ايەلگە قامقورلىق – بولاشاققا قامقورلىق

ال ول ەلىمىزدە ءوز دەڭگەيىندە مە؟

حالىقارالىق ايەلدەر كۇنى قارساڭىندا قازاقستان كوممۋنيستىك حالىقتىق پارتياسى ۇلتتىق ءباسپاسوز كلۋبىندا «ايەلگە قامقورلىق – بولاشاققا قامقورلىق» دەگەن تاقىرىپتا تالقىلاۋ وتكىزىپ, ايەلدەردىڭ باسىنداعى پروبلەمالاردى شەشۋدىڭ جولدارىن ورتاعا سالدى. شاراعا پارلامەنت ءماجى­لىسىندەگى حالىقتىق كوممۋنيستەر فراكتسياسىنىڭ دەپۋتاتتارى جامبىل احمەتبەكوۆ پەن ايقىن قوڭىروۆ جانە ارنايى شاقىرىلعان ەكى جاس انا قاتىستى. الدىمەن ءسوز العان ج.احمەتبەكوۆ وتكەن اپتادا پارتيانىڭ ۇيىت­قى بولۋىمەن وڭىرلەردە ايەل­دەر قاۋىمىنىڭ الەۋمەتتىك جاع­دايىنا قاتىستى  دوڭگەلەك ۇستەل­دەر وتكەنىن تىلگە تيەك ەتتى. بۇل ءباسپاسوز ءماسليحاتى سونىڭ قورى­تىن­دىسىنا ارنالعاندىعىن العا تارتقان دەپۋتات ايەلدەرگە قام­قورلىق مەملەكەتتىڭ ۇلكەن ساياساتىنىڭ ءبىرى بولۋعا ءتيىس ەكەنىن اتاپ كورسەتتى. قازىرگى تاڭدا ەلىمىزدە تۇڭعىش بالاعا تولەنەتىن اي سايىنعى جاردەماقىنىڭ كولەمى 10186 تەڭگەنى قۇرايتىندىعىن العا تارتقان حالىقتىق كوممۋنيستەر ەلىمىزدەگى ەڭ تومەنگى ءومىر ءسۇرۋ كورسەتكىشى 19966 تەڭگە ەكەندىگىن قاپەرگە سالدى. بۇل ارادا ءبىر بالانى مەكتەپكە دايىنداۋ رەسپۋبليكا بويىنشا 30 مىڭ تەڭگەنى قۇرايتىنى كولدەنەڭ تارتىلدى. ال 2014 جىلى ەلىمىزدە ءبىر جولعى مەملەكەتتىك جاردەماقى 1, 2 جانە 3 بالاعا 55 000 تەڭگەنى قۇراعان. دەپۋتاتتار جاردەماقىنى وزگە ەلدەرمەن سالىستىرا وتىرىپ, ونىڭ ماردىمسىز ەكەنىنە نازار اۋداردى. مىسالى, 2013 جىلعى كورسەتكىش بويىنشا سينگاپۋردا ءبىر جولعى جاردەماقى – 4900, بەلارۋستە – 1000-1500, رەسەيدە 3000 دوللار شاماسىندا ەكەن. فرانتسيادا بالا تۋىپ, ءۇش جىلعا دەكرەتتىك دەمالىسقا كەتكەن انا اي سايىن 400 ەۋروعا دەيىن جاردەماقى الاتىن كورىنەدى. وسىلاردىڭ بارلىعىن ورتا­عا سالعان قكحپ دەپۋتات­تارى ايەلدەرگە قوسىمشا جەڭىل­دىكتەر ۇسىنۋدى جانە بالا كۇتى­مىن­دە وتىرعان انالار مەن بولا­شاق انالارعا قارجىلىق كومەك­تىڭ كولەمىن ۇلعايتۋدى قولداي­تىن­دىقتارىن دايەكتەۋگە تىرىستى. ولاردىڭ پىكىرىنشە, ءبىرىن­شى بالاعا بەرىلەتىن بىرجولعى ءجار­دەماقىنى ەكى ەسەگە كوبەيتكەن دۇرىس. سونداي-اق, اكىمشىلىك كودەكس­كە ەنگىزىلگەن وزگەرىستەر مەن تو­لىق­تىرۋلاردىڭ جاڭا باپ­تارى بويىنشا اياعى اۋىر ايەلدەر­دى جۇمىستان شىعۋعا ءماجبۇر­لەگەندەردى ايىپپۇلمەن جانە قىزمەتىنەن تومەندەتۋ جازاسىمەن جازالاۋ ورىندى بولماق. بۇدان باسقا, حالىقتىق كوممۋنيستەر بالا كۇتىمىنە بايلانىستى بەرىلەتىن اي سايىنعى مەم­لەكەتتىك جاردەماقى مەرزىمىن 3 جاسقا دەيىن ۇزارتۋدى دا ۇسىن­دى. ج.احمەتبەكوۆ كوپ بالالى وتباسىلارعا دا ەرەكشە قامقور­لىقتىڭ قاجەتتىگىن العا تارتتى. ونىڭ ايتۋىنشا, ەگەر وتباسىندا ءۇش بالا بولسا, وندا كوممۋنالدىق قىزمەتتىڭ 30 پايىزىن وتەپ بەرگەن ورىندى بولماق. ال 4-5 بالالى وت­باسىلارعا 50 پايىز جەڭىلدىك بەرىپ, 7 جانە ودان كوپ بالالى وتباسىلاردى كوممۋنالدىق قىز­مەتكە اقى تولەۋدەن مۇلدەم بوساتۋ كەرەك. ءباسپاسوز ءماسليحاتىنا ارنايى كەلگەن جالعىزباستى انا شاريحات يمانباەۆانىڭ مالىمەتىنە قاراع­اندا, قازاقستاندا 100 مىڭ بالا اكە­لەرىنەن اليمەنت الا الماي ءجۇر ەكەن. سوندىقتان دا ول اكە­لەر­گە قاتىستى جاۋاپكەرشىلىكتى قاتاڭ­داتۋدى ۇسىندى. جالپى, ءباسپاسوز ءماسليحاتىن وتكىزۋدەگى باستى ماقسات ايەلدەردىڭ پروبلەماسىنا نازار اۋدارتۋ بولدى. اسقار تۇراپباي ۇلى, «ەگەمەن قازاقستان».