سولتۇستىك قازاقستان وبلىسىنىڭ اكىمدىگى بەلگىلى كونكيشى, سوچي وليمپياداسىنا قاتىسۋشى رومان كرەچكە بەرگەن ۋادەسىن ورىنداپ, وعان ەكى بولمەلى پاتەردىڭ كىلتىن تاپسىردى.
ماسەلە مىنادا. وسىنىڭ الدىندا وبلىس ورتالىعىنىڭ سپورتشى تۇراتىن اۋدانىنداعى جەر ۇيلەردىڭ ءبارى بۇزىلىپ, ونىڭ ورنىنا جاڭا عيماراتتار قۇرىلىسى جۇرگىزىلەتىن بولىپ شەشىم قابىلدانعان. سوندىقتان رومانعا باسپاناسىز قالۋ قاۋپى تونگەن. ونىڭ بۇل ۋايىمىن ەستىگەن بۇقارالىق اقپارات قۇرالدارى سول بويدا دابىل قاقتى. سويتسەك, بۇل جايدان وبلىس پەن قالا باسشىلىعى دا حاباردار بولىپ وتىر ەكەن. ولار سپورتشىنى دالادا قالدىرماۋدىڭ بار شاراسىن جاساپ, وعان تەز ارادا جاڭا پاتەر دايىنداپ بەرۋگە قول جەتكىزدى.
سپورتشى پاتەرگە 22 ناۋرىز كۇنى كەلىپ كىردى. شىنى كەرەك, روماننىڭ ءوزى ءدال مەرەكە كۇندەرى وسىنداي قۋانىشقا كەنەلەم دەپ ويلاماپتى. «پاتەر ماعان ۇنادى. بارلىعى دا ساپالى ىستەلگەن. بۇل مەن ءۇشىن ۇلكەن تارتۋ. وبلىس اكىمدىگى تاراپىنان مۇنداي زور كوڭىل ءبولۋ مەنى جاڭا جەڭىستەرگە جىگەرلەندىرەدى», – دەدى رومان كرەچ.
سپورتشىنى قۇتتىقتاۋعا وسى ۇيدە تۇراتىن سپورتشى-دوستارى – جەڭىل اتلەتيكادان حالىقارالىق دارەجەدەگى سپورت شەبەرى مارگاريتا مۇقاشەۆا, ەۆگەني مەن يرينا ەكتوۆتار, سپورتتىق باعدارلاۋ بويىنشا حالىقارالىق دارەجەدەگى سپورت شەبەرى اسلان توقباەۆ كەلدى.
ايتا كەتەرلىگى, سوڭعى ەكى جىلدا سولتۇستىك قازاقستان وبلىسىنىڭ بەلگىلى 6 سپورتشىسىنا پاتەرلەر بەرىلدى, 42 سپورتشى وزدەرىنىڭ جەتىستىكتەرى ءۇشىن وبلىس اكىمىنىڭ ستيپەندياسىن الىپ وتىر.
دامير قوجامقۇل.