بىرلىگىمىز جاراسقان, بەرەكەمىز بەل اسقان

قازاقستان كورەيلەرىنىڭ 30 پايىزى دەرلىك اسقار الاتاۋ باۋرايىنداعى ارۋ قالادا تۇرادى. بيىل الماتى كورەيلەرى ورتالىعى ءوزىنىڭ 25 جىلدىعىن اتاپ وتۋدە. ول قازاقستاننىڭ بارلىق ەتنوستارىنا تولىققاندى ءومىر ءسۇرۋ مۇمكىندىگىن سىيلاعان ءبىزدىڭ ەلىمىزدىڭ تاۋەلسىزدىگىمەن قاتار قۇرىلىپ, قاتارلاسا دامىپ كەلەدى. قازىر ءبىز الداعى 18 ساۋىردە «2050» ستراتەگياسى – الەم مادەنيەتى, رۋحانيات جانە كەلىسىم» دەگەن ۇرانمەن وتەتىن قازاقستان حالقى اسسامبلەياسىنىڭ XXI سەسسياسىنا ۇلكەن جاۋاپكەرشىلىكپەن دايىندالۋدامىز. ءبىزدىڭ مىندەت – ارقايسىمىز ءوز ورنىمىزدا قوعامىمىزدىڭ بىرلىگىن ودان ءارى نىعايتۋعا ناقتى ۇلەس قوسۋ. كەلەسى جىلى قازاقستان حالقى اسسامبلەياسىنا 20 جىل تولادى. الىس-جاقىنعا تانىمال بۇل ۇيىم ابىرويلى اسۋ-بەلەستەردەن سۇرىنبەي ءوتتى. بارشامىز تاريحتىڭ تۇتاستاي تەگەۋرىندى قادامىنان كورىپ وتىرعانىمىزداي, ءبىزدىڭ تۇراقتى دامۋىمىز, ەڭ باستىسى – مىنا بەيمازا الەمدەگى بەرەكەلى دە بايان­دى تىنىشتىعىمىز ەتنوس­ارالىق قاتىناستاردى ۇيلەس­تىرۋ ورايىنداعى وسىناۋ ينس­تيتۋتتىڭ ماڭىزدىلىعىن ايعاقتاي تۇسۋدە. ال بۇل بەرەكە-بىرلىكتى جان-جاقتى نىعايتىپ, دامىتا بەرۋىمىز كەرەكتىگىن ءبىز جاقسى تۇسىنەمىز. قازاقستاندا 130-دان اسا ۇلت بار. سولاردىڭ 60-تان استامى, سونىڭ ىشىندە كورەيلەر دە بايىرعى قازاق جەرىنە زورلىق-زومبىلىقپەن جەر اۋدارىلعان بولاتىن. ءبىز سول ءبىر قيىن-قىستاۋ جىلداردا اكەلەرىمىز بەن اتالارىمىز قازاق حالقىنىڭ قولداۋى مەن كومەگىنىڭ, شاپاعاتى مەن مەيىرىمىنىڭ ارقاسىندا جان ساقتاعانىن, شىنايى دوستىق-بىرلىكتىڭ سول كەزدە وركەن جايعانىن استە ۇمىتپايمىز. قازىر ءبىزدىڭ وتباسىلارىمىزدىڭ دا كوپۇلتتى بولىپ كەلەتىنى ۇيرەنشىكتى جايعا اينالدى. ايتالىق, مەنىڭ ءوزىمنىڭ نەمەرەلەرىم – قازاق. قازاقپەن قانى قوسىلعان كورەيلەر جەتەرلىك. باسقا ۇلتتار تاراپىنان دا وسىنداي ءۇردىستى مولىنان بايقايمىن. وسىنىڭ ءوزى-اق جاراسىمدى بىرلىگىمىزدى, بەرەكەلى تىرلىگىمىزدى كورسەتپەي مە؟ ەندەشە, وسىنداي دوستىعىمىزدى, بىرلىگىمىز بەن تاتۋلىعىمىزدى كوزدىڭ قاراشىعىنداي ساقتاۋعا ءتيىسپىز. ەلباسى نۇرسۇلتان نازارباەۆتىڭ العا قويعان ستراتەگيالىق ماقساتتارىن تابىستى ورىنداۋدىڭ كەپىلى دە وسى ايتىلعاندار ەكەنى كۇمانسىز. برونيسلاۆ شين, قحا مۇشەسى, الماتىداعى كورەي ۇلتتىق ورتالىعىنىڭ توراعاسى, الماتى قالالىق ءماسليحاتىنىڭ دەپۋتاتى. الماتى.