قازاقستان پرەزيدەنتى جانىنداعى ادام قۇقىقتارى جونىندەگى كوميسسيانىڭ توراعاسى, پارلامەنت ءماجىلىسىنىڭ دەپۋتاتى قۋانىش سۇلتانوۆتىڭ بىرىككەن ۇلتتار ۇيىمىنىڭ (بۇۇ) ءدىن جانە سەنىم بوستاندىعى ماسەلەلەرى جونىندەگى ارنايى بايانداماشىسى حاينەر بيلەفەلدتپەن كەزدەسۋى بولىپ ءوتتى.
كەزدەسۋ بارىسىندا تاراپتار قازاقستانداعى ادام قۇقىقتارىنىڭ احۋالىمەن قاتار, اركىمنىڭ ءدىني سەنىم بوستاندىعى كونستيتۋتسيالىق قۇقىقتارىنىڭ ساقتالۋى ماسەلەلەرىن دە قوسا تالقىلادى.
ق.سۇلتانوۆ كونستيتۋتسيا بويىنشا زايىرلى مەملەكەت بولىپ تابىلاتىن قازاقستاننىڭ بارلىق ءدىني كونفەسسيالاردىڭ ەركىن دامۋىنا كەپىلدىك بەرەتىنىن جانە ءدىني بىرلەسۋ بوستاندىعى قۇقىعىنىڭ ساقتالۋى سالاسىنداعى قولدانىستاعى نورمالار مەن حالىقارالىق مىندەتتەمەلەردى وسى قوعامدىق قاتىناستاردى رەتتەۋدەگى قۇقىق قولدانۋ تاجىريبەسىنە يە ەكەنىن اتاپ ءوتتى.
قازاقستاننىڭ زاڭناماسى ازاماتتاردىڭ ءدىني سەنىم بوستاندىعىنا قۇقىقتارىن ىسكە اسىرۋىنا كەپىلدىك بەرەدى. ازاماتتىق ءجانە ساياسي قۇقىقتار تۋرالى حالىقارالىق پاكت سياقتى قازاقستاندىق زاڭنامادا دا ادامنىڭ ءدىن ۇستانۋ نەمەسە سەنىمىن تاراتۋ ەركىندىگىن جۇزەگە اسىرۋى تەك قوعامدىق ءتارتىپ پەن قاۋىپسىزدىكتى, باسقا ازاماتتاردىڭ ءومىرىن, دەنساۋلىعىن, يماندىلىعىن نەمەسە قۇقىقتارى مەن بوستاندىقتارىن قورعاۋ ماقساتىندا عانا زاڭمەن شەكتەلۋى مۇمكىن ەكەندىگى بەكىتىلگەن.
بۇۇ-نىڭ ارنايى بايانداماشىسى ادام قۇقىقتارى جونىندەگى كوميسسيانىڭ جاڭا قۇقىق قورعاۋ جوبالارىمەن, ءىشىنارا العاندا جاڭا قازاقستانداعى ادام قۇقىقتارى سالاسىنداعى 2020 جىلعا دەيىنگى ءىس-قيمىل جوسپارىنىڭ ازىرلەنۋىمەن جانە حالىقتىڭ نەعۇرلىم الەۋمەتتىك جاعىنان از قورعالاتىن توپتارىنىڭ قۇقىقتارىن قورعاۋدىڭ وزەكتى ماسەلەلەرىنە قاتىستى دايىندالاتىن ارنايى باياندامالاردىڭ جوباسىمەن تانىستى.
بۇۇ-نىڭ ارنايى بايانداماشىسى ادام قۇقىقتارى جونىندەگى كوميسسيانىڭ قۇقىق قورعاۋ قىزمەتىنە وڭ باعا بەرىپ, جاڭا جوبالاردى ازىرلەۋدە ساتتىلىك تىلەدى.
ءوز كەزەگىندە ق.سۇلتانوۆ بۇۇ-عا ادام قۇقىقتارىن قورعاۋ جانە كوتەرمەلەۋ سالاسىنداعى سىندارلى ىنتىماقتاستىعى ءۇشىن العىس ايتتى جانە كوميسسيانىڭ ادام قۇقىقتارى سالاسىنداعى ودان ءارى سىندارلى ىنتىماقتاستىققا دايىن ەكەنىن ءبىلدىردى.
«ەگەمەن-اقپارات».