كەشە قازاقستاننىڭ ورتالىق كوممۋنيكاتسيالار قىزمەتىندە ق.ساتباەۆ اتىنداعى قازاق ۇلتتىق تەحنيكالىق ۋنيۆەرسيتەتىنىڭ رەكتورى جەكسەنبەك ءادىلوۆ پەن اباي اتىنداعى قازۇپۋ-ءدىڭ وقۋ ءىسى جونىندەگى پرورەكتورى اقتولقىن قۇلساريەۆانىڭ قاتىسۋىمەن بريفينگ ءوتتى. وندا ەلباسى ن.نازارباەۆتىڭ «قازاقستان جولى – 2050: ءبىر ماقسات, ءبىر مۇددە, ءبىر بولاشاق» اتتى جولداۋىنداعى ۇلتتىق ءبىلىم ساپاسىن جاقسارتۋ, وتاندىق عىلىمنىڭ الەۋەتىن كوتەرۋ تۋرالى ايتقان ويلارى اڭگىمەگە ارقاۋ بولدى.
الدىمەن ءسوز العان قازۇتۋ رەكتورى ج.ءادىلوۆ ەلىمىزدىڭ ارى قاراي دامىپ, الەمنىڭ وركەنيەتتى وتىز ەلىنىڭ قاتارىنا قوسىلۋى قادامىنا مەملەكەت باسشىسىنىڭ جولداۋى تەمىرقازىق ىسپەتتى ەكەنىن اتاپ كورسەتتى. اسىرەسە, عىلىم مەن ءبىلىمنىڭ دامۋى ءۇشىن ايتىلعان تاپسىرمالار باسەكەگە قابىلەتتى ماماندار دايارلاۋدا, عىلىمنىڭ الەۋەتىن كوتەرۋدە ناقتى ۇستانىمعا اينالۋى ءتيىس ەكەنىن جەتكىزدى. «ەلباسىنىڭ مىندەتتەرىن ورىنداۋ بارىسىندا, ياعني ۋنيۆەرسيتەتتە وقۋ ساپاسىن جوعارىلاتۋ ءۇشىن جاڭا باعدارلامالار جاساۋدى قولعا الدىق. ونىڭ ىشىندە «عارىشتىق تەحنيكا جانە تەحنولوگيا» ماماندىعىن, يادرولىق ەنەرگەتيكالىق قۇرىلعىلار مەن يادرولىق حيميالىق تەحنولوگيانى جەتىلدىرۋ, اتومدىق ەنەرگەتيكا بويىنشا ءبىلىم بەرۋ باعدارلاماسىن جاساپ شىعۋ جانە ونى ەنگىزۋ مىندەتى تۇر. وقۋ وردامىز قازاقستاندا گەولوگيالىق كلاستەر قۇرۋ جۇمىسىنا, اتاپ ايتقاندا, پايدالى قازبالار قورىنا بولجام جاساۋعا, بولاشاعى بار كەن ورىندارىن انىقتاۋعا, «كاسىبي ينجەنەرلەردى سەرتيفيكاتتاۋدىڭ ۇلتتىق جۇيەسى» اتتى جوبانى جاساۋعا تىكەلەي قاتىسپاق نيەتتەمىز» – دەدى رەكتور. ول جاقىن جىلداردا عىلىم سالاسىن ءبىرشاما جاقسى وزگەرىستەر كۇتىپ تۇرعانىن, ونىڭ عىلىمعا بولىنەتىن قاراجاتتىڭ ىشكى جالپى ءونىمنىڭ 3 پايىزىن قۇراۋىمەن تىكەلەي بايلانىستى ەكەنىن اتاپ ءوتتى. سونداي-اق, بولاشاقتا ۋنيۆەرسيتەتتەردىڭ اۆتونومدى باسقارۋ جۇيەسىنە ءوتۋى دە باسەكەلەستىكتى ارتتىرىپ, وتاندىق عىلىمنىڭ كوكجيەگىن كەڭەيتۋگە سەبەپشى بولاتىنىن تىلگە تيەك ەتتى. «ەلىمىزدە بۇل جاڭا ۇدەرىسكە 106 وقۋ ورنى دايار تۇر. بىراق, سونىڭ 5-6-ۋى عانا اۆتونومدى باسقارىلۋى مۇمكىن», – دەپ ءسوزىن تۇيىندەدى جەكسەنبەك ءادىلوۆ.
اباي اتىنداعى قازۇپۋ-ءدىڭ وقۋ ءىسى جونىندەگى پرورەكتورى اقتولقىن قۇلساريەۆا كەڭەس وداعىندا عىلىمعا ىشكى جالپى ءونىمنىڭ 4-5 پايىزى كولەمىندە قاراجات بولىنگەنىن, بۇل سول تۇستا عىلىمنىڭ جوعارى دەڭگەيگە كوتەرىلۋىنە سەبەپشى بولعانىن اڭگىمەلەدى. قازىر دە دامىعان ەلدەردە عىلىمعا سول كولەمدە قاراجات بولەتىنىن, ويتكەنى, قوعامداعى بۇكىل سالانىڭ العا باسۋى عىلىم-بىلىممەن تىكەلەي بايلانىستى ەكەنىن اتاپ ءوتتى. ول, سونداي-اق, وسى كۇنگە دەيىن قوعامىمىزدا عىلىم قاراجاتىن ناقتى سالالارعا ءبولۋ بارىسىندا فۋندامەنتالدى عىلىمدارعا ارقاشان ەڭ تومەنگى پايىز تيگەنىن بايانداي وتىرىپ, الداعى ۋاقىتتا وسى ماسەلە وڭ شەشىمىن تاۋىپ, عىلىمنىڭ بارلىق سالاسىنا قاراجات تەڭ بولىنەدى دەپ ۇمىتتەنەتىنىن العا تارتتى.
«كاسىبي بىلىگى جوعارى ماماندى دايارلاپ شىعارۋ قاجەتتىلىگى قاي كەزدە دە ماڭىزدى بولعان. بۇل تۇرعىدا قازىرگى قوعامدا دا كەمشىلىكتەر جوق ەمەس. ول كەمشىلىكتەر بارلىق مامانداردى دايارلاۋ بارىسىندا كەزدەسەدى. ءبىزدىڭ تەوريادان پراكتيكاعا كوبىرەك كوڭىل بولەتىن كەزىمىز كەلدى», – دەدى ول.
ايگۇل سەيىلوۆا,
«ەگەمەن قازاقستان».