مەملەكەت باسشىسىنىڭ سوت تورەلىگىنە قولجەتىمدىلىكتى قامتاماسىز ەتۋ جونىندە سۋديالاردىڭ ءVى سەزىندە بەرگەن تاپسىرماسىن ورىنداۋعا باعىتتالعان شارالاردىڭ ءبىرى رەتىندە كەشە جوعارعى سوت جانىنداعى سوتتاردىڭ قىزمەتىن قامتاماسىز ەتۋ دەپارتامەنتى مەن «قازاقستان حالىق بانكى» اق اراسىندا ىنتىماقتاستىق تۋرالى مەموراندۋمعا قول قويىلدى. بۇل ازاماتتاردىڭ مەملەكەتتىك الىمدار مەن اكىمشىلىك ايىپپۇلداردى تولەۋ امالدارىن جەڭىلدەتىپ, ۋاقىتتى بارىنشا ۇنەمدەۋگە مۇمكىندىك بەرەدى جانە سوت اكتىلەرىن ورىنداۋ ساپاسىن جاقسارتادى دەگەن سەنىم بار.
مەموراندۋم «وزىنە-ءوزى قىزمەت كورسەتۋ جەلىسى ارقىلى تولەمدەر» جوباسىن ىسكە اسىرۋعا باعىتتالعان. جوبا شەڭبەرىندە 2014 - 2018 جىلدارى اكىمشىلىك ايىپپۇلداردى, مەملەكەتتىك الىمدار مەن وزگە دە تولەمدەردى تولەم تەرمينالدارى ارقىلى قابىلداۋ جۇيەسى ىسكە قوسىلاتىن بولادى. بانكتىڭ ناقتىلانعان كوميسسيالىق سوماسى 50 تەڭگەنى قۇرايدى (ەكىنشى دەڭگەيلى وزگە بانكتەردە بۇل سوما 200 تەڭگەنى قۇراۋى مۇمكىن). «وزىنە-ءوزى قىزمەت كورسەتۋ جەلىسى ارقىلى تولەمدەر» جوباسىن بارلىق جەرگىلىكتى سوتتار مەن رەسپۋبليكا قالالارىندا ىسكە اسىرۋ جوسپارلانىپ وتىر. قازىرگى تاڭدا تولەم تەرمينالدارى استانا قالاسىنداعى ءۇش سوتتا: مامانداندىرىلعان اۋدانارالىق اكىمشىلىك سوتتا, الماتى جانە سارىارقا اۋداندارىنىڭ سوتتارىندا ورناتىلعان.
«ەگەمەن-اقپارات».