وڭتۇستىك قازاقستان وبلىسىنداعى ءارتۇرلى دەڭگەيدەگى 30 مىڭنان استام كاسىپورىندار ءبىر-ءبىر مۇمكىندىگى شەكتەۋلى جاندى جۇمىسقا قابىلداپ, قامقورلىققا الۋدى ماقسات تۇتىپ وتىر. بۇل باستامانى وبلىستاعى كاسىپكەرلەر ءبىراۋىزدان قولدادى. شىمكەنتكە كەلگەن ساپارىندا ەڭبەك جانە حالىقتى الەۋمەتتىك قورعاۋ ءمينيسترى تامارا دۇيسەنوۆا وسىنداي يگىلىكتى ءىستىڭ كۋاسى بولدى.
بۇگىندە وڭتۇستىك قازاقستان وبلىسىندا ەڭبەككە جارامدى 28 مىڭ مۇگەدەك جان بار. شىمكەنت قالاسىندا وتكەن مۇمكىندىگى شەكتەۋلى ازاماتتاردى ەڭبەكپەن قامتۋ ماسەلەسىنە ارنالعان وبلىستىق فورۋمدا بارلىق جۇمىس بەرۋشىلەرگە ارنالعان ۇندەۋ قابىلداندى. سونىمەن قاتار, ەندى قولعا الىنىپ وتىرعان «ءبارىمىز بىرگەمىز, مىقتى بولسىن ىرگەمىز» اكتسياسى اياسىندا تاعدىر تالكەگىنە ۇشىراعان ازاماتتاردى جۇمىسپەن قامتۋ ءىسى كۇشەيەتىنى ايتىلدى. مينيستر بۇل فورۋم وزگە وڭىرلەرگە ۇلگى بولۋى كەرەك ەكەنىن ايتا كەلە, وڭتۇستىكقازاقستاندىق كاسىپكەرلەردىڭ ۇندەۋىن ەلىمىزدەگى 340 مىڭنان استام كاسىپورىن باسشىلارى قولدايتىنىنا سەنىم ءبىلدىردى. سوندا عانا العا قويعان ماقساتتاردى, مۇددەلەردى جۇزەگە اسىرۋعا بولادى. سونداي-اق, مينيستر وسى ىسكە اتسالىسقان كاسىپكەرلەرگە مەملەكەت تاراپىنان كومەك بولاتىنىن باسا ايتتى.
«ءبىز كاسىپكەرلەردى مۇمكىندىگى شەكتەۋلى جانداردى جۇمىسقا الىڭدار دەپ قانا قويماي, جۇمىسپەن قامتۋ باعدارلاماسى اياسىندا قانداي كومەك بولاتىنىن دا ءتۇسىندىرىپ جاتىرمىز. ەگەر كاسىپكەرلەردىڭ قاراماعىندا وسىنداي جارىمجان جاندار جۇمىس ىستەپ جاتقان بولسا, ول ازاماتتاردىڭ ماماندىعىن كوتەرۋگە قاجەتتى قارجىنىڭ 70 پايىزىن مەملەكەت, 30 پايىزىن كاسىپورىنداردىڭ وزدەرى كوتەرەدى. ءدال وسىلايشا جۇمىسپەن قامتۋ باعدارلاماسى ارقىلى ەڭبەكاقىسىنىڭ 35 پايىزىن مەملەكەت, 65 پايىزىن جۇمىس بەرۋشىنىڭ ءوزى تولەپ وتىرادى», دەيدى ت.دۇيسەنوۆا.
وبلىس اكىمى اسقار مىرزاحمەتوۆتىڭ ايتۋىنا قاراعاندا, بىلتىر «جۇمىسپەن قامتۋدىڭ جول كارتاسى-2020» باعدارلاماسىنىڭ 2-ءشى باعىتى بويىنشا شاعىن نەسيەمەن قامتاماسىز ەتۋ ءۇشىن 3 ملرد. تەڭگە, كاسىپكەرلىك نەگىزدەرىنىڭ وقىتۋلارىنا 46,6 ملن. تەڭگە بولىنگەن. وسى باعىتتاعى وقىتۋ ۇيىمى رەتىندە وبلىستىق «كاسىپكەرلەرگە قىزمەت كورسەتۋ ورتالىعى» بەلگىلەنىپ, 2013 جىلى 2 663 ادامدى كاسىپكەرلىك نەگىزدەرىنە وقىتتى. وبلىستىڭ شاعىن نەسيەلەندىرۋ جونىندەگى وكىلەتتى وڭىرلىك ۇيىمى تاراپىنان باعدارلامانىڭ 1 075 قاتىسۋشىسىنا جالپى 2,5 ملرد. تەڭگە نەسيە بەرىلدى. بۇل كۇنى وبلىس ورتالىعىندا وتكەن مۇمكىندىگى شەكتەۋلى ازاماتتارعا ارنالعان بوس جۇمىس ورىندارى جارمەڭكەسىندە 90 جۇمىس بەرۋشىدەن 1000-نان استام جۇمىس ورنى ۇسىنىلدى. ءجارمەڭكەدە 252 مۇگەدەك ازامات تۇراقتى جۇمىسقا ورنالاستى.
جالپى العاندا «جۇمىسپەن قامتۋدىڭ جول كارتاسى-2020» باعدارلاماسىن جۇزەگە اسىرۋ بويىنشا وڭتۇستىك قازاقستان وبلىسى ءبىرىنشى ورىندا كەلە جاتىر. بىلتىر ەلىمىزدە اتالعان باعدارلاما بويىنشا ەڭبەككە ارالاسقانداردىڭ 33,8 پايىزىن وڭتۇستىكقازاقستاندىقتاردىڭ قۇراۋى وسى ءسوزىمىزدىڭ ايقىن دالەلى.
سونداي-اق, الداعى ۋاقىتتا ءدارىگەرلەر مەن مۇعالىمدەرگە جالاقى ولاردىڭ ءبىلىم دەڭگەيىنە, بىلىكتىلىگىنە, جۇمىستارىنىڭ قيىندىعى مەن جاۋاپكەرشىلىك دارەجەسىنە قاراي تولەنەدى. بۇل مادەنيەت جانە سپورت سالاسىنىڭ ماماندارىنا دا قاتىستى. ياعني دارىگەر, مۇعالىم جانە الەۋمەتتىك قىزمەتكەرلەرگە ەڭبەكاقى تولەۋدىڭ جاڭا جۇيەسى 2015 جىلدىڭ 1 شىلدەسىنەن باستاپ ەنگىزىلەدى. بۇل جاڭا جۇيەنىڭ باستى ماقساتى – ءار سالادا ەڭبەك ەتىپ جۇرگەن نەگىزگى قىزمەتكەرلەردى انىقتاپ, ولاردىڭ ەڭبەگىن دۇرىس باعالاۋ. ويتكەنى, بۇگىندە ەلىمىزدە دارىگەرلەر جالاقىسىنىڭ 38 پايىزى, ال مۇعالىمدەر ەڭبەكاقىسىنىڭ 48 پايىزى عانا نەگىزگى قىزمەتتەرى ءۇشىن ءتولەنەدى. جالاقىنىڭ قالعان ءبولىگىن قوسىمشا جۇمىستار ءۇشىن بەرىلەتىن تولەمدەر قۇرايدى. باسقاشا ايتقاندا, دارىگەر ناۋقاستى ەمدەگەنى, مۇعالىم بالانى وقىتقانى ءۇشىن الاتىن اقىسى ونىڭ بارلىق جالاقىسىنىڭ جارتىسىنا دا جەتپەيدى.
– بىزدىڭشە, بۇل دۇرىس ەمەس. ادامداردىڭ ەڭبەگى ءوز ماماندىعى بويىنشا اتقارعان نەگىزگى جۇمىسىنا قاراپ باعالانۋى كەرەك. سوندا ادامدار قوسىمشا جۇمىستارمەن اۋەستەنبەي, وزدەرىنىڭ بىلىكتىلىگىن ارتتىرۋعا نازار اۋدارادى, – دەدى ت.دۇيسەنوۆا.
ورالحان ءداۋىت,
«ەگەمەن قازاقستان».
وڭتۇستىك قازاقستان وبلىسى.