ەلباسى نۇرسۇلتان نازارباەۆتىڭ بيىلعى قازاقستان حالقىنا جولداۋىندا قويىلعان مىندەتتەر سان-سالالى. مۇندا كەز كەلگەن قازاقستاندىق قوعام مۇشەلەرىنىڭ مۇڭ-مۇقتاجدارى مەن تالاپ-تىلەكتەرى, بۇگىنگى كۇنى ولاردى الاڭداتىپ وتىرعان ماسەلەلەر ەسكەرۋسىز قالماعان. سونىڭ ءبىرى – مۇمكىندىگى شەكتەۋلى جاندارعا قولداۋ كورسەتۋگە باعىتتالعان.
«نۇر وتان» پارتياسى وسىنداي ىزگى مىندەت پەن پارىزدى اتقارۋ ءۇشىن «كەدەرگىسىز كەلەشەك» اتتى جوبانى جۇزەگە اسىرۋعا كىرىستى. وسى جوبا شەڭبەرىندە اتالعان توپقا كىرەتىن ەل ازاماتتارىنىڭ ءومىر ساپاسىن جاقسارتۋعا كوڭىل بولىنبەك. «نۇر وتان» پارتياسى باتىس قازاقستان وبلىستىق فيليالىندا قولعا الىنعان ءىس-شارالار كەشەنى ولاردىڭ ۇكىلى ۇمىتتەرىنىڭ اقتالۋىنا بەرىك سەنىم تۋعىزادى. اسىرەسە, ورال وڭىرىندە مۇمكىندىكتەرى شەكتەۋلى جاندار مەن مۇگەدەكتەردى جۇمىسقا ورنالاستىرۋ جونىندەگى ماسەلەلەرگە جاڭاشا كوزقاراس قالىپتاسىپ كەلە جاتقانى سۇيسىندىرمەي قويمايدى. ەكىنشىدەن, ولار ءۇشىن كەدەرگىسىز جاعدايلار جاساۋ مەن تۋعىزۋعا دا جان-جاقتى كوڭىل بولىنۋدە.
– ويتكەنى, قازىر كوپتەگەن الەۋمەتتىك جانە كولىك ينفراقۇرىلىمى نىساندارى مۇگەدەك جاندار ءۇشىن ىڭعايسىزدىق پەن قولايسىزدىق تۋعىزىپ جۇرگەنى جاسىرىن ەمەس. سول ءۇشىن پارتيا فيليالى باستاماسىمەن نىسانداردىڭ قولجەتىمدى كارتاسىن جاساۋ شارالارى ويلاستىرىلعان. بۇعان قوسا, ينكليۋزيۆتىك ءبىلىم بەرۋ جۇيەسىن ورنىقتىرۋ ءىسى دە جولعا قويىلماق. قازىرگى قازاقستاندىق قوعامدا مۇمكىندىگى شەكتەۋلى جانداردى بارلىق جاعىنان قورعاي الاتىن قۇقىقتىق الاڭ قالىپتاستىرۋ قاجەتتىگى دە ايقىن كورىنۋدە. بۇل ماسەلەنى ءبىرىنشى كەزەكتە مۇمكىندىگى شەكتەۋلى جانداردىڭ قۇقىقتارىن قورعاۋ جونىندەگى ارنايى زاڭ تارماقتارىمەن رەتتەۋگە بولاتىنى بەلگىلى. ەل پارلامەنتىنىڭ دەپۋتاتتارى بۇل ورايدا اتالعان زاڭ جوباسىن كەشىكتىرمەي قارايدى دەپ سەنىم ارتامىز, – دەدى گازەت تىلشىسىنە «نۇر وتان» پارتياسى باتىس قازاقستان وبلىستىق فيليالى توراعاسىنىڭ ءبىرىنشى ورىنباسارى سەرىك سۇلەيمەن.
قازىرگى كەزدە وبلىس تۇرعىندارىنىڭ 3,8 پايىزىن مۇمكىندىگى شەكتەۋلى قامكوڭىل جاندار قۇرايدى ەكەن. پارتيا فيليالىنا قاراستى قوعامدىق قابىلداۋ بولمەسىنە ولاردان تۇسكەن وتىنىشتەر مەن تىلەكتەرگە ۇلكەن جاۋاپكەرشىلىك جانە سەرگەك كوڭىل-كۇيمەن قاراۋ داعدىسى ورنىعىپ كەلە جاتقانى دا اتاپ ايتۋعا تۇرارلىق ماسەلە. ءيا, قالاي دەسەك تە, مۇمكىندىكتەرى شەكتەۋلى جاندار مەن مۇگەدەكتەر قول قۋسىرىپ قاراپ وتىرعان توپتار ەمەس. ولار دا ەڭبەك ەتىپ, بەلگىلى ءبىر ءونىم وندىرەدى. وسى ونىمدەردى وتكىزۋگە جەڭىلدىكتەر جاساۋعا ىقپال ەتۋ تۇتقالارىن ويلاستىرۋ دا فيليال قىزمەتكەرلەرى نازارىنان تىس قالماعان.
وسىنداي بايىپتى كوزقاراس كورىنىستەرى قىزمەت كورسەتۋ ماماندىقتارىنا قايتا ازىرلەۋ, دەمالۋ مەن ەم الۋعا جاعداي جاساۋ, پاراوليمپيادالىق سپورتتى جانداندىرۋ سەكىلدى ىلكىمدى ىستەردەن دە ءوز ناتيجەسىن تاباتىن بولسا, نۇر ۇستىنە نۇر. سونداي-اق, بيزنەستىڭ الەۋمەتتىك جاۋاپكەرشىلىگىن بۇگىنگى اتالعان توپ وكىلدەرىنە قاتىستى كوتەرۋ كەرەكتىگى دە تالاس تۋعىزبايدى. مىنە, «نۇر وتان» پارتياسى وبلىستىق فيليالى كەدەرگىسىز بولاشاق قۇرۋ جوباسىن جۇزەگە اسىرۋعا ءوز ۇلەستەرىن وسىلايشا قوسىپ كەلەدى.
تەمىر قۇسايىن,
«ەگەمەن قازاقستان».
باتىس قازاقستان وبلىسى.