الماتىداعى قازاقستان-رەسەي مەديتسينا ۋنيۆەرسيتەتىنىڭ حالىق مەديتسيناسى فاكۋلتەتى مەن رەسپۋبليكا حالىق ەمشىلىگى ورتالىعىنداعى مەديتسينالىق ازىرلىك كۋرسى جىلىنا جۇزدەگەن تۇلەك ۇشىرادى. سونىڭ ارقاسىندا كەيىنگى ون-ون بەس جىلدىڭ ىشىندە قازاق حالىق مەديتسيناسى جاڭا ساپالىق دەڭگەيگە كوتەرىلدى. ەمشىلەر قاتارى تابيعي قابىلەتىن دارىگەرلىك عىلىم جەتىستىكتەرىمەن بايىتقان, ەكى ەنەنى تەل ەمگەن ماماندارمەن تولىقتى. ولار تۇقىم قۋالاعان ەمقوستىق قاسيەتتەرىنىڭ سىرتىندا وسى زامانعى ەمدىك-ناقتامالىق قۇرالداردى دا ەركىن مەڭگەرگەن.
ءيا, ءداستۇرلى مەديتسينانى رەسمي مەديتسينامەن ۇشتاستىرعان بۇگىنگى ەمشىلەردىڭ دەنساۋلىق ساقتاۋ سالاسىندا ءوز ورنى بار. ولار قازىردە كەڭ-بايتاق قازاقستاننىڭ تۇكپىر-تۇكپىرىندە ەڭبەك ەتەدى. حالىقارالىق جيىندارعا بەلسەندى اتسالىسادى, الىس-جاقىن شەتەلدەرگە دە جاقسى ءمالىم.
كوك مۇحيتتىڭ ار جاق, بەر جاعىن ءتانتى ەتكەن قازاق ەمقوستارى بىلتىرعى جىلدى دا تولىمدى تابىستارمەن ءتامامدادى. سونىڭ ءبىر دالەلى – قازاقستان رەسپۋبليكاسى حالىق جانە رۋحاني ەمشىلەر مەكەمەسى جۋىردا دەنساۋلىق ساقتاۋ سالاسىنداعى قازاقستان, رەسەي, ۋكراينا, بەلارۋس, ازەربايجان مەملەكەتتەرى اراسىندا وتكەن حالىقارالىق بايقاۋدىڭ جۇلدەگەرى اتاندى. مەكەمەنىڭ باس ديرەكتورى, پروفەسسور شاكەن قاجى شىنتاەۆ سالا كوشباسشىسى دەپ تانىلىپ, ءداستۇرلى جانە رەسمي مەديتسينانى ينتەگراتسيالاۋعا قوسقان ۇلەسى جانە حالىق دەنساۋلىعىن ساقتاۋداعى ەڭبەگى ءۇشىن «قازاقستان داڭقى» وردەنىمەن ماراپاتتالدى. مەكەمە باس ديرەكتورىنىڭ ورىنباسارى نۇرگۇل وتەباەۆاعا «ەڭبەكتەگى جەتىستىكتەرى ءۇشىن» مەدالى تاپسىرىلدى. ال وسى مەكەمەنىڭ باس ەسەپشىسى كۇلمەسحان نۇرعوجاەۆا, رەفەرەنت-حاتشىلارى ليۋدميلا چەرنىح پەن ليۋبوۆ ۆيەگەل حالىقارالىق بايقاۋدى ۇيىمداستىرۋ كوميتەتىنىڭ سەرتيفيكاتتارىنا يە بولدى.
– تاۋەلسىزدىك قازاقتىڭ حالىق ەمىن جۇرتشىلىقپەن قايتا قاۋىشتىردى. ال قازاقستان ۇلتتىق دەنساۋلىق ساقتاۋ پالاتاسىنىڭ قۇرامىنا ەنۋى ەكىنشى تىنىسىن اشتى, – دەيدى وسى كوزايىم وقيعاعا بايلانىستى قازاقستان حالىق ەمشىلىگىنىڭ باسشىسى, پروفەسسور شاكەن قاجى.
قورعانبەك امانجول,
«ەگەمەن قازاقستان».
الماتى.