينتەرنەت ماتەريالدارى نەگىزىندە ازىرلەندى.